Kalate Paul a nga tili Behébreu

3 Ajô te, a bobejañe be ne mimfufup, benyoñe ngabe ya nloone ya yôp,* mi simesa’an éve’ela Yésus, nnye ate bi nga kañese* ane nlôman a beta prêtre. 2 A nga ba’ale élat a Nyu a nga telé nye, fo’o ve avale Moïse fe a mbe nda Nyuli ate ése. 3 Amu a* lañeban ane môt a yiane duma a dañe Moïse, amu nyu a lôñe nda a bili duma a dañe nda ébien. 4 E nya ajôô, nda ése é bili môt a nga lôñe je, ve nyu a nga té biôme bise a ne Zambe. 5 Moïse a mbe zôsô mbo ésaé ya nda nyuli ate ése, aval ane ndeme* ya mame ma ye jôbane melu ma zu, 6 ve Krist a mbe zôsô aval ane mon a tebele nda Zambe. Bi ki, bi ne nda jé nge bia tebe ne bip, a kobô teke ko woñ ajô ya mbunane bia bo wô éngelezek akekui memane.

7 Nde, fo’o ve avale mfufube nsisim a jô, “Den, nge mia wô’ô tyiñe jé, 8 te boané na minleme mienane mi bo ayet, fo’o ve avale be nga soñe mbia ôlune wé môse meve’ele nkôte si, 9 vôme bemvamba benane be nga ve’ele ma a jeñe ma mintañete, akusa bo be nga yene mame me nga bo mimbu 40. 10 Jôme te nje miaé bôte wu ô nga kui ma menyume jôé a me nga jô na: ‘Minleme miap mia ke ma ôyabe kom ése, a be ngenane teke yeme mezene mam.’ 11 Ajô te, me nga kane ngana ôlune wom été na: ‘Ba ye ke nyiin awo’one dam.’”

12 Taba’ané ntyel, a bobejañ, amu ma ko woñe na môt éziñe ya be mia a bi nlem ô ne abé a jembane mbunan a su’ulane ke vevea Zambe ôyap ôte’etek ôte’etek; 13 ve kelané ôsu a veané ngule nyule môs ôse, nté ôse éyoñ é ne loobane na “den” é ngenan, ndembene môt éziñe ya be mia a bo teke bi nlem ô ne ayet a zene ya ngule medu’ane ya nsem. 14 Amu bi ntoo benyoñe ngabe ya Krist,* fo’o ve nge bia bi a mo mebaé ndi nleme bi nga bi atata’a akekui memane. 15 Aval é nga jôbane na, “Den, nge mia wô’ô tyiñe jé, te boané na minleme mienane mi bo ayet, fo’o ve avale be nga soñe mbia ôlune wé.”

16 Amu, beza be nga wôk a soñe beta ayaa wé? Ye sa ke bôte bese be nga kôlô Égypte, be too éjôé Moïse si? 17 Nde fe, beza be nga kui Zambe menyume jôé mimbu 40? Ye sa ke ba be nga bo nsem, mbe bete menyule me nga wu nkôte si? 18 A beza a nga kane ngana na, ba ye ke nyiin awo’one dé? Ye sa ke ba be nga bo melo? 19 Nde ñhe, bia yene na, be nji kui na be nyiin amu njembane mbunan.