Kalate Paul a nga tili Begalate

2 Nde mvuse mimbu 14, me nga beta bete Jérusalem bia Barnabas, Tite a mbe fe nsamba a ma. 2 Me nga bete wôé éyoñe me biya ñyenan, a me nga kañete bobejañe mbamba foé me mbe me kañete’e meyoñ. Me nga bo de menda, a ôsu beta be bôt, mfa’a ya yeme nge me nji be me mate’e, nge ke nge me nga bo teke mate zezé. 3 Ja’a Tite a mbe a ma, a nji be ntindane ya tyi’iban atyel akusa bo a mbe mone grec. 4 Ve, ajô é nga bômbô amu bivuse bi bobejañe bi nga nyiine zañe jangan asoé, mfa’a ya zu bebe ajô ya fili bi bili amu Krist Yésus, na bi veñesan alo dap. 5 Bi nji jô’é na be jôé bia, teké’é, to’o asu mon éyoñ, ndembene mbamba foé ya benya mejôô a ke ôsu a tabe be mia.

6 Mfa’a ya ba ba yené na be ne beta be bôt, mfa’a wom, to’o be mbe avale bôt avé, teke jôm éziñe me nga kame be be, amu Zambe a tyi’i ke môt ajô a zene ya mame bôte ba yen a mis; beta be bôte bete be nji ye’ele ma jôm éziñ é ne mfefé. 7 Ve jame da, éyoñe be nga yene na, mbamba foé a nga vebane be ma asu ba be ne teke ntyi’an atyel, fo’o ve aval a nga vebane be Pierre asu ba be ne ntyi’an atyel, 8 amu, nyu a nga ve Pierre ngule ya bo nlôman asu ba be ne ntyi’an atyel, nnye fe a nga ve ma je asu bôte ya meyoñ; 9 a éyoñe be nga yeme na beta mvam a nga vebane be ma, Jacques, Céphas* a Jean, mbe bete be mbe be yené’é ane mekône ya ékôane bekristen, be nga ve bia Barnabas wo ya mbo nnôm, mfa’a ya liti na ba kañese,* asu na bia bi ke be bôte ya meyoñ, ve be ki, be ke be bôte be ne mintyi’ane metyel. 10 Be nga jô bia ve na bi ke ôsu a simesane minzôzoé, a me nga jeñe na me bo de a nleme wom ôse.

11 Ve éyoñe Céphas a nga zu Antioche, me nga komekane* nye bi lôane mesu, amu mboone wé ô mbe nya abéé.* 12 Amu, ôsusua na bôte béziñe be mbe be so’o be Jacques ba suan, a mbe a ja’ak a bôte ya meyoñ; ve éyoñe be nga suan, a nga telé teke beta bo de, a a nga taté na a tyetebe be, amu a mbe a ko ba be mbe mintyi’ane metyele woñ. 13 Bejuif bevo’o be nga taté fe na ba bo medu’ane* mete, to’o Barnabas fe a nga nyiine medu’ane* mete été. 14 Éyoñe me nga yene na, be nji wulu aval ane benya mejôô ya mbamba foé ba ye’ele, me nga jô Céphas ôsu bôte bese na: “Nge wo, ô kusa bo mone juif, wo nyiñ ane bôte ya meyoñ, sa ke ane mone juif, aval avé ô ne tindi bôte ya meyoñe na, be nyiñ ane bejuif?”

15 Bia bi nga bialé bejuif, sa ke bebo minseme ba so meyoñe 16 bia kôme yeme na ba ve môte mekabe na a ne zôsô, sa ke a mimboone ya Metiñe me Moïse, ve fo’o ve a zene ya mbunane be Yésus Krist. Nde, bi nga bi mbunane be Krist Yésus, ndembene ba ve bia mekabe na bi ne zôsô a zene ya mbunane bi bili be Krist, ve sa ke a mimboone ya Metiñe me Moïse, amu teke môt a ye bi mekabe na a ne zôsô a zene ya mimboone ya Metiñe me Moïse. 17 Nge bi mbe fe bebo minseme nté bi mbe bi jeñe’e na be ve bia mekabe na bi ne zôsô a zene ya Krist, ye nalé a tinane na Krist a nye’e éyoñe bia bo nsem? Teké’é fo’o! 18 Nge ma beta lôñe jôme me nga mane tyam, ma liti fo’o na me ne ntyame metiñ. 19 Amu, a zene ya Metiñe me Moïse, me nga wu asu Metiñe me Moïse, ndembene me bo vevee asu Zambe. 20 Me ne ntyelan élé a Krist. Sa ke fe ma ma nyiñ, ve Krist nnye a nyiñe nsamba a ma. Nde, ényiñe ma nyiñ éyoñe ji e minsôn, ma nyiñe je a zene ya mbunane be Mona Zambe, nnye a nga nye’e ma a ve émien asu dam. 21 Me nji bene beta mvame Zambe, amu, nge zôsô a so a zene ya Metiñe me Moïse, Krist a nga wu fo’o zezé.