Kalate Paul a nga tili Beromain
9 Ma kobô benya mejôô Krist été, me nji laane minsos, amu mone môte wome ya nlem été a bo’olô a ma mfufube nsisim été, 2 na me bili beta ôlun a mintaé mi ne ma nleme kom ése. 3 Nge nalé a ne boban, me mbe me yiik na me bo nkandan a Krist, ane môt a be’e biyo’é na me volô bobenyañe bam, a bivuvumane biame ya minsôn, 4 mbie bite bi ne bone ya Israël. Be ne ba be nga nyoñeban ane bone be bili duma, be bili bilat, be bili Metiñe me Moïse, be bili ésaé é ne étyi, a be bili fe bengaka’a. 5 Mbe bete be ne mvoñe bôte bemvamba, a nne Krist a nga so mvoñe bôte jap mfa’a ya minsôn. Zambe a jôé biôme bite bise, a nyoñe’e duma nnôm éto a nnôm éto. Amen.
6 Ve, a nji bo ve ane mejô me Zambe me nji tôéban, amu sa ke bôte bese be nga bialé nda bôt Israël mbe fo’o be ne “Israël.” 7 Nge na sa ke ba bese be ne mvoñe bôt Abraham mbe ñhe fo’o be ne bon. Ve é ne ntilane na: “Nyu a ye loobane na mvoñe bôte jôé a ye so be Isaac.” 8 Nalé ate a tinane na, bone ya minsône be nji fo’o bo bone be Zambe, ve bone ya ngaka’a ba lañeban ane mvoñe bôt. 9 Amu jame di nde ngaka’a é mbe é jô’ô: “Mbu wo zu avale biyoñe di, ma ye so, a Sara a ye biaé mona fam.” 10 Jam éte é nji bobane ve éyoñ éte étam, ve éyoñe Rébecca a nga nyoñ abume mimbiase mibaé, mi so’o be môte wua mvamba wongan Isaac; 11 amu e zu koone na be ngenane te bialé, a na be ngenane te bo mvaé nge ke abé, ndembene nsôñane Zambe mfa’a ya ntoban, ô ne ke ôsu a boban, sa ke amu mimboon, ve amu Nyu a loon. 12 Amu be nga jô nye na: “Nyu a ne ntôl a ye bo ôlo ya nyu a ne ébetan.” 13 Fo’o ve aval é mbe ntilane na: “Me nga nye’e Jacob, ve Ésaü me nga vini nye.”
14 Nde jé bi ne jô? Ye Zambe a ntoo ékotekot? Teké’é fo’o jôm! 15 Amu a nga jô Moïse na: “Ma ye mvamane nyu ma ye kômbô mvamane nye, a ma ye ko éngôngole nyu ma ye kômbô ko éngôngol.” 16 Nde, jam éte da boban, sa ke amu nkômbane môt, nge amu ngul a ve na a bo mam,* ve amu Zambe a ne mvam. 17 Amu éfuse ya mintilane ja jô Pharaon na: “Nge ma te jô’é wo na ô nyiñ, a ne asu na me liti ngule jame mfa’a wôé, a na éyôlé jam é kañetebane si ése.” 18 Nde ñhe, a mvamane nyu ase a kômbô mvamane nye, ve a jô’é nyu ase a kômbô bo melo na a bo melo.
19 Wo ye jô ma na: “Amu jé Zambe a ve bôte mekua? Amu za a ne bene bo nkômbane wé?” 20 Ve a môt, wo ô ne za na wo fetan a Zambe? Ye jôme ba mé ja jô môt a te mé je na: “Amu jé wo te mé ma ana?” 21 A ne ne aya? Ye mmé meviek a nji bo ngule ya belan ékon aval a yi mfa’a ya na ngabe nyi, a kôme vie’e ba belane wô ngumba avale mbelan, a ngabe fok, a kôme vie’e ba belane wô môs ôse? 22 Nde nge Zambe a nga kômbô liti ayaa dé a bo na be yeme ngule jé, a nge a nga bi nlem abui na a jibi mevie’e ma yian awu, a na me bôlé, ye a nji bi ngule ya nyoñe ntyi’an ôte? 23 A nge a nga bo nalé, a mbe asu na a liti akume ya duma dé mevie’e ya mvam, mme mete a nga kômesan asu duma, ayap éyoñ ôsusua, 24 mme mete me ne bia, bia a nga loone sa ke ve bejuif étam, ve bôte ya meyoñe fe. Jé bi ne beta jô? 25 A nga jô fe jame di kalate Osée na: “Bôte be nji bo bôte bam, ma ye loone be na ‘bôte bam,’ a minga be nji nye’e, ma ye loone nye na ‘nkpwek.’ 26 E vôm é nga jôbane be na, ‘Mi nji bo bôte bam,’ vôm ate ba ye loobane na ‘bone be vevea Zambe.’”
27 Nde fe Ésaïe a nga yôtane mfa’a ya Israël na: “Akusa bo tañe bone be Israël é ne bo ane nsele’e ya mañ, fo’o ve mebuka’a mme ma ye nyiñ. 28 Amu Yéhôva* a ye tyi’i si mejô, a ye bo de nya mboone a avôl avôl.”* 29 Nde fe, aval Ésaïe a nga jô na: “Nge Yéhôva* ya minsamba mewosan a nji ke ye jô’é mvoñe bôt, bi nga ye bo ane Sodome, a bi nga ye funane Gomorrhe.”
30 Nde jé bi ne jô? Na bôte ya meyoñ, akusa bo be nji jeñe na be bo mame ya zôsô, be nga kui na be semé zôsô, e zôsô a so mbunan; 31 ve Israël, akusa bo a nga jeñe na a tôñ atiñe ya zôsô, a nji kui na a semé atiñ éte. 32 Ve amu jé? Amu be nga jeñe na be tôñ atiñ éte, sa ke a zene ya mbunan, ve a zene ya mimboon. Be nga kolé, “ako’o da kolé ôbak”; 33 aval é ne ntilane na: “Tama yenan! Ma bôé ako’o da kolé ôbak e Sion, ako’o da kpwé bôte si, ve nyu a liti mbunane wé, a ye ke same.”