Ñye’elan 9
Bebo b’ésaé be Zambe b’ayiane bo mfuban
Amu jé bi ayiane bo mfubane mimfa’a mise? (1)
Timi’i bifia bi: mfubane nsisim? (2) mfubane ntaban? (3) mfuban ôsimesane? (4) mfubane nyôl? (5)
Avale mvite nkobô avé bi ayiane sa’ale? (6)
1. Yéhova Zambe ane mfuban a mfufup. A yi na bebuni bé be bo mfubane—nsisim, ntaban, ôsimsan a nyôl. (1 Pierre 1:16) Bi ayiane ve ngul abui na bi tabe mfubane mise me Zambe. Bi anyiñe si éne mvit. Bi bili fe mewosan be bia bebien mfa’a ya bo abé. Bi nji yiane bili atek.
2. Mfubane nsisim: Nge bi akômbô bo Yéhova ésaé, bi nji yiane ba’ale minye’elan a mimboan y’évus nyebe. Bi ayiane kôlô évus nyebe. Bi nji yiane nyoñ ngap a mam y’été. (2 Becorinthien 6:14-18; Nlitan 18:4) Eyoñ bi ye’é ya benya mejôô, bi ayiane tabe ntyel na bôte b’aye’ele minsos be kee bia ékotekote zen.—2 Jean 10, 11.
3. Mfubane ntaban: Yéhova a yi na bebuni bé be nyiñe ane benya bekristen biyoñ bise. (1 Pierre 2:12) A yene mam mese bi abo, ja’a asoé. (Behébreu 4:13) Bi ayiane sa’ale bijabô, a mvit mimboane mivo’o mise ya si nyô.—1 Becorinthien 6:9-11.
4. Mfuban ôsimesan: Nge nsisim wongan ône njalan a mbamba b’asimesan, ényiñe jangan j’ébo fe ve mfuban. (Bephilippien 4:8) Ve nge bi afuti mbia b’asimesan nleme wongan été, wô na, bi bo mam mene abé. (Matthieu 15:18-20) Bi ayiane sa’ale mevale me mam mese m’andaman ôsimesane wongan. Bi ne ngul ya jalé nleme wongan a mimbamba mi asimesan éyoñ bi aye’é mejô me Zambe.
5. Mfubane nyôl: Bekristen b’ayiane ba’ale menyôle map a mengômsane map mfuban, amu be ne minlôman mi Zambe. Bi ayiane sôbe mo mangan éyoñ bi aso éduk, éyoñ ése bi adi nge nambe bidi. Nge ô nji bi édukntagan, w’ayiane fak éduk jôé a mo. (Deutéronome 23:12, 13) Mba’alane nyôle mfuban w’avolô na bi sa’ale akon. Etaba’a kristen j’ayiane bo mfuban été a atan. J’ayiane bo mbamba éve’ela’a vôm a to.
6. Mfubane nkobô: Bebuni Zambe b’ayiane kobô benya mejô éyoñ ése. Be laane minsos b’ébo te nyiine éjôé Zambe. (Beéphésien 4:25; Nlitan 21:8) Bekristen be nji yiane belane mbia nkobô, nge vô’ôlô mejô mene mvit nge bo mbia fianga, nge laane mvite minlañ. Mfubane nkobô wop, w’akandé be a bôt bevok éyoñ bene ésaé, sikôlô a vôme bi to.—Beéphésien 4:29, 31; 5:3.
[Eve’ela ya afep 19]
Bebuni Zambe b’ayiane bo mfubane mimfa’a mise