Ñye’elane 13

Aval avé ône yene zôsôô nyebe?

Ye minyebe mise mine mvaé mise me Zambe, nge na ve wuwua? (1)

Amu jé minyebe mi ataman na mi atôñ minye’elan mi Krist? (2)

Aval avé ône yemelan benya bekristen? (3-7)

1. Yésus anga bôndé nyebe bekristen wuwua. Ajôte den, bi ayiane bi ve nsamba benya bekañe Yéhova Zambe ve wuwua. (Jean 4:23, 24; Beéphésien 4:4, 5) Kalate Zambe aye’ele na fo’o ve tyôtyoé bôt nje éne ôfanefan zen y’ényiñ.—Matthieu 7:13, 14.

2. Kalate Zambe anga jô ôsusua na éyoñ beye’é b’émane wu, mimbia minye’elan a mefulu m’awosan minye’elan mi Krist mi nyiine ôte’etek ôte’etek ékôan Zambe été. Bôt b’édutu bebuni na be tôñ be, éyoñ b’ayiane tôñ Krist. (Matthieu 7:15, 21-23; Mam Minlôman 20:29, 30) Jamete bi ayene abui minyebe mi jô’ô na mi aso be Krist. Aval avé bi ne yemelan benya bekristen?

3. Beta ndem ya benya bekristen ane na be bili nya nye’ane ézezañe jap. (Jean 13:34, 35) Be nji ye’ele be na b’adañe bôt ya meyoñ mefe, nge ba be bili ékôp éfe. A be nji ye’ele be na be vini bôt ya mesi mefe (Mam Minlôman 10:34, 35) Ajôte nde be ne te bo bita. Benya bekristen b’ayene bôt bevok na bene bekal bap a bobenyañe bap.—1 Jean 4:20, 21.

4. Ndem fok ya benya bekristen éne na b’asemé Kalate Zambe abui. B’ayeme na Kalate Zambe ane mejô mé, a b’asemé mam mese ajô. (Jean 17:17; 2 Timothée 3:16, 17) B’ayeme na mejô me Zambe me ne mfi abui a lôté asimesan a metum me bôt. (Matthieu 15:1-3, 7-9) B’ajeñe na be nyiñ avale Kalate Zambe a liti môse ôse y’ényiñ jap. Ajôte nde be ne te kate bôt jam, bebien ke be bo’o aval afe.—Tite 1:15, 16.

5. Nya nyebe ayiane fe ve jôé Zambe duma. (Matthieu 6:9) Yésus anga bo na bôt befe be yem na jôé Zambe éne Yéhova. Benya bekristen fe b’ayiane bo avale deda. (Jean 17:6, 26; Beromain 10:13, 14) Bôt bevé ya vôm ô too b’akate bôt bevok jôé Zambe?

6. Benya bekristen b’ayiane kañete foé y’éjôé Zambe. Yésus a nga bo nalé. Anga kañete foé y’éjôé Zambe éyoñ ése. (Luc 8:1) Anga tu’a yemete beye’é bé na be kañete foé éte si ése. (Matthieu 24:14; 28:19, 20) Benya bekristen b’abuni na éjôé Zambe étam nje j’éso nya mvo’é a évôvoé si nyô.—Besam 146:3-5.

7. Beye’é be Yésus be nji yiane nyoñe ngap a mbia be mam y’émo ji. (Jean 17:16) Bene teke nyiine bikôan me politik nge bo ézezam. B’asa’ale mbia mefulu, mbia mimboan a mbia nlô, bi ne njalan émo ji. (Jacques 1:27; 4:4) Ye w’ayeme nsamba bekristen éziñ vôm ô too ô bili mendem ma ya nya nyebe Krist?

[Eve’ela ya afep 27]

Benya bekristen b’anye’esan, b’asemé Kalate Zambe a kañete foé y’éjôé Zambe