Enyiñ Jôé J’akeke Wo Vé?

• Mam y’ényiñ me bili bôt b’éziñ aval éne na, be nji fe beta bi éyoñ ya fas vôm ényiñ jap j’akee be.

• Kalate Zambe a kate bia na, mbamba be mam m’éboban. A Kate fe bia na bikôane bi éjôé bise bii mane tyamé. Nge bi ayi na bi nyiñ mefo’été, bi ayiane bo mam m’éziñ avôlavôl.

• Bôt abui b’ayeme mam Kalate Zambe a ye’ele, a b’ajeñ na be bo me. Ve amu abui asimesane y’ényiñ, be nga viane tôñe zene fe.

• Ye w’awôk avak éyoñ w’afas aval ényiñ wo nyiñ den? Eyoñ w’akôme mam y’ényiñ jôé, ye w’ayene fo’o avale mene ndaman mam w’ayi?

[Encadré a ne afep 9]

Jé j’adañe mfi mise môé?

Tañe fé ône ve biôm bi? Bi ave wo ataté nombo 1 akekui nombo 10. Tañe fé ône ve biôm bi, éyoñ w’afas mfi wop.

Biôm bise bi bine mfi ényiñ môt. Ve nge w’ayiane top jôm jia y’été, jé j’étebe ôsu? jé j’étya’a valé? a keke.

․․․ Ye minvôman

․․․ Ye asu ésaé dôé

․․․ Ye mvo’é minsôn jôé

․․․ Ye mvaé jôé

․․․ Ye alu’u dôé

․․․ Ye bebiaé bôé

․․․ Ye bone bôé

․․․ Ye mbamba nda jôé, Ye mbamba mengômesane môé

․․․ Ye ntebane ôsu mfa’a ya jôm ése wo bo

․․․ Ye nkañan Zambe

[Encadré a ne afep 10]

Ye mam w’atyi’i na w’abo m’ake wo vôm w’akômbô ke?

FASE MINSILI MI

YE MINVÔMANE: Ye mimvômane miam mi abo na me wo’on? Ye mine ndaman mvo’é minsône jam, nge li’i ma éyem nyôle jam? Ye mine avale “bivôé” d’abo ngul biduñ na me bili atek nge wô’ô nlô mintaé? Nge mimvômane mine abeñ, ye mi ajañelé m’éyoñ y’abo te bo mam mene mfi abui?

YE ÉSAÉ JÔÉ: Y’ésaé jam j’avolô ma na me nyiñ, ye na j’abo m’ ôlo? Ye m’asaé alôté nné na me fam ôkon? Ye m’ajibi saé ngumba môs alôté na me laane a bone bam? Nge masa wom ajô me na, me bo ésaé éne abé mis me Yéhova, nge zametan mam ya nsisim, ye m’ébo ésaé te amu na masa aza vaa ma bisaé?

YE MVO’É MINSÔNE JÔÉ: Ye men’éles mam ya mvo’é minsôn jam, nge na ye m’atabe ntyel mfa’a ya ba’ale mvo’é éte? Ye minlañe miam mise mi tii ve mam ya mvo’é minsôn? Ye m’asimesan fo’o nda bôt jam éyoñ môt y’été a kon?

YE MVAÉ JÔÉ WOMIEN: Ye m’asimesan ve mvaé jam étam? Ye m’atélé mvaé jam ôsu, nyô bemvôé bam a nda bôt jam kik mvus? Ye m’asaéban aval ane nyô a kañe nya Zambe?

YE ALU’U DAM: Ye m’ayen minga wom nge nnôm wom v’éyoñ nleme wom ône mevak? Ye ma semé nye avale ya ve nye duma dé? Ye mbunan wom ñwô w’aliti ma avale m’ayiane ba’ale aluk?

YE BEBIAÉ BÔÉ: Nge me ngenane ésoé, ye m’ébo bebiaé bam mewôk—ye me yalane be a ésemé, ye m’abo bisaé b’ave ma nda, ye m’abulane nda awolo b’ate jô ma na me bulan, ye ma sa’ale mewoso a mam ya b’avini? Nge me nto môt éngom, ye me ne te fetane bebiaé bam, ye m’atoñe be, ye m’ajalé minyiane miap avale d’ayiane? Mam mese m’abo be, ye nkômban wom ñwô w’atindi ma, ye nkômbane Zambe?

YE BONE BÔÉ: Ye mamien m’aye’ele bone bam, ye m’ajô’é na sikôlô étam nye a ye’ele be? Ye m’alaane a bone bam, ye ma kus be bingengeñ a be minsini aval été na mbie bi ye’ele be? Ye m’ajôé bone bam aval d’ayian éyoñ ése b’ate kob atiñe Zambe, nge ke na m’abame be v’éyoñ be boya jôm mamien m’avini?

YE ABEÑ NDA, ABEÑ MENGÔMESANE: Jé j’atindi ma na, me jeñ akum a avale biyé ma jaé—ye mam bôt b’ajô ? Ye mvo’é ya nda bôt ? Ye ékana’a m’ave Zambe?

NTEBANE ÔSU JÔM ÉSE M’ABO: Ye m’ayene mfi na, m’ayiane bo jôm ése v’abeñ? Ye m’anye’e na, éyoñ m’abo jôm me dañe bôt bevo’o bese? Ye m’awô’ô ôlun éyoñ môt mfe a tele ma ôsu?

YE NKAÑANE ZAMBE: Jé j’adañe mfi mise mam: ye nse’ane Zambe, ye nse’ane bemvôé bam, ye wu bone bam, ye wu bebiaé bam, ye wu masa wom? Amu na m’akômbô ke ôsu a nyiñ mvaé, ye d’akui ma ôsimesane na, me télé ésaé Zambe été baa?

TUKA’A FAS MELEP YA KALATE ZAMBE

Eto évé ésaé Zambe é bili ényiñ jôé?

Ecclesiaste 12:13: “Ko nya Zambe woñ, ba’ale’e metiñ mé. Amu ngume jam môt ayiane bo ñwô le.”

SILI’I WOMIEN NA: Ye zen éte nje ényiñ jam j’atoñ? Ye mam m’abo nda jam, asu ésa dam, a sikôlô m’aliti na m’abo Zambe mewôk? Nge na ye minkômban mife a abui mam y’ényiñ mi amane nyoñ éyoñ bi ate ba’ale mfa’a Zambe?

Aval awoso avé mia Zambe mi bili?

Minkana 3:5, 6: “Tabe’e Yéhova mebun a nleme wôé ôse, te ye’ebe fe’e jôé womien. Jôm ése w’abo simesa’ane nye, ndemben nye émien éwulu wo mezen mene zôsôô.”

Matthieu 4:10: “Ane Yéhova Zambe, nye w’ayiane kañe, a nnye étam w’ayiane bo ésaé.”

SILI’I WOMIEN NA: Ye ôsimesane wom w’atôban a bifus ya Kalate Zambe bite? Ye mam m’abo m’aliti na me bili nya ndi nlem be Zambe, to’o éyoñ ya minjuk?

Za mfi nlañan a mfasane Kalate Zambe bine wo?

Jean 17:3: “Enyiñ ya nnom éto j’atinane na be yeme wo étam ône nya Zambe, a be yeme fe nyô ônga lôm Yésus Krist.”

SILI’I WOMIEN NA: Y’abim éyoñ m’anyoñ na m’alañ a fas mejô me Zambe d’aliti ésemé me bili mfa’a Kalate Zambe?

Ye w’ave ngul ése na ô tabe bisulan y’akônda bekristen?

Behébreu 10:24, 25: “Mfasane biabebien bi bo na bi nye’esan a bi bo mbamba be mam, bi bo te bu’i bisulan aval ane bôt bevok, . . . a bi dañedañe bo nalé ane mi ayene na môs ôte ônto bebé.”

Besam 122:1: “Me nga wô’ô mvaé éyoñ be nga jô me na: ‘nkean nda Yéhova.’”

SILI’I WOMIEN NA: Y’ényiñ jam j’aliti na ma nye’e melep m’aso Kalate Zambe été a nlem wom ôse? Ngone ya mvus, ye me nga bu’i ésulan amu na mam mefe y’ényiñ me nga mane ma di éyoñ?

Ye ô bili nkômban ya kate bôt bevok foé Zambe a jôm a sôñ?

Matthieu 24:14: “Mbamba foé y’éjôé Zambe é kateban si se ane ngaa . . . , éyoñ te asu’ulan d’ébo.”

Matthieu 28:19, 20: “Kelane si se mi bo bôt ya meyoñ mese beye’é, . . . mi ye’ele  be mam mese me nga kate mia.”

Besam 96:2: “Yi’a Yéhova jia, wumulu’u jôé dé. Môs ôse ya yôp kañete’e mbamba foé ya nyiane w’aso be nye.”

SILI’I WOMIEN NA: Y’ésaé nkatane foé Zambe ébili fo’o éto j’ayiane ényiñe jam? Ye abime ngule m’ave mfa’a ya kate foé éte, j’aliti ndi nlem me bili na, bi anyiñ mbia biyoñ?