Ayemé asu bebiaé:

Nge ô ne mbiaé, teke bisô na wo yi na benyo bon be nye’e Yéhôva a ve nye binyiñe biap. Aval avé ô ne volô be na be kômesan asu mbaptizô? Éyoñ évé be ne tabe nkômesan asu mbaptizô?

Yésus a nga jô beyé’é bé na: “Kelan, mi bo meyoñe mese beyé’é, a baptizô be.” (Mt. 28:19) Mejô mete ma liti na ôsusua na môt a duban, a yiane taté bo ñyé’é Yésus. Nalé a nji tinane ve na a wôk a kañese miñye’elane mi Krist, a yiane fe tôñe bibô’a mebo bié. Ja’a bone be bongô be ne ngule ya bo jam ete.

Va’a benyo bone mbamba éve’ela, bo’o fe mbane ya ye’ele be Mejô me Yéhôva. (Dt. 6:6-9) Wo yiane fe belane bekalate ane Jé Kalate Zambe a ne ye’ele bia? a Ba’ale’e womien nye’ane Zambe été asu na be yeme mbôka’a ya miñye’elane ya Kalate Zambe, a na be fas a zene ya miñye’elane mia so été. Volô’ô bone bôé na be bo ngule ya timine bôte bevok mam ba buni. (1 P. 3:15) Mame ma me ne volô be na be nyoñe ntyi’ane ya duban a ke ôsu a yaé nsisim: miñye’elan a ngule wo ve be, mam ba yem a zene ya ayé’é étam a ayé’é ya nda bôt, bisulan a mbamba bemvôé be bili akônda été. Volô’ô be na be bi mbamba minsôñane mfa’a ya nsisim. Volô’ô be na be ve ngule ya subu Yéhôva bebé kom ése.

Kalate Minkana 20:11 a jô na: “Ja’ane mongô a liti avale môt a né, a mboane mame wé, nge ésaé jé é ne mvo’é, a nge é ne zôsô.” Mimboane mivé mi ne liti na mongô a nto nkômesane ya bo ñyé’é Yésus Krist a nyoñe mbaptizô?

Mongô a kômbô duban a yiane bo bebiaé bé mewôk. (Mam. 5:29; Beco. 3:20) Éyoñe Yésus a mbe a bili mimbu 12, Kalate Zambe a jô na: “A nga [bo bebiaé bé] mewôk.” (Luc 2:51, Mfefé Nkôñelan) E ne été na, mi nji yiane yange na mone wônan a bo étyi te kop. Ve mongô a kômbô duban a yiane ve ngule ya tôñ éve’ela Yésus, ba yiane fe nye yem ane mongô a bo bebiaé bé mewôk. A yiane fe liti na a nye’e mam a yé’é Kalate Zambe été. (Luc 2:46) Ye mone wôé a nye’e bisulan? Ye a yalane fo’o bisulan? (Bs. 122:1) Ye a wô’ô évé ya lañe Kalate Zambe a bo ayé’é étam?​—Mt. 4:4. Mongô a kômbô duban a yiane telé mame ya Éjôé Zambe ôsu ényiñe jé. (Mt. 6:33) Émien a kañete bôte bevo’o mam a yé’é, teke na ba tindi nye. A ve’ele mevale me nkañete mese, teke ko woñe na beye’ele bé a bongô be sikôlô bevok be yeme na a ne Ngaa Yéhôva, éyoñe ba ve nye ésaé bisulane ya zañe sondô, a nji nyoñe je éngbwemese.

A sa’ale mbia mewoso amu a jeñe fe na a ba’ale nleme wé mfuban. (Min. 13:20; 1 Bec. 15:33) Mboon ôte wo ye yené e mam a tobe na a yene bingengeñ, mezik a vô’ôlô, mimvômane mié a aval a belan internet.

Abui bongô da tobe na da vu bebiaé bap, ba kañese benya mejôô, a ba tyi’i na ba dubane ja’a be ngenane bongô. A bebiaé, Yéhôva a kele’ ôsu a botane mia nté mia volô bone benane na be nyoñe beta ntyi’ane ya bo bemvôé Bé!

Ayemé asu nkañete mbamba foé a ngenane teke duban:

E bo nkañete mbamba foé a ngenane teke duban, a ne angôndô ya mbamba jam. Bia se’e wo amu ngul ése ô veya na ô yaé nsisim. Ayé’é dôé ya Kalate Zambe é volôya wo na ô bi nya ñyemane, a ñyeman ôte ô volôya wo na ô bi mbunan.​—Jn. 17:3; Beh. 11:6.

Ôsusua na wo yé’é Kalate Zambe a Bengaa be Yéhôva, éko éziñ ô nga to ñyebe ôfe, nge ke na ô nji be ô bili ñyebe. E ne fe bo na, ô mbe ô nyiñi’ avale Yéhôva a nji yene mvaé. Ve éyoñe ji, mbunane wôé ô volôya wo na ô meme mam abé môé, nalé a tinane na ô jôbane me a vini me; a na ô kôñelane nlem, nalé a tinane fe na, ô lumeya mam abé môé mvus a jeñe na ô bo ve mame me ne mvaé mise me Yéhôva.​—Mam. 3:19.

Éko éziñ, ô nga yé’é Mejô me Zambe “ataté nkeñele mon.” Mejô me Zambe mete me nga volô wo na ô sa’ale mefulu me bôte be ne te yeme Zambe, a na ô bo te bo minsem. (2 Tim. 3:15) Ô nga yé’é aval ô ne jibi bikpwe’ele a mame mefe me ne bo na ô tyam atiñe Yéhôva. Ô litiya na ô bili mbunan amu wo su’u nya ékaña’a a kañete bôte bevo’o benya mejôô. Ô nga yé’é ane ba kañete mbamba foé. Éyoñe ji, womien ô nyoñeya ntyi’ane na wo bo nkañete mbamba foé a ngenane teke duban.

Aval ese ô nga yé’é yeme Yéhôva, nge ô nga yeme nye ô nto nya môtô, nge ke na ô nga yé’é yeme nye ataté nkeñele mon, éyoñe ji, ô nto ngule ya beta nyoñe beta mintyi’ane mife mibaé: e ve womiene ngumba be Yéhôva a e duban. Wo ve womiene ngumba be Yéhôva éyoñe wo ye’elane nye a kate nye na, ataté éyoñe ji wo zu bo mame mese ve asu nkômbane wé. (Mt. 16:24) Éyoñe wo ye duban, wo ye liti bôte bese na ô veya womiene ngumba be Yéhôva. (Mt. 28:19, 20) Wo taté na wo bo Yéhôva ésaé nya mboane ve éyoñ ô maneya ve womiene ngumba be nye a duban. A ne fo’o mvom é ne teke ave’an!

Ve, avale Kalate Zambe a ye’ele bia, ô ne tôbane minjuk mevale meval. Te vuane na, valé a ndôme duban, ‘nsisim ô nga be’e Yésus a kee nye nkôte si na Satan a ve’ele nye.’ (Mt. 4:1) Nde ñhe, wo yiane yeme na, ane Krist, wo fe wo ye tôbane meve’ele éyoñe wo ye duban. (Jn. 15:20) Meve’ele mete me aye bo mevale meva. Mewosane me ne so wo nda bôte jôé. (Mt. 10:36) Nge na bongô besikôlô bevok, nge minnôme mewoso miôé, bôte mia be be mia saé be ne fe kpwe’ele wo. Te ve’ele vuane mejô me Yésus me ne ntilane kalate Marc 10:29, 30, (Mfefé Nkôñelan). A nga jô na: “Ma kate fo’o mia bebela na, e môt éziñ a ye li’i nda, nge bobenyañ, nge beka, nge nyia, nge ésaa, nge bon, nge ke mefup amu ajô dam, a ajô mbamba foé, a se ngule ya bo te nyoñe biôm bite ntet biôm tañe jôme jia éyoñ ébien ji, a taté menda, a kui bobenyañ, a beka, a benyia, a bon, a mefup, a fulane bikpwe’ele, a ényiñe ya nnôm éto mfa’a ya biyoñ bia zu.” Ajô te, kele’ ôsu a ve ngule ya subu Yéhôva bebé, a wulu ane a yi.

Éyoñe wo ye bi nkômbane ya duban, kate’e de ntebele bemvendé ya akônda. Minsili mia tôñe le, mmie bemvendé b’aye sili wo asu na be yeme nge ô nto ngule ya duban. Ô ne taté na wo lañe mie éyoñe wo bo ayé’é étame dôé.

Asu na ô kômesane minlañe mia bemvendé mia ye laan, nyoñe’ éyoñe ya lañe bifuse bise ya Kalate Zambe bi ne été a fase bie. Ô ne tili mimfasane miôé miziñ e kalate nyi nge ke afep afe. Éyoñe bemvendé ba sili wo minsili, ô ne yoé kalate wôé a lañe biyalane wo te tili été. Nge wo kate wô’ô nsili éziñ, sili’i môte mia nye mia yé’é Kalate Zambe mvolan nge ke bemvendé.

Éyoñe wo ye laan a bemvendé, te jeñe na ô ve ayap biyalan, nge bi bi ne ayaé ya wôk. Éyalan é ne tyi’ibi, é so’o nlem, nje ja yian. Da ye sili na ô su’u biyalane biziñ a éfuse jia nge ke bifuse bibaé ya Kalate Zambe.

Nge ô ngenane teke kôme wô’ô miñye’elane ya Bible Bekristene ba yiane tôñ, bemvendé ba ye volô wo na ô kôme timine mame wo yé’é Kalate Zambe été a bifia biôé; ndembene wo ye bo nkômesane na ô duban éyoñ éfe.

[Ayemé asu bemvendé y’akônda: Melep asu minlañe bemvendé ba su’ulane laan a môt a kômbô duban me ne afebe 54-59.]