NGAP 24

Paul a tili mekônda

Bekalate be Paul b’ave akônda bekristene ngul

MFEFÉ akônda bekristen ô nga téban ô mbe beta mfi asu na nsôñane Yéhova ô tôéban. Ve bekristene ya ntete mimbu ôsu be nga ji’a tôbane minjuk. Ye be nga tabe fo’o ba’aba’a a Zambe éyoñe be nga tôbane minju’u akônda été a nseñ? Éfase kalate Zambe é nga tilibane nkôbô Grek é bili bekalate 21. Bekalate bete b’ave melebe m’ayiane, me va’a fe ngul.

Nlômane Paul a nga tili bekalate awôm a benyin—ataté Beromain akekui Behébreu. Bekalate bete be bili biyôlé ya bôt a nga to a tili’i—biyoñe biziñe, bekalate bete be mbe asu môte wua, nge asu môt a mbe a to akônda éziñ. Bi tame zu yene mame méziñe Paul a nga tili bekalate bé été.

Sa’ale’e mbia ntaban a mbia mefulu. Bôte bese b’ abo bijabô, mejian, a mbia be mame mevok “be aye nyoñ ngap ayoñe Zambe.” (Begalate 5:19-21; 1 Becorinthien 6:9-11) Bebo bisaé be Zambe b’ayiane bo nleme wua ja’a be nji bo ayoñe da. (Beromain 2:11; Beéphésien 4:1-6) B’ayiane wô’ô nleme mvaé ya ve bebiene ngumba éyoñe b’avolô bekristene bevo’o be ne mebua. (2 Becorinthien 9:7) Nlômane Paul a nga jô na: “mi nye’elan, te jô’é.” Nalé a tinane na mbo ésaé Zambe a yiane kui nleme wôé a kate Yéhova Zambe bido’o bi mame bié bise a zene ya meye’elan. (1 Bethessalonicien 5:17; 2 Bethessalonicien 3:1; Bephilippien 4:6, 7) Zambe a vô’ôlô meye’elane mangane nge bia ve nye me a mbunan ôse.—Behébreu 11:6.

Jé é ne volô nda bôte na é bo jôme jia? Beyôme b’ayiane nye’e beyale bap ane bebien. Binga b’ayiane bi édo’o ésemé be beyôme bap. Bongô b’ayiane bo bebiaé bap mewôk, amu é ne mvaé nalé mise me Zambe. Bebiaé b’ayiane ye’ele bone bap a yañelé be nye’an été a zene ya metiñe m’aso kalate Zambe été.—Beéphésien 5:22–6:4; Becolossien 3:18-21.

Carte a liti bevôm Paul a nga tili bekalate

Paul a volô bekristen na be tu’a wô’ô nsôñane Zambe. Metiñe me Moïse abui me nga volô bone be Israël, a liti be zen ôsusua na Krist a so. (Begalate 3:24) Ve bekristene be nji be ntindane na be tôñe Metiñe mete asu na be kañe Zambe. Éyoñe Paul a nga tili kalate Behébreu—Bejuif be nga kôñelane bekristen—a nga faé éfufup é lat a Metiñe me Moïse, a liti aval avé nsôñane Zambe wo jalebane be Krist. Paul a nga timine na mam abui ya Metiñe mete me mbe minkulane mejô. Bebé éve’ane a ne betite be mbe be va’a metuna’a be mbe be liti’i metuna’a ya awu Yésus, mme m’ aye so nya njamane mam abé. (Behébreu 10:1-4) A zene ya awu Yésus, Zambe a nga tyam élat ya Metiñe, amu me nji beta volô jôm éziñ.—Becolossien 2:13-17; Behébreu 8:13.

Akônda bekrsiten ya melu mvus da vô’ôlô ane ba lañe kalate wua ya Paul a nga tili

Minye’elan asu mbamba nta’ane mam akônda été. Befame bese be a kômbô bi mimbe’e akônda été b’ayiane bi mbamba ntaban, b’ayiane fe wume ébuma ya nsisim. (1 Timothée 3:1-10, 12, 13; Tite 1:5-9) Bebo bisaé be Yéhova Zambe b’ ayiane sulane vôme wua mbane mban asu na be veane ngule nyôl. (Behébreu 10:24, 25) Bisulan asu ékaña’a bia yiane ye’ele a lôñe mbunane bekristen.—1 Becorinthien 14:26, 31.

Éyoñe Paul a nga tili Timothée kalate baa, éyoñe te a bulaneya Rome. A mbe mimbôk, a yange’e ntyi’ane ajô dé. Fo’o ve tyôtyoé bôte nje é mbe é zômbô’ô ke jôme nye. Paul a nga yeme fo’o na awolo ya awu dé é nto bebé. A nga tili éyoñe te na: “Me maneya wosan mbamba mewosan mete, me sondôya mmatan mbil ôte, me maneya ba’ale mbunan ôte.” (2 Timothée 4:7) Paul a nga wu amu mbunane wé. Ve bekalate a nga tili be a tebele bebo bisaé be Zambe ya den.

—Nkañete ôte wo so kalate Beromain; 1 Becorinthien; 2 Becorinthien; Begalate; Beéphésien; Bephilippien; Becolossien; 1 Bethéssalonicien; 2 Bethéssalonicien; 1 Timothée; 2 Timothée; Tite; Philémon; Behébreu.

ZA A NE MVOÑE ZAMBE A NGA KA’ALE?

Éyoñ Adam ba Ève be boya nsem, Zambe a nga kobô a va’a bive’an éyoñ a nga jô na: “M’ aye fe bo ziñ zañe mia minga, a zañ mvoñe jôé a mvoñe jé. Aye tibi wo nlô, wo, wo aye lôbe nye étimekili.” (Metata’a 3: 15) Mimfufup mintilan mia liti na Diable a ne “nnôme nyo.” (Nlitan 12:9) Ajô ya yeme za a ne mvoñe Zambe, nge nyii bôt, é nga tabe nsolane jame tañe mimbu mintet. Ve Kalate Zambe a nga zu a liti ôte’ete’e ôte’etek za a ye bo mvoñe éte.

Mimbu 2000 mvuse nsem Adam ba Ève, Yéhova a nga liti na Mvoñ a nga ka’ale j’ aye so mvoñe bôt Abraham été. (Metata’a 22:17,18) Mintet mimbu mvuse ya été, nlômane Paul a nga liti ne ngeññ na ngabe jia ya mvoñ éte é ne Messie, Yésus Krist. (Begalate 3:16) Avale fo’o kalate Metata’a 3:15 a jô, be nga lôbe Yésus étimekili éyoñ a nga wu. Ve Zambe a nga wômôlô nye. Ane Yésus “a nga nyiiban mfa’a ya nsisim.”—1 Pierre 3:18.

Zambe a nga beta fe tyi’i na ngabe fo’o ya mvoñ éte j’ aye bo bôt 144 000. (Begalate 3:29; Nlitan 14:1) B’ aye wômô a nyôle ya nsisim, be ke koone Krist Éjôé ya yôp.—Beromain 8:16,17.

Yésus, ngungule Njô ya yôp a ye wôé Diable a mvoñe jé—mbia beéngele bé bese, a bôte bese b’ atôñe Satan. (Jean 8:44; Beéphésien 6:12) Éjôé Yésus j’ aye so mvo’é a meva’a si asu bôte bese b’abo nye mewôk. Nde a mbeme fit nyo “nlô,” a va nye émo.—Behébreu 2:14.