Minsili bôte ba lañe bekalate bangan ba sili
Amu jé minkañete mi Matthieu ba Luc, a lat a atata’a ya ényiñe Yésus mia selan?
Nkañete Matthieu a lat a mam me nga boban éyoñe Yésus a nga bialé, a atata’a ya ényiñe jé, wo selane wu Luc amu na, Matthieu a nga dañe kobô ajô Joseph; Luc ki, a nga dañe kobô ajô Marie.
Nkañete Matthieu wo dañe kobô ajô mam ma fombô Joseph. Wo kañete bia jame Joseph a nga bo éyoñ a nga wô’ô na, Marie a ne abum. Wo kañete bia biyeyem a nga yem, éngele a timi’ine nye mam a lat a abume Marie, a aval a nga kañese jam ete. (Mt. 1:19-25) Matthieu a kañete avale Joseph a nga beta yeme biyeyem, éngele a jô’ô nye na, a tup, a kee nda bôte jé Égypte. Matthieu a kañete bia biyeyeme Joseph a nga yem éngele a jô’ô nye na, a bulane si jé, Israël. A kañete fe bia avale Joseph a nga bulan, a ke nyiñe Nazareth a nda bôte jé. (Mt. 2:13, 14, 19-23) Atata’a ya kalate Matthieu, éyôlé Joseph ja yené biyoñe mwom, ji Marie ki, ve biyoñe binyin (NWT).
Nkañete Luc ki, wo dañe kobô ajô ya mam ma fombô Marie. Wo kañete bia ane éngele Gabriel a nga yené be Marie, ane Marie a nga ke jom évuvumane jé Élizabeth, a bifia Marie a nga kobô na, a ve Yéhôva duma. (Lc. 1:26-56) Luc a kañete fe bia mame Simon a nga kate Marie a lat a minju’u Yésus a ye tôbane mie. To’o éyoñ a kañete dulu dap ya temple, Yésus a bili mimbu 12, Luc a kate bia jame Marie a nga jô, sa ke jame Joseph a nga jô. Luc a kañete fe na, mam mete me nga bo Marie nleme mbia mintaé. (Lc. 2:19, 34, 35, 48, 51) E bekabetôlô bebaé ba taté kalate Luc, éyôlé Marie ja yené biyoñe 12, ji Joseph ki, ve biyoñe 3 (NWT). Matthieu a dañe kañete mam me nga tyelé Joseph nleme yôp, a mam a mbe a bo’o, nté Luc nye a kañete bia mam me nga kui Marie, a aval a nga bo.
To’o avale ba lañ éndane Yésus Krist da selan. Matthieu a lañ éndane Yésus a kele tyii be Joseph, a liti fe na, Yésus, mone ntoñe Joseph, nnye a mbe a yian éli’i njô bôte David. Amu jé? Amu Joseph a mbe a so’o mvoñe bôte Njô bôte David a zene ya be Salomon, mone David. (Mt. 1:6, 16) Ve Luc a lañ éndane Yésus a kele tyii be Marie, a liti fe na, Yésus nnye a mbe a yian éli’i njô bôte David “mfa’a ya minsôn.” (Berom. 1:3) Amu jé? Amu Marie a mbe a so’o mvoñe bôte Njô bôte David a zene ya be Nathan, mone David mfe. (Lc. 3:31) Ve amu jé Luc a nji lañe Marie éndane Yésus ane ngone Héli, ésa wé? Amu, éyoñe be mbe be lañe’e bindane melu mvus, be mbe be lañe’e ve befam. Ajô ete nde, Luc a lañe Joseph ane mone Héli, nalé a kômbô’ô liti na, Joseph a mbe nnôme ngone Héli.—Lc. 3:23.
Bekalate bindane Matthieu ba Luc ba liti na, Yésus a mbe fo’o Messie minkulane mejô mi nga jô na, a ye so. Benya mejôô a lat a éndane Yésus be mbe teke aselan, aval e mbe na, to’o Bepharisien a Besadducéen be nji be ve sôô de. Den, éndane Yésus bia koone je minkañete mi Matthieu ba Luc, é ne mbôka’a ya mbunane wongan. Wo yemete fe ndi nleme bi bili bengaka’a be Yéhôva.