12 Minsôñan

JÔME NALÉ A TINAN

Nsôñan ô nji bo ve zezé biyeyem bia yem, ô ne jôm bia kômbô na é boban. Éyoñ ô bili benya minsôñan, nalé a sili na ô bi mbamba nta’ane mam, fulu ya yeme yemban, a atyeñe mboan ésaé, teke bo éles.

Bi ne bi minsôñan bia kômbô ji’a tôé (mvuse bone melu nge besondô), minsôñan bia kômbô tôé mvus ôbe mone nté (ngumba ngon), a minsôñan bia kômbô tôé mvus ayab éyoñ (ngumba mbu nge abui mimbu). Bi ne ngule ya jalé minsôñan bia kômbô tôé mvus ayab éyoñ nge bia taté a mi mi nji dañe nyoñe bia éyoñ.

AMU JÉ É NE MFI

E tôé minsôñan a ne volô wo na ô tabe ndi a womien, na ô yemete amvôé dôé, a na ô tu’a beta bi avak.

E tabe ndi a womien: Éyoñe wo ta’a bone minsôñan a jalé mie, nalé a volô wo na ô tabe ndi a womiene na ô ne tôé minsôñane mia dañ ayaé. Ô too fe ndi na ô ne dañe meve’ele wo tôbane me môs ôse ane: e bo te kañese na bôte bevo’o be tindi wo na ô bo jame womiene wo yeme na é ne abé.

Amvôé: Bôte ba nye’e be to a bôte be bili mbamba minsôñan, nge na, bôte ba yeme jôme ba yi a ba saé na be bi je. A nde fe mbamba zene ya yemete amvoé ô ne bi a môt é ne na, mia nye mi saé a nsôñane wua.

Avak: Éyoñe wo tôé minsôñan ô bili, womien wo kôme wô’ôtane na wo te bo beta jam.

“Ma nye’e éyoñ me bili minsôñan. Mia volô ma na me bi jame ya bo éyoñ ése, a na me ke ôsu a jalé nkômban éziñ. Éyoñ wo tôé nsôñan éziñ, jam ete é ne bo na ô kam a jô na: ‘Ekiéé, ma fo’o ma te bo jame ji! Ma te kui na me jalé jam ma to me kômbô’ô bo.’”​—Christopher.

ÑYE’ELANE YA BIBLE: “Nyô a fombô évuñulu a ye bo te bé; a nyô a lôbô minkut, a ye bo te kôan.”​—Ecclésiaste 11:4.

JAM Ô NE BO

Bo’o mame ma asu na ô bi a tôé minsôñane miôé.

Yemela’ane mie. Tili’i minsôñan ô ne bi, a taté a mi mia dañe mfi; tobe’e mi wo kômbô taté bo, mi mia tôé, mi milale, a ke ke.

Ta’a mie. Asu nsôñan ôse, bo’o mame ma:

• Ta’a mbamba éyoñe womien wo yeme na, ô ne mane bo jam ete.

• Ta’a mam wo yiane bo asu na ô tôé nsôñan ôte.

• Yemela’ane minju’u ô ne tôbane mie, a aval avé wo ye dañe mie.

Taté’é. Te yange na ô bi bone be mam bese asu na ô taté. Sili’i womiene na, ‘Jam avé me ne taté na ma bo asu na me jalé nsôñane wom?’ Mvuse ya valé, bo’o de. Jeñe’ na ô yen aval avé wo yaé nté wo k’ôsu a bo mone jam ase a volô wo na ô tôé nsôñan ôte.

ÑYE’ELANE YA BIBLE: “Minsôñan mi môt a saé abui mi ne mfi ô ne te k’aselan.”​—Minkana 21:5, Mfefé Nkôñelan.