Jé wo yiane bo?

50 Ye wo kômbô nyiñe nnôm éto abeñe Paradis nyô été?

Nge wo kañese,kele ôsu a ye’é mam mefe Zambe a jô. Tame ve’ele ye’é nlañane Kalate Zambe.—Jean 17:3; Nlitan 1:3

51 Kô’ôla’ane fe nyeman wôé ya be Yésus.—Deutéronome 18:18, 19; Jean 3:16; Mam minlôman 3:19-23

52 Ve’ele’e jeñe na, ô bo ve mbamba be mam a bo Yéhova mewôk.—Beromain 6:17, 18, 22

53 Simesa’ane, Yéhova a jô na, bi nji yiane wôé môt.—Nkôlan 20:13; 1 Jean 3:11, 12

54 Bi nji yiane nyoñ éza biôm teke sili.—Nkôlan 20:15; Beéphésien 4:28

55 Fam é nji yiane nyiñ nge jô’ôbô a minga mfe fo’o ve a minga wôé.—Nkôlan 20:14, 17; 1 Bethessalonicien 4:3

56 Ye wo simesan fo’o tañe binga Zambe a nga kañese na fam é bi? Fam ba minga be ayiane nyiñe nsamba nté ôvé?—Metata’a 2:22, 24; Matthieu 19:5, 6; 1 Becorinthien 7:2, 10, 11

57 Beta’a fe simesan na, bi ayiane kañe fo’o ve Yéhova étam.—Matthieu 4:10; 1 Becorinthien 8:6

58 Bengunemelan a bive’ela’a bi se ngule ya volô bia. Amu jé?—1 Becorinthien 8:4

Ye é ne mvaé na bi bi bengunemelan?—Deutéronome 27:15; 1 Jean 5:21

59 Amu jé é ne abé na bi bi biañ ayas nge belan njit?—Deutéronome 18:10-13; Nlitan 21:8

60 Mbia beéngele nge na nsamba beéngele Satan be nga tebe Zambe ngame yat. Be nga belan mvi’i na be du’u bôt.—Mam minlôman 16:16

61 Bi ayiane ye’elane Zambe. Meye’elan me atinan na, bi a laane a Zambe, a kate nye na bi akômbô bo nye ésaé a na bi ayi mvolan wôé.—Bephilippien 4:​6, 7

62 Bi ayiane bo Yésus mewôk a bi ndi​—⁠nlem be nye.​—Behébreu 5:9; Jean 3:​16

63 Simesa’ane na, a nga wu amu na a kôté bia.—Beromain 5:8

64 Simesa’ane na, Yésus ane njôé wongan ane te yené. Bi ayiane bo nye mewôk.—Bephilippien 2:​9-​11; Nlitan 19:16

65 Yésus a nga jô na, wo yiane kate bôte bevok mbamba be mam wo ye’é a na, ba be a kômbô bo Zambe ésaé be ayiane duban.—Matthieu 28:19, 20; Jean 4:​7-​15

66 Nalé fe, ô ne kañete bemvôé bôé ajô ya mbamba be mam mete.—Matthieu 10:32

67 Nge wo kôme ye’é nlañan, ô ne ye’é abui mam a wo aye fe bo ngule ya kôme ye’ele bôte bevok.—2 Timothée 2:​15

68 Yésus a nga ye’ele fe ayôma bongô na, be bo Zambe mewôk. To’o a ne a nga be abili abui ésaé, a nji kate laane a bongô.—Matthieu 19:13-15

69 Bebiaé be ayiane ye’ele bone bap éyoñ ése na, be bo Zambe mewôk a nye’e nye.—Deutéronome 6:6, 7; Minkana 6:20-22; Beéphésien 6:4

70 Menda me Zambe me ne abui, a meval meval. Abui minye’elan miap é ne te so Kalate Zambe été. Yéhova ajô na, bi kôlô minyebe mi ne te ye’ele benya mejôô.—Nlitan 18:4; Jean 4:23, 24

71 Yéhova a bili bebo b’ésaé bé si nyô, be ne ye’ele wo abui mam ma fombô nye. Ye wo yeme za be né?—Mam minlôman 15:14; Beromain 10:14, 15

72 Be ne Bengaa be Yéhova. Nwôka’ane ane zañe jap. Ye wo yeme amu jé? Amu be anye’esan.—Ésaïe 43:10-​12; Jean 13:34, 35

73 Amu be a nye’e fe Yéhova, nde be nga duban. Asu ya na be liti bôt bese na, be jô’é ya mbia ényiñ a na be a kômbô belan ényiñe jap na, be bo Zambe ésaé.—Mam minlôman 2:41

74 Bengaa be Yéhova be bili ndi nlem na, be aye nyiñ abeñ e mféfé Paradis.—Besam 37:9-11, 29

Jé nje ô ne bo na, mia bebe mi nyiñ e paradis?—Jacques 1:22, 25; 2:20-26

75 Fubu’u nsamba wop mfa’a ya ye’é bo Yéhova ésaé. Be a nye’e Yéhova ba Yésus a b’abo fe be mewôk. Ye wo fe wo nye’e be? Ye wo kômbô volô bôt bevok na be yeme Zambe?—Jean 6:45-47

76 Yéhova ba Yésus krist be a nye’e wo a be a kômbô na, ô nyiñe nnôm éto paradis.—Jean 3:16

Mam wo ate ye’é a zen ya bive’ela’a a mefoé ya nsoé kalate wu m’ate ve wo nkômban ya nyiñe nnôm éto e mevak été e si va. Nge wo kômbô kô’ôlan nyeman mfa’a ya mam mete, bi alep wo na, ô jeñe Ngaa Yéhova ya vôm ô too. Nge ke na womien ô ne fe tili , nge jeñe môt ane volô tili wo kalate na, ô lôme nye wofis Bengaa ô ne bebé a vôm ô too; avale wo yene é ne ntilan afep 2 ya nsoé kalate wu.