E Jérusalem asu Abô’ô ya Tabernacle

Yésus a nto fo’o môt be nga yem abui, nté ane a nga dubane den a nga ke ôbe mimbu. Abui betoyini Bejuif é nga yene mesimba a nga bo, a nkañete ya mam a nga bo ô nga mane yametane si éte ése. Éyoñe ji, Yésus a ne Jérusalem asu abô’ô ya Tabernacle (nge na, abô’ô ba tabe Bibem), a abui bôte da jeñe nye.

Ôsimesane bôte be bili a lat a Yésus wo selan amu abui da jô na: “A ne môte ya zôsô; bevo’o na, sa nalé, a yale bôt zene fe.” (Jean 7:12) Minkobô mite mia dañe jôban éyoñe melu m’ôsu ya abô’ô ma taté. Ve, môt éziñ a nji bi ngule ya kamane Yésus e bôt été, amu bôte bese ba ko betebe ôsu ya Bejuif mbia woñ, be teke yem avale be ne nyoñe jam ete.

Nté abô’ô da lôt, Yésus a ke temple. Abui bôt é ne fe’e ne vema amu atyeñe ñye’elane dé. Mbôl a nji tame bo sikôlô berabbinique, Bejuif ba kam a jô na: “Môte nyô a yeme kalate aya, amu a nji yé’é?”​—Jean 7:15.

Yésus a yalan a jô’ô na: “Mejô me aye’ele me nji bo mejô mam ve, mejô môt a nga lôme ma. Nge môt a kômbô bo ane a nye’e, wôna a ye yeme mam me aye’ele nge me ne mejô me Zambe, nge mejô mam.” (Jean 7:16, 17) Mejô Yésus a ye’ele ma lu’an a metiñe me Zambe; jam ete é nga yené nne ngeññ na, a nji yi na a nyoñe duma, ve a yi na duma é ke be Zambe.

Nde Yésus a jô be na: “Ye sa Moïse nye a nga ve mia Metiñ? A teke môt éziñe ya be mia a bo ane Metiñ mete ma jô. Amu jé mia jeñe na mi wôé ma?” Ékôane bôt éte, abui y’été da yiane so bitison bife, a be nji yeme jam da lôt. Asu dap, e vo’o lôte môt nlô na be jeñe na ba wôé avale ñye’ele ete. Ajô te ba su’ulane simesane na, émien a nji yiane bo mvo’é na a ve avale bifia ete be jô’ô na: “Mbia nsisim a bili wo, za a jeñe na a wôé wo?”​—Jean 7:19, 20, Mfefé Nkôñelan.

Nya ajôô a ne na, mbu wua a étun mvuse ya valé, betebe ôsu ya Bejuif be nga jeñe na be wôé Yésus amu a nga saé môt e môse Sabbat. Éyoñe ji, Yésus a belane ngule mfasan asu na a liti be na, ôsimesane wop ô nji bo mvo’é. A ba’alane na Atiñe Moïse si, be mbe be yiane tyi’i mone mona fam atyel mvuse melu mwom ja’a a ne môse Sabbat. Éyoñe te a sili be na: “Nge môt a tyi’iban atyel e môse sabbat, a nji tyam Atiñe Moïse, ve amu jé mia viane wô’ô ôlun a yaa ma amu na ma ke bo ngumba môte mvo’é e môse sabbat? Te mia tyi’i mejô e ñyenane ya mis, ve tyi’ane mejô zôsôô ntyi’an.”​—Jean 7:23, 24, Mfefé Nkôñelan.

E bôte be to Jérusalem ba kôme yeme jam da boban ba sili bebiene na: “Ye sa môte nyuna nye [betebe ôsu ya Bejuif] ba yi na be wôé? Ke mia yen ane a kobô éngengeñ, be teke nye jô jôm. Ye bejôô nlam be yemeya bebela na e nye a ne Krist?” Nde ñhe, amu jé abui bôt é nji buni na Yésus nnye a ne Krist? Ba jô na: “E môte nyô bia kôme yem e mfa’a a so; ve Krist kik, éyoñ a ye so, teke’e môt a ye yem e mfa’a a so.”​—Jean 7:25-27, Mfefé Nkôñelan.

Nde Yésus a yalane be e temple été a jô’ô na: “Ma fo’o mia yem, mi yeme fe mf’a’a ma so; ve me nji so asu dam mamien; amu môt a nga lôme ma a ne bebela, e nye mi nji yem. Ma yeme nye, amu ma so be nye, a e nye a nga lôme ma.” (Jean 7:28, 29, Mfefé Nkôñelan) Éyoñ a kobôya nalé, bôte béziñ ba jeñe na be bi nye a wua nye mimbôk, nge wôé wôé nye. Ve da, ba vo’o kui na be bo de amu awolo ya awu Yésus é ngenane te kui.

Ve da, abui da buni Yésus, a be bili mbamba beamu ya bo de. Bi ne lañe na, a nga wulu mendime yôp, a bo na ôkôs ô tebe mañ, a ve fe betoyini be bôte bidi a zene ya bone be kos a belet, a saé mimbômbôk, mindindim, minzezam, a minkôkôn mivok, a wômôlô fe mimbim. Ajô te bôte ba jô na: “Éyoñ Krist a ye so ye a ye bo beta be mam a dañe ma nyô a boya?”​—Jean 7:31.

Éyoñe Bepharisien ba wô’ô ane ékôane bôt ja kobô nalé, bebien a betebe ôsu ya beprêtre ba lôme bôte na be ke bi Yésus.