Pierre a kate Yésus e be Caïphe

Éyoñe be nga bi Yésus afube ya Gethsémané, minlômane mi nga mane tup a li’i nye étam amu be nga ko woñ. Ve da, bebaé be nga beta so. A mbe Pierre a “ñyé’é mfe,” teke bisô na a ne nlômane Jean. (Jean 18:15; 19:35; 21:24) Ba yiane su’ulane koone Yésus éyoñe ba ke nye e be Anne. Éyoñ Anne a lôme Yésus be Caïphe, Beta Prêtre, Pierre ba Jean ba tôñe nye ôyabe mvus. Éko éziñ minlem mi tyele be yôp, amu binyiñe biap, a ji Masa wop.

Mbôle Jean a yeme beta prêtre, ajô te a ne ngule ya nyiine nseñe nda Caïphe. Pierre ki a li’i fo’o a tele mbé akekui éyoñe Jean a beta ke so a sili mbo ésaé minga a ba’ale mbé na, a jô’é Pierre a nyiin.

Mbôl avep é ne alu ete, ba be ne nseñ ba te bo’é nduane nja’a. Pierre a tabe si a be asu na, a wô’ô mon ayôñ nté “a kômbô yen ane ajô te de aye su’ulan.” (Matthieu 26:58) Éyoñe ji, a zene ya éfufupe ja so nduan, mbo ésaé minga a te bo na Pierre a nyiin, a nga kôme yen asu dé. Nde a sili nye na: “Ye wo fe ô ne ñyé’é môt ate?” (Jean 18:17) Sa ke nye étam a kui na a yeme Pierre, a jô nye na a mbe a Yésus.​—Matthieu 26:69, 71-73; Marc 14:70.

Jam ete da ndeñele Pierre. A jeñe na a bo teke yené, asu na a ke. Ajô te Pierre a nji meme na a mbe a Yésus môs éziñ, a jô na: “Me ne teke yem nge wô’ô ki e jôm ébien wo jô!” (Marc 14:67, 68, Mfefé Nkôñelan) A taté fe na a “fôtan a kane mengana” asu na a liti na, a ne kañese na be yo’é nye nge na Zambe a foñesô nye nge a laane minsos.​—Matthieu 26:74, Mfefé Nkôñelan.

Nté ôse wu, ntyi’an ajô Yésus wo ke ôsu. Wo yiane boban étune nda jia é ne yôp e nda Caïphe, a be ne ngule ya yene je nseñ. Pierre a bôte bevo’o ba yange, be ne yen ane bôte ba ke ba lôte na be ke bo’olô ajô Yésus.

Pierre akusa jô meval mese na a nji yeme Yésus, tyiñe nkobô jé ja liti na a ne môte ya Galilée. A fe na, évuvumane Malkus, môt a nga tyi’i alo, é ne bôt été valé. Nde ja taté na ja kulane Pierre é jô’ô na: “Ke me ate yene mia nye afup?” Éyoñ a beta kat éyoñe lale, nde nnôm kup a loñ, fo’o ve aval Yésus a nga jô nye.​—Jean 13:38; 18:26, 27.

Éyoñ éte ébien, Yésus a tele mbé si ya nda yôp. Nde Tate a tyiñelan, a fombô Pierre e mis été, a jam ete da yiane tuli nye nlem. A beta simesane jam Yésus a nga kate nye bone mewolo mvus, éyoñe be nga mane di bidi ya Pâque. Tame simesan aval Pierre a ne wô’ôtan éyoñ a yemelan e jam a te bo! Pierre ve kui atan, a nga yôn abui.​—Luc 22:61, 62.

Aval avé a te kui na a bo jam ete? Aval avé Pierre, môt a mbe a to ndi a émien na a ye ke ôsu a wulu ba’aba’a a Yésus, a te kui na a kate Masa wé? E mame ma te nye kui, me nji volô nye na a tebe ne bip. Ba to be kôñelane minkobô mi Yésus a liti na, a ne mbia môt. A to ke na Pierre a mbe ve kamane môt ba to be bu’ ajô e zezé, a te viane lume môt a bili “mejô ya ényiñ ya melu mese” mvus.​—Jean 6:68.

Jame Pierre a te tôbane de di da liti fo’o na, éyoñe meve’ele ma kui a mam ma kui atemetem, ja’a mbo ésaé Yéhôva a wulu ba’aba’a a nye a ne ku me, nge a nji kôme kômesan. Jam Pierre a nga tôbane de é ne beta abendé asu bebo bisaé be Zambe!