Yésus a bo Messie

Jean a mbe a kañete’e, a jô’ô na: ‘Môt a dañe ma a ne zen.’ Éyoñ Yésus a nga bi bebé mimbu 30, a nga ke ôsôé ya Galilée be mbe be loone na Jourdain, vôme Jean a mbe a baptizô bôt. A mbe a yi na Jean a baptizô fe nye, ve Jean a nga jô nye na: ‘Me vo’o baptizô wo. Wo wo yiane baptizô ma.’ Ve Yésus a nga yalane nye na: ‘Yéhôva a yi na ô baptizô ma.’ Ane be nga nyiin ôsôé, Jean a duu Yésus mendim été.

Éyoñ Yésus a vameya mendim, a nga taté na a ye’elan. Awolo ete ebien, yôp é nga kandan, a nsisime Zambe ô nga sus aval ane zum. Ane tyiñe Yéhôva é nga yôtan é so’o yôbe na: “Ô ne Mone wom ma nye’e; ma yene wo mvaé.”

Yésus a nga bo Krist, nge ke Messie, éyoñ nsisime Zambe ô nga zu be nye. Éyoñ é mbe é kuiya na a taté ésaé Yéhôva a nga jô nye na a zu bo si va.

Éyoñ a dubaneya, été été Yésus a nga ke lôte melu 40 nkôte si. Éyoñ a nga bulan, a nga zu yene Jean. Nté a mbe a za’a nye ôsu, Jean a nga jô na: ‘Nyina a ne Mone Ntômba Zambe a vaa abé ya si nyô.’ Jean a nga kate de bôt asu na be yeme na Yésus nnye a ne Messie. Ye wo yeme jam é nga kui Yésus éyoñ a mbe nkôte si? Bi tame zu yen.