Kalate Tin Ékôan

A mia mia nye’e Yéhôva Zambe a Bible nnye a ne Mejô mé:

Yésus a nga jô na: “Mi aye yeme benya mejôô, a benya mejôô me aye [ve mia éto fili].” (Jean 8:32) Tame simesane abime mevak ô nga wôk éyoñ ôsu ô nga wô’ô benya mejôô ya Bible! Ô mbe njalan a mevak amu ô nga yeme na, to’o wo nyiñ émo é ne njalan a minsose ji, ô ne yeme benya mejôô.​—2 Timothée 3:1.

Yéhôva Zambe a yi na bi yeme benya mejôô. Mbôle bia nye’e bôt, jôm éte nje bia kômbô kate be benya mejôô. Ve bi nji yiane yeme ve benya mejôô étam. Bia yiane fe ve ngule jangan ése na bi nyiñ ane Bekristen, amu bia semé miñye’elane mi Yéhôva nya nsemane. Yésus a nga liti bia beta zene ya liti Zambe na, bia nye’e nye. A nga jô na: “Nge mia ba’ale metiñ mam, mia ye tabe nye’ane wom été, aval ane mamien me nga ba’ale metiñe m’Ésaa wom, a me too e nye’ane wé été.”​—Jean 15:10.

Yésus a mbe a nye’e Ésa édo’o nye’an, jôm éte nje a nga bo mame mese Ésa a nga jô nye na a bo. Nge bia vu Yésus, Yéhôva a ye nye’e bia, nalé a ye ve bia benya meva’a. Yésus émien a nga jô na, “Nge mi ayeme mam ma, ébotan a mia nge mi abo me.”​—Jean 13:17.

Bi too ndi na Kalate nyi a ye volô wo na, ô jô’é benya mejôô ya Bible be liti wo zen, nalé a ye bo na, ô bo mvôé Zambe. Bia ye’elan éyoñ ése na, nye’an wo nye’e Zambe ô yaé, a na ô ba’ale’e womien “nye’ane Zambe été . . . akekui ényiñ ya melu mese.”​—Jude 21.