BO’O BÔTE BEYÉ’É
AYÉ’É 11
Ye’ele’e aval é ne tyi’ibi ya wôk
Ñye’elan: “Nge mia . . . belane bifia bi nji bo tyi’ibi ya wôk, aval avé môt a wôk, a ne yeme jame mia jô?”—1 Cor. 14:9.
Jame Yésus a nga bo
1. Yene’e VIDÉO, nge ke na lañe’e Matthieu 6:25-27. Mvuse ya valé fase’e minsili mi:
Aval avé Yésus a nga liti na Yéhôva a nyoñe bia ngap?
Yésus a mbe a yeme’e abui mam a lat a anon. Ve akusa bo nalé, amu jé a nga bem ôsimesane wé mone jam éziñ a tii a de? Amu jé fatane mboon éte é mbe mvo’é?
Éve’ela Yésus ja ye’ele bia jé?
2. Nge bia ye’ele bôt aval é ne tyi’ibi ya wôk, nalé a ye bo na, be bo teke vuane mame bi nga ye’ele be, bia ye fe nambe be minlem.
Bo’o ane Yésus
3. Te dañe kobô. Te mane kate mame mese wo yem a lat a nlô ajô mia yé’é, beme’e ôsimesane wôé e mame me ne kalate wo belane nye asu ayé’é. Éyoñ ô siliya nsili, yange’e na môt a ve éyalan. Nge a nji yem éyalane nge ke na, a te ve évus éyalan, sili’i nye minsili mife mia ye volô nye na a tu’a wô’ô jame mia yé’é. Éyoñ a kômeya wô’ô ngap éziñ, kele’e ngabe fok.
4. Bela’ane mame môte mia nye mia yé’é a yem, asu na ô ye’ele nye mimfefé mi mam. Éve’an é ne na, ôsusua na wo taté ayé’é da kobô ajô ñwômane miñwuan, ô ne taté bo mone mba’alane ya mame môt a yem a lat a été bewu.
5. Yeme’e belane bive’an. Ôsusua na wo belan éve’an éziñ, sili’i womiene na:
‘Ye éve’ane ji é ne tyi’ibi?’
‘Ye môte bia nye bia yé’é a ye ji’a wô’ô je?’
‘Ye éve’ane ji ja ye volô môte bia nye bia yé’é na a bo teke ba’ale fo’o ve éve’an, ve na a dañe ba’ale beta nlô ajô ya jam a te yé’é?’