Mvo’é, nne ô ne yene je aya?

AMU bia nyiñ émo e ne jo’ojo’o, jôm ete nje bia yiane jeñ a ngule jangan ése na, mvo’é e bo. To’o bi bili abime mvo’é éziñ, da kui na bi saé a ngul jangan ése na, bi ba’ale je. Jé nje Kalate Zambe a jô, e ne volô bia na bi bi nya mvo’é a na, mvo’é éte e tabe ayap. Bi ne volô bôte bevo’o aya na, be fe be bo nalé?

JÉ JA SILI NA BI BI NYA MVO’É?

Bi ne bi nya mvo’é fo’o ve éyoñe biabebien bia wô’ôtan na, nleme wongan ô bôô si ne mieññ. Bia yiane fe jeñe na bi bo amvôé a bôte bevok. Jame da dañe mfi e ne na, bi bo beta amvôé a Zambe. Nne bi ne bo de aya?

Éyoñe bia wulu avale miñye’elan a metiñe me Yéhôva ma jô, bia liti na bi too nye nya ndii, a na bia kômbô bo amvôé a nye. (Jr. 17:7, 8; Jc. 2:22, 23) Nye fe a subu bia bebé, a bo na nleme wongan fe ô bômbô si ne mieññ. Ésaïe 32:17 a jô na: “A ésaé zôsô a bo j’aye bo na, mvo’é; a jôme zôsô a ve e ne na, évôvoé a mbamba mebun nlem nnôm éto.” Nleme wongan ô ne bômbô si ne mieññ nge bia bo Yéhôva mewôk a nleme wongan ôse.​—És. 48:18, 19.

Mbamba nsisim, a ne fe beta mvean ésa wongane ya yôp été a ve bia asu ya na, mvo’é jangan e libi.​—Mam. 9:31.

MBAMBA NSISIME ZAMBE A VÔLÔ BIA NA, BI BI FULU MVO’É

Nlômane Paul ô nga liti na, mvo’é é ne fulu lale ya “ébuma ya mbamba nsisim.” (Beg. 5:22, 23) Mbôle nya mvo’é a ne ésaé mbamba nsisim a bo be bia, nde bia yiane jô’é na ngule ya mbamba nsisim é vôlô bia na, bi bi je. Bi tame zu yene zen ébaé nsisime Zambe ô ne volô bia na, bi bi mvo’é.

Jam ôsu, nsisim Zambe wo volô bia na, bi bi mvo’é éyoñe bia lañe Bible môs ôse. (Bs. 1:2, 3) Éyoñe bia bindi mame Kalate Zambe a jô, nsisime Zambe wo volô bia na bi wôk ôsimesane Zambe mfa’a ya abui mam. Bia yen ane émien a tabe ne mieññ, a amu jé mvo’é é ne nya mfii asu dé émien. Éyoñe bia wulu avale miñye’elane ya Kalate Zambe mia jô, biabebien bia yen ane mvo’é ja yené binyiñe biangan.​—Min. 3:1, 2.

Jame baa, bia yiane ye’elane Zambe na, a ve bia mbamba nsisim. (Luc 11:13) Yéhôva a nga jô bia na, nge bia jeñe mvolane wé, ‘mvo’é Zambe, nje éte je adañe fe’e jangan ése, je aye ba’ale minleme miangan a asimesane dangan be Christ Yésus.’ (Beph. 4:6, 7) Éyoñe bia tabe nsisime Zambe mebun, Zambe wongan a jalé minleme miangan a mvo’é, nje éte é ne jôm a ve, môt ase a ne mvôé jé.​—Bero. 15:13.

Aval avé bôte béziñ be nga wulu avale melep ma, ma jô? Mintyendane mivé be nga bo asu ya na, be tabe mvo’é a bebien, a Yéhôva, a bôte bevok?

AVAL BE NGA YENE MVO’É JA LIBI

Abui Bekristene ya melu ma, é mbe ‘bôte meyaa;’ ve éyoñe ji, be nga taté fas ôsusua na nyili a bo jam éziñ, be ntoo mbamba minlem, ôjibi, a évôvoé a bôte bevok.a (Min. 29:22) Nalé a nga yené be Bekristene bebaé; mbe bete be nga volô na, be yé’é sili minleme miap si, a nyiñe mvo’é a bôte bevok.

Mbia mefulu David a mbe a bili, me nga yené fe fatane nkobô jé. Ôsusua na a ve ényiñe jé ngumba be Yéhôva, a mbe a kobô’ô bôte ya nda bôte jé ébaé é fane asôñ, a va’a fe mam mese ve abé abé. Ve môs éziñ, David émien a nga yene na, a yiane tyendé, a nyiñe mvo’é a bôte bevok. Aval avé a nga yé’é sili nleme wé si? A jô na: “Me nga taté na, ma tôñe miñye’elane ya Kalate Zambe ényiñe jam, nde bôte ya nda bôte jam, be nga taté na ba semé ma.”

Vôme Rachel a nga yaé, a nga yalé mbia mefulu mé. Émien a meme na: “to’o éyoñe ji, me ngenan me wosa’ane fulu ayaa, amu me nga yaé nda bôte bôte ba yaa tyi’ibi.” Jé é nga volô nye na a sili nleme wé si? A yalane na: “ma ye’elane Yéhôva éyoñ ése.”

David ba Rachel ba kôme fo’o liti bia mba be mam mvo’é ja bo, éyoñe bia tôñe miñye’elane ya Kalate Zambe, a éyoñe bia tabe ndi na, nsisime Zambe wo ye volô bia. Akusa fo’o bo na, bia nyiñe mbia émo nyi, mvo’é é ne bia minleme miangan été, ja bo na ñwôka’ane a bo menda me bôte mangan, a zañe bebo bisaé be Yéhôva bevok. Yéhôva émien a jô bia na “taba’ane bôte bese mvo’é.” (Bero. 12:18) Ye jam ete é ne fo’o boban? Bibotane bivé bia bi amu bia jeñ a ngul ése na bi tabe mvo’é a bôte bese?

JEÑE’ MVO’É A BÔTE BEVOK

A zene ya ésaé nkañete, bia loene bôte be zu bu’uban mbamba foé wongan ya mvo’é, foé ya Éjôé Zambe. (És. 9:6, 7; Mt. 24:14) Mbamba jam a ne na, abui bôt da kañese fôé éte. Jôm ete nje, akusa bo na bôte meyaa, a ba ba simesane na be ne zézé biôm, ba bômane be, bôte ba nye’e mejô me Zambe, be nji fe kômbô beta bo mam ane be. Be mbili nya ndi nleme mfa’a ya melu ma zu, a nalé a tindi be na “be jeñe mvo’é a tôñe je.”​—Bs. 34:14.

Ve sa ke bôte bese ba wô’ô foé jangan, mbe ba kañese je été été. (Jean 3:19) Ve to’o nalé, mbamba nsisim Zambe a volô bia na, bi kañete be mejô me Zambe a ésemé a mbamba nlem. Bia tôñe melebe Yésus a nga ve bia Matthieu 10:11-13 asu ésaé nkañete, a nga jô na: “éyoñ mi anyi nda, bata’ane bôte ya été. Nge bôte ya nda éte be aye mvamane mia, wôna mvo’é jenan je aye tabe été: nge bôte ya nda éte be aye bo te mvamane mia, wôna mvo’é jenan je aye bulane be mia.” Éyoñe bia tôñe melebe me Yésus, bi ne kôlô nda éziñ teke bi metyama’ane, a nalé a ye volô na, môs ôfe, bi ne beta zu kañete bôte ya été.

Bia jeñe fe mvo’é a bôte bevok, éyoñe bia semé bôte ya éjôé, to’o ba ba wosane ésaé nkañete jangan. Môs éziñ, ôbangam ô nga tindi éjôé ya si éziñe ya Afrika va na, é bene ve bia ôva’a ngule ya lôñe Aba Éjôé. Mfa’a ya jeñe zene ya kôm ajô ete évôvoé été, nde bi nga lôme mojañ éziñe a mbe nnôme missionnaire si ya Afrika éte na, a ke yene Haut-commissaire ya si éte e Londres, Angleterre. A mbe a yiane ke kate nye mbamba ésaé Bengaa be Yéhôva ba bo si jé. Nde njoman ôte ô nga volô jé?

Éyoñe me nga kui reception, nde me nga yene môt a saé vôme ate, a be’e biyé ane bôte ya nkobô me nga yé’é wôé. Ane me nga batan nye nkobô wé. Nde a nga si’an, a sili ma na: ‘amu jé wo te zu yene bia?’ Me nga kate nye a mbamba nleme na, ma kômbô yene Haut-commissaire. Éyoñ a nga loene nye telephone; ane a nga so, a batane ma nkobô wé. Mvuse ya valé, nde a nga nyoñ éyoñe ya kôme vô’ôlô ma; ane ma kañete nye mbamba ésaé Bengaa be Yéhôva ba bo.”

Nkañete mojañ, ô nga bo na mbia éyôlé Bengaa be Yéhôva be nga bili nleme be môt ate été, a bo ane a se’eban. Mvuse mone nté, éjôé ya si éte é nga kañese na, bi lôñe Aba Éjôé. Bobejañe be mbe mevak amu jam ete é nga mane mvo’é! É ne fo’o été na, ésemé ja soo mbamba be mam, aval ane mvo’é.

NYIÑI MVO’É ÉTÉ NNÔM ÉTO

Melu ma, bebo bisaé be Yéhôva ba bu’ubane a paradis ya nsisim a ne njalane a mvo’é. Môt ase ya be bia, a ne bo na mvo’é éte e tu’a nen, nge a saé mfa’a ya na, fulu éte e yené ényiñe jé. Jame da dañe mfi é ne na, Yéhôva a ye yene bia mvaé, a bia ye bi abui mvo’é éyoñe ji, a bia ye fe bi je nnôm éto mfefé émo.​—2 P. 3:13, 14.