Melep asu na ô taté minlañ a zene ya betract

Ataté Ngon ôsu ya mbu 2018, afep ôsu ya Kalate bisulan asu Ényiñe Kristen a ésaé nkañete jangan da taté a bive’ela ya tôñ asu ésaé nkañete. Ôlô ô ne mewôk a fek ô nga liti bia mfi ya dañe laan a bôt, sa ke ve e ve be bekalate ya lañ. Asu na bi bo de, be nga kômesane bevidéo ba liti bia avale bi ne laan a bôte bi bela’ane ve Bible. Ve ye nalé a tinane na, bi nji yiane beta belane bekalate éyoñe bia kañete menda menda? Momo! Betract be ne bo mbamba zene ya taté minlañ. Nge wo kômbô belane tract wua ya ba bi bili, ô ne bo aya?

1. Sili’i môte nsili ô ne atata’a ya tract.

2. Liti’i nye éyalane Kalate Zambe a ve, wo ye koone je atata’a ya afebe baa. Nge môt ate a bili éyoñ, mi ne lañe mebeñe ya tract, a laan ajô ya été.

3. Va’a nye tract, jô’ô nye na a li’i a mane lañe nye éyoñ a ye bi éyoñ.

4. Ôsusua na mia kandan, liti’i nye nsili ô ne vôm a ne ntilane na “Fasek,” kate’e nye na éyoñ évok, mi aye yen avale Kalate Zambe a yalan nsili ôte.

Éyoñe wo ye ke bo njoman, yala’an nsili mi nga li’ ô bôô, mvuse ya valé li’i nsili ôfe ô bôô. Ô ne tobe nsili wua anjeñe mefoé dangan, nge ke kalate a yené mvuse tract. Mbamba éyoñ, va’a nye nsoé kalate Mbamba mefoé m’aso be Zambe! nge ke kalate wua ya Bikpwelé bia ye’ele bie bôt.