Tôñe’e “atiñe ya mvam”

SITA a too jôé na Lisaa a nga jô na: “Jam e nga dañe me nambe e mbe fulu mvam bobejañ a besita be nga liti.” A mbe a kobô’ô ajô ya jam e nga taté ve nye nkômbane ya yem benya mejôô. Jam ete nde fe e nga nambe Anne. A nga jô na: “Jam e nga dañe me nambe e mbe avale be nga nyoñe ma, sa ke mam be mbe be ye’ele’e.” Den, besita bete bebaé ba nye’e be lañe’e a bindi Kalate Zambe, ve mvam be nga liti be é nga nambe be angôndô ya abui.

Aval avé bi ne liti fulu mvam asu na bi ve bôte bevo’o ngule nyul? Bia zu yene mam mebaé bi ne bo: mam bia jô, a mam bia bo. Mvuse ya valé, bii yene beza bia yiane liti fulu mvam.

FUTI’I “ATIÑE YA MVAM” ÔYEME WÔÉ

Minkana kabetôlô 31 a jô na éwôlô minga é bili “atiñe ya mvam” ôyeme wé. (Min. 31:26) A jô’é na “atiñ” ete e wulu mam a jô a aval a jô me. Beésaa fe ba yiane tôñ “atiñ” ete éyoñe ba kobô. Abui bebiaé da yeme na éyoñe ba belane mbia bifia, nalé a ne ndeñele bon bap, a bo na be bo te tôñe melebe ba ve be. Éyoñe bebiaé ba belane mbamba bifia, nalé é dañe bo tyi’ibi asu bon bap na be bo be mewôk, a vô’ôlô be.

To’o ô ne mbiaé nge momo, aval avé ô ne liti fulu mvam éyoñe wo kobô? Ngab ôsu ya Minkana 31:26 a jô na: “A kui anyu dé a ñyemane mam.” Nalé a tinane na bia yiane kôme tobe bifia bia belane bie, a tyiñe nkobô ja yian. E ne mfi na ô sili womien na: ‘Ye mam ma zu jô mé bo na môt a vô’ôlô ma a wô’ô ôlun nge ke na nlem ô bômbô nye si?’ (Min. 15:1) Ôwé, e ne fo’o mfi na bi taté fas ôsusua na bia kobô.

Éfus éfe ya kalate Minkana ja jô na môt a ne kobô teke fas, “aval ane minlumane mi nkpwaté mekôn.” (Min. 12:18) Éyoñe bia simesan aval avé bôte bevo’o bé wô’ôtan éyoñe ba wô’ô mam bia jô a avale bia jô me, nalé é volô bia na bi yeme jôé ôyeme wongan. Ôwé, éyoñe bia tôñ “atiñe ya mvam,” bia belane ki bifia bia taé bôt nlem, nge ke kobô avale da yiane ki. (Beép. 4:31, 32) Bii fole mbia b’asimesan a mbia minkobô a bifia bia ve ngule nyul. Yéhôva a nga liti mbamba éve’ela mfa’a ôte éyoñ a nga bôône mbo ésaé wé Élie nleme si. Éngele Yéhôva a nga kobô nye a “ôyôme tyiñe ne mieññ.” (1 Bb. 19:12) Ve, e bo mvam a su’u ki ve mbamba bifia bia belane bie. Bia yiane fe de liti a mimboon. Aval avé?

MVAM JA YENÉ MIMBOON JA VE NGULE NYUL

Bia vu Yéhôva éyoñe bia liti fulu mvam a zene ya mam bia jô, a mimboone miangan. (Beép. 4:32; 5:1, 2) Lisa bia te jôô nye yôp, a liti aval avé Bengaa be nga mvamane nye: “Éyoñe nda bôte jangan é nga yiane kôlô nda bi mbe bi too avôl avôl, bobejañ bebaé ya akônda a binga bap be nga nyoñ éyoñe na be zu bia volô ta’a biôm. Me mbe me ngenan teke taté na ma yé’é Bible éyoñ éte.” Mam a nga yen me nga volô Lisa na a tu’a kôme fas ajô ya benya mejôô.

Anne bia te jôô nye atata’a, a nga nye’e fe fulu mvam Bengaa be nga liti. A jô na: “Mam ma boban émo ji me nga bo na me bo teke tabe ndi a bôte bevok. Éyoñe me nga yene Bengaa be Yéhôva, me nga taté tabe ntyel a be. Me nga sili mamien na, ‘Amu jé ba nyoñe ngap a ma?’ Ve ñye’ele Bible wom a nga liti ma nya mvame, nalé a bo na me tabe ndi a nye.” Nde, mbamba jam mbé a nga kui? “Mvuse ya valé, me nga taté na ma kôme bem ôsimesane wom mam me mbe me yé’é.”

Bia yene valé na jam e nga dañe nambe Lisa ba Anne e mbe mvam bobejañ a besita be nga liti be akônda, a nalé a nga ve be nkômbane ya yeme benya mejôô. Mvam akônda e nga liti be é nga volô be na be taté na ba tabe ndi a Yéhôva a bebo bisaé bé.

VA’A NGULE YA LITI FULU MVAM JA SO BE ZAMBE

E ne tyi’ibi asu bôte béziñ na be belane mbamba bifia nge ke na be muñ amu nne be nga yale be nalé. Bi ne fo’o se’e bôte be ne ôsesa a ba yeme nyoñe bôt amu nne be nga bialé nalé, nge ke na nne be nga yale be nalé. Ve nge a ne fo’o fe mam mete mme ma bo na bi liti fulu mvam, nalé a liti ki na bi bili mvam ja so be Zambe.​—Fombô’ô fe Mam. 28:2.

Nya mvame a ne ngabe jia ya ébuma ya nsisim. (Beg. 5:22, 23) Ajô te, da sili mbamba nsisim asu na a ve bia nkômbane ya liti nya fulu mvame. Éyoñe bia bo de, nalé a liti na bi bili nkômbane ya vu Yéhôva ba Yésus. Nde fe, mbôle bi ne Bekristen, bia kôme nyoñe ngab a bôte bevok. Ajô te, bia bo mbamba be mam amu bia nye’e Yéhôva Zambe, a amu bia nye’e bôte bevok. Éyoñe te fulu mvam ja ye bo beta fulu ja so bia nlem été, nyi Zambe a yene mvaé.

BEZA BIA YIANE LITI FULU MVAM?

Bia yene tyi’ibi ya bo mvam a bôte ba mvamane bia, nge ke bôte bia yem. (2 Sa. 2:6) Jame da bi ne bo e na bi ve be akiba. (Beco. 3:15) Ve jé bi ne bo nge bia simesane na môt éziñ a yiane ki na bi mvamane nye?

Tame fase jame di: Yéhôva nnye a ne mbamba éve’ela a dañ mfa’a ya liti fulu mvam, a Kalate wé a liti bia aval avé bi ne vu nye. Bia koon éfia “mvam” abui biyoñ mintilane ya nkobô Grec. Aval avé Zambe a liti fulu mvam?

Tame simesane bemillion be bôte Yéhôva a mvamane be den a nto abui mimbu, a va’a be mam ma sili asu na be nyiñ. (Mt. 5:45) Nya ajôô a ne na, a nga liti bia fulu mvam éte ôsusua na bia yeme nye. (Beép. 2:4, 5, 8) Éve’an é ne na, a nga ve bon be bôt jam e mbe nye nya édima, atyi’i Mon dé. Nlômane Paul ô nga jô na Yéhôva a nga ve bia ntañ amu “abui mame ya mvame jé.” (Beép. 1:7) Nde fe na, akusa bo bi wô’ô sem a ve nye nlem mintaé, a ke ôsu a lebe bia a ye’ele bia. Memvinda mé a bifia a belane bie bi ne ane “éfôp.” (Dt. 32:2) Teke môs éziñ bi ne kui na bi bulane nye mvam ése a liti bia. Nya ajôô a ne na, nge Yéhôva a teke liti bia mvame jé, bi vo’o bi ndi nlem éziñ asu melu ma zu.​—Fombô’ô fe 1 Pierre 1:13.

Teke bisô na bia nye’e mvame Yéhôva, a ja ve bia ngule nyul. Ajô te, a lôte na bi fiale bôte bii mvamane be, bia yiane vu Yéhôva a bo na fulu mvam é yené mimboone miangan môs ane môs. (1 Bet. 5:15) Éyoñe bi ne mban ya liti fulu mvam, bii bo ane nduan ja ve bôt ayôñ môs avep e né. Bii ve bôte bevo’o ngule nyul, nda bôte jangan, bobejañ a besita ya akônda, nda bisaé, bongô be sikôlô bevok, a bôte bia be be bi too vôme wua.

Simesa’ane bibu’a ya nda bôte jôé nge ke bi ya akônda dôé bi ne bu’ubane mbamba bifia a mbamba mimboone miôé. Ébu’a éziñ ya akônda dôé é ne yi mvolan asu na é nyoñe ngap a nda jé nge ke afube dé. É ne fe yi mvolan asu mboone mam méziñ ane makit. Nde fe, éyoñ ô ne ésaé nkañete éyoñe te wo tôbane môt a yi mvolan, ye ô ne bo jam éziñ e ne volô nye?

Ngo’o nge bia vu Yéhôva, a bo na “atiñe ya mvam” e wulu mam bia jô a mam bia bo.