E tu’a kabetane bôte bevok a ne jam é ne mvo’é asu dangan!

1-2. Jé ja dañe mfi mise me Yéhôva, a jé a yi na bi bo?

AVALE bia nyoñe bôte bevok é ne nya mfii mise me Yéhôva. Yésus a nga ye’ele bia na bia yiane nye’e bôte bevok avale bia nye’e biabebien. (Matt. 22:​37-39) Nalé a tinane na bia yiane fe nye’e ja’a ba ba kañe ki Yéhôva. Éyoñe bia bo nalé, bia vu Yéhôva, nnye ate “a bo na vian ô faé asu mbia be bôt a asu mbamba be bôt. A bo fe na mveñ é noñ asu bôte be ne zôsô a ba be ne bikotekot.”—Matt. 5:45.

² É ne été na Yéhôva a nye’e bôte bese, ve a dañe liti nye’ane wé be ba ba kañe nye. (Jean 14:21) A yi na bi vu nye. Ajô te a jô bia na bi bi “nya nye’ane” asu bobejañ a bekale bangan a liti be nye’an ôte aval “ane bobenyañe ya abume da ba nye’esan.” (1 P. 4:8; Rom. 12:10) Nye’an ôte ô ne ane wu ô ne zañe bibu’a ya nda bôt a zañe bemvôé.

3. Jé bia yiane ba’ale a lat a nye’an?

³ Bi ne ve’e nye’an aval ane same bia bé fefele nda. Asu na é yaé, bia yiane je sôé mendim éyoñ ése. Nlômane Paul ô nga lebe bekristene na: “Kelané ôsu a wô’ane mintaé ane bibu’a ya nda bôte jia.” (Héb. 13:1) Yéhôva fe a yi na bi ke ôsu a bi avale nye’an éte asu bôte bevok. Ayé’é di bia zu yen avale bi ne tu’a kabetane bobejañe bangane ya nsisim, a aval avé bi ne ke ôsu a bo jam éte.

AMU JÉ BIA YIANE TU’A KABETANE BOBEJAÑ?

4. Avale kalate Besam 133:1 a liti, aval avé bi ne ke ôsu a liti na bia nyan élat é ne zañe bobejañ a bekale bangan? (Fombô’ô fe befôtô.)

⁴ Lañe’e Besam 133:1. Bi ne tyiñe jia a ntili Besam vôm a nga jô na amvôé é ne zañe bôte ba nye’e Yéhôva é ne “mvo’é” a “mvaé.” Ve aval ane môt a beta ke vembe a beta élé a yene môs ôse, aval éte fe bi ne taté na bia yene beta élat a ne zañe bia be bobejañ a bekale bangan ane jôm é nji beta bo mvo’é a mvaé. Bia yene bobejañ a bekale bangan éko éziñ abui biyoñ e sondô. Nde ñhe, aval avé bi ne ke ôsu a liti na bia nye’e be? Nye’ane bia nye’e bobejañ a bekale bangane wo ye ke ôsu a yaé, nge bia nyoñ éyoñe ya fas abim avé môt ase ya be be a ne mfi ékôane bekristen été a asu dangane biabebien.

5. Nye’ane bôte bevo’o ba yene zañe jangan ô ne tindi be na be bo jé?

⁵ Bôte béziñe ba tabe bisulane biangan éyoñ ôsu, be wô’ô bo fe’e ne vema éyoñe ba yene nye’an ô ne zañe jangan. Fo’o ve a jam éte étam, be ne jô na be yeneya nya zene. Yésus a nga jô na: “A zene nyi, bôte bese ba ye yeme na mi ne beyé’é bam, nge mi bili nye’an e zañe jenan.” (Jean 13:35) Bi tame yen éve’ela Chaithra a mbe a yé’é a Bengaa be Yéhôva. A nga kañese mbañete be nga ve nye na a ke tabe beta étôkan. Éyoñe a tabeya môs ôsu, a nga jô môt a mbe a ye’ele’e nye Kalate Zambe na: “Bebiaé bam be ngenane teke wubane ma môs éziñ. Ve éyoñe me nga zu tabe beta étôkane wônan, fo’o ve môse wua, bôte 52 be nga zu wubane ma! Ma simesane na Yéhôva a nga belane bôte bete asu na me wô’ôtane nye’ane wé. Ma fe ma kômbô bo ébu’a jia ya nda bôt éte.” Chaithra a nga ôsu a yaé nsisim akekui a nga nyoñe mbaptizô mbu 2024. Ôwé, éyoñe bôte ba yé’é Kalate Zambe ba zu tabe ésulan éyoñ ôsu, ba yene mbamba ésaé bia bo a nye’ane bia liti zañe jangan, jam éte é wô’ô tindi be na be zu kañe Yéhôva.—Matt. 5:16.

6. Amu jé bi ne jô na e kabetane bobejañ a bekale bangan a ne jam é ne kamane bia?

⁶ E tu’a kabetane bobejañ a bekale bangan a ne bo zen é ne volô bi na bi ke ôsu a ba’ale élate jangan a Yéhôva. Paul a nga jô bekristene na: “Ve kelané ôsu a veané ngule nyule môs ôse . . . ndembene môt éziñe ya be mia a bo teke bi nlem ô ne ayet a zene ya ngule medu’ane ya nsem.” (Héb. 3:13) Nge ate’e da bi bia aval é ne na bi nga kate bo mame me ne zôsô, Yéhôva a ne kui na a belane mojañ éziñ asu na a yemelan été jangan a na a ve fe bia mvolane wo sili. (Bsa. 73:​2, 17, 23) Avale mvolane nlem éte é ne jam é ne mfi asu dangan.

7. Nja ôvé ô ne zañe nye’ane bia nye’e bobejañ a bekal a élat é ne zañe jangan? (Becolossien 3:​13, 14)

⁷ Bi ne nsamba bôte wo saé a ngul ése asu na ô liti nye’ane zañe jap a jam éte da soo bia abui bibotan. (1 Jean 4:11) Biyoñe biziñe nye’ane wo tindi bia na bi “ke ôsu a jibi bôte bevok, wua a jibi’i nyu mbok,” a nalé a bo na élat é ne zañe jangan é tu’a bo ngul. (Lañe’e Becolossien 3:​13, 14; Éphé. 4:​2-6) A fe na, éyoñe bi ne ésulan, bia kôme lôte mbamba éyoñ a bobejañ a bekale bangan e mvo’é été, sa ke ane bikôane ya émo vôme mômane me ne éyoñ ése.

LITA’ANÉ ÉSEMÉ E ZAÑE JENAN

8. Jé Yéhôva a bo asu na a volô bia na bi ba’ale élate jangan?

⁸ Élat é ne zañe bebo bisaé be Yéhôva ya si ése é ne ve amu ngule Yéhôva. A kôme bo na bi bo nlatan akusa bo bi be’e metyi ya abé. (1 Cor. 12: 24,25) Kalate Zambe a jô na: “Zambe a maneya ye’ele mia na mia yiane nye’esan.” (1 Thes. 4:9) Nalé a tinane na, Yéhôva a belane Kalate Zambe wé asu na a kate bia jame bia yiane bo asu na bi tu’a bo nlatan. Bi ne bo bôte “Zambe a maneya ye’ele” éyoñe bia kôme nyoñ éyoñe ya yé’é mejô mé a tôñe me binyiñe biangan. (Héb. 4:12; Jacq. 1:25) A ne fo’o jame Bengaa be Yéhôva ba jeñ a ngul ése na be bo.

9. Jé kalate Beromain 12:​9-13 a ye’ele bia mfa’a ya liti ésemé zañe jangan?

⁹ Aval avé miñye’elane ya Kalate Zambe mi ne volô bia na bi tu’a kabetane bôte bevok? Bi tame yeme jôme Paul a nga jô a lat a jam éte Beromain 12:​9-13. (Lañe’e.) E dañedañe vôm a jô na “mfa’a ya na môt ase a liti nyu mbok ésemé, bo’ané bôte be ôsu.” Nalé a tinan aya? Bia yiane bo bôte be ôsu ba liti bôte bevo’o nye’an “ane bobenyañe ya abume da ba nye’esan” aval ane e jamé a nlem ôse, e yeme nyoñe ngap a be a bo anyep akeke. (Éphé. 4:32) Bi nji yiane yange na bobejañ a besita mbe be subu bia bebé. Bia bia yiane bo “bôte be ôsu” ba bo jam éte. Amu Yésus a nga jô na: “Meva’a me ne abui be môt a ve, a lôte nyi a nyoñ.”—Mame mi. 20:35.

10. Aval avé bi ne kôme “liti bôte bevok ésemé”? (Fombô’ô fe fôtô.)

¹⁰ Jame ya semé é ne na, nné ane a nga mane jô na bia yiane bo bôte be ôsu mfa’a ya liti bôte bevok ésemé, Paul a beta bia jô na bia yiane “bo biwôlô sa ke minleles.” Môt a ne éwôlô a ne môt a ne ayôñ a saék fe a ngul ése. Éyoñe ba ve avale môt éte ésaé ya bo, a bo je a nleme wé ôse. Minkana 3:​27, 28 a jô bia na: “Te kame mvaé be ba ba yiane yene je, éyoñe ngule ya bo je é ne wo wo.” Ajô te éyoñe bia yene môt a yi mvolan, bia bo mame mese asu na bi volô nye. Bia jañele ke éyoñe nge simesane na môte mfe a ye nye volô.—1 Jean 3:​17, 18.

11. Jé é ne volô bia na bi tu’a kabetane bôte bevok?

¹¹ Zene fe é ne bia volô na bi liti bôte bevok ésemé é ne na bi bo avôle ya jamé éyoñe ba te bia bo jam é ne abé. Beéphésien 4:26 a jô na: “Te mia jô’é na nlô jôbô a ke dim nté mi ngenane mi wô’ô ôlun.” Amu jé? Amu éfuse 27 ja jô na bi za ‘ve Diable afôla.’ A zene ya mejô mete, Yéhôva a beta bia ba’alane na bia yiane jamé bôte bevok. Becolossien 3:13 a jô bia na bi ‘ke ôsu a jamé bôte bevok a nlem ôse.’ E bi fulu ya jamé bikobe bi bôte bevok a ne mbamba zen a volô bia na bi tu’a kabetane be. Nge bi bo nalé, bia ye ‘ba’ale élate jangane ya mvo’é, nje éte nsisime Zambe ô nga volô bia na bi bi.’ (Éphé. 4:3) Da kôme yené ne fômelé na éyoñe bia jamé bôte bevok, bia bo na ékôane Yéhôva é bo nlatan a mvo’é.

12. Aval avé Yéhôva a volô bia na bi yeme jamé?

¹² Bia yeme na é nji bo tyi’ibi ya jamé môt a te bia bo jam é ne abé. Ve bi ne kui na bi bo de a zene ya mvolane mfufube nsisime Zambe. Éyoñ a maneya jô bia na bi “nye’e bôte bevok ane bobenyañe ya abume da” a na bi “bo biwôlô,” Kalate Zambe a jô bia na: “Jôka’ané na mfufube nsisim a bo na mi bo ayôñ.” Môt a ne “ayôñ” a ne “avale môte da bo mam a nleme wé ôse a jô’é fe na ngule ya mfufube nsisime nje é wulu” ényiñe jé. (Beromain 12:​11, ayemé) Ajô te, mfufube nsisim ô ne volô bia na bi nye’e bôte bevok ane bobenyañe ya abume da a jamé be a nleme wongan ôse. Ve asu na bi bo de, bia yiane kôme ye’elane Yéhôva a sili nye mvolan.—Luc 11:13.

“NKANDANE MENGAM Ô BO TE BO ÉZEZAÑE JENAN”

13. Jé é ne soo nkandane mengam e zañe jangan?

¹³ Ékôane bekristen é bili “kane bôt ése” é so’o fe bevôme bevôm. (1 Tim. 2:​3, 4) Amu nalé, é ne kui na bi nyoñe mintyi’ane mia selan a mi mi bôte bevok, aval ane mbot, mimvôman, avale bia saéban. Nge bi bo teke tabe ntyel, nselane ate a ne viane soo nkandane mengam e zañe jangan. (Rom. 14:4; 1 Cor. 1:10) Amu ‘Zambe a maneya ye’ele bia na bia yiane nye’esan,’ ajô te bia yiane tabe ntyele ya simesane na mintyi’ane miangane mmie mia dañ abeñ a dañe mi mi bôte bevok.—Philip. 2:3.

14. Jé bia yiane jeñe na bi bo éyoñ ése, a amu jé?

¹⁴ Nge bia ke ôsu a ve bôte bevo’o ngule nyul, jam éte da ye volô na nkandane mengam ô bo teke bo ékôane bekristen. (1 Thes. 5:11) Biyoñe bi ndôme lôte bi, abui bôt é nga mane voé nsisim a bôte be nga mane vaa ékôane bekristene ba beta bulan. Bia yiane be tame mbamba nsoon a nleme wongan ôse! (2 Cor. 2:8) Tame yene jam é nga kui sita a nga voé nsisime den a ntoo mimbu awôm, éyoñ a nga beta ke Aba Éjôé. A nga jô na: “Môt ase a mbe a za’a wubane ma a meva’a mese.” (Mame mi. 3:19) Aval avé mboon ôte ô nga nambe nye? A jô na: “Yéhôva a nga volô ma na me beta bo mevak.” Nge bia ve ngule na bi volô bôte bevok, Krist a ne belane bia asu na bi volô “ba bese be ne nte’an a be be’e adite mimbe’e.”—Matt. 11:​28, 29.

15. Jé éfe bi ne beta bo asu na ékôane Yéhôva é bo nlatan? (Fombô’ô fe fôtô.)

¹⁵ Zene fe bi ne beta belane je asu na bi ba’ale élate jangan é ne avale bia belan ôyeme wongan. Job 12:11 a jô na: “Ye sa alo nde da ve’ele mejô, aval ane ôyeme via wô’ôtane bidi bié?” Aval ane môt a yame bidi a bo mbane ya tye’e bie asu na a yeme nge bi ne zam ôsusua na a señe bie bôte befe, aval éte fe da da, ye da ye ke bo mvo’é na bi taté fase mame bia zu kobô ôsusua na bia jô me bôte bevok. (Bsa. 141:3) Nsôñane wongan ô ne na mame bia jô bôte bevo’o me bo ma ma ve be ngule nyul, a na be “yene mfi ya été.”—Éphé. 4:29.

16. Beza ba yiane dañe belane nkobô wo ve bôte bevo’o ngule nyul?

¹⁶ Beyôm a bebiaé mbe ba yiane dañe ve ngule ya yeme belane nkobô wop asu na be ve bôte bevo’o ngule nyul. (Col. 3:​19, 21; Tite 2:4) Bemvendé fe ba yiane bo ane anjeñe ya vôme mintômba mi Yéhôva mia ke nyoñe ngule nyul. (Ésa. 32:​1, 2; Gal. 6:1) Nkana ya Kalate Zambe wo jô bia na: “Éfia ja koban éyoñe ja yian, ngo’o aka’a mvaé!”—Mink. 15:23.

LITI’I NYE’AN E “MIMBOON A BENYA MEJÔÔ”

17. Aval avé bi ne kôme tabe ndi na nye’ane bi bili be bobejañ a bekale bangan ô nji bo bebadu’u?

¹⁷ Nlômane Jean wo jô bia na “bi nji yiane nye’e ve a biyaé bi anyu, bia yiane liti de a mimboon a benya mejôô.” (1 Jean 3:18) Bia yi na nye’ane bi bili be bobejañ a bekale bangan ô bo wu wo so bia nlem été. Aval avé bi ne bo jam éte? Éyoñe bia ye tu’a lôt éyoñ a bobejañ a bekale bangan, nde fe bia ye tu’a kabetane be nalé, a nye’ane wongane wo ye tu’a bo ngul. Bia yiane jeñe na bi lôt éyoñ a bôte bevok. Bi ne de bo éyoñe bi ne bisulan, nkañete, bi nyoñe’e fe éyoñe ya ke jome be. Nge bi bo nalé, bia ye liti na ‘Zambe a maneya ye’ele bia na bia yiane nye’esan.’ (1 Thes. 4:9) Biabebiene bia ye ke ôsu a yene na “é ne aka’a mvo’é ane bobenyañe be ne vôme wua a nleme wua!”—Bsa. 133:1.