AYÉ’É 26
JIA 123 Bi su’u nta’ane mame Yah a nlem ôse
Bo’o éjote nyul éyoñe wo wô’ô ki mame méziñ
“Mfa’a ya nyô a ne Ngul Ése bi se ngule ya yemelane nye.”—JOB 37:23.
BETA BE MAME BIA ZU YEN
To’o bia yeme ki avale mame ma ye bobane melu ma zu, bi ne ke ôsu a jibi éyoñe bia bem ôsimesane wongane mame bia yem a tabe Yéhôva mebun.
1. Jé Yéhôva Zambe a nga ve môt ase ya be bia, a amu jé?
YÉHÔVA a nga té bia étua ya abeñ, bi ne ngule ya fas, ya yé’é mimfefé mi mam, bi ne fe ngule ya yem avale bi ne tôñe mame bia te yé’é. Amu jé a nga té bia nalé? A yi na “bi yene ñyemane ya Zambe” a na bi kañe nye a mfasane wongan.—Mink. 2:1-5; Rom. 12:1.
2. (a) Minné mivé bi bili? (Job 37:23, 24) (Fombô’ô fe fôtô.) (b) Mfi ôvé bia bi amu bia yemelane minné miangan?
2 Akusa bo Yéhôva a nga té bia a ngule ya yé’é abui mam, ve bia yeme ki mame mese. (Lañe’e Job 37:23, 24.) Bi tame yen éve’ela Job. Yéhôva a nga sili nye abui minsili mi nga volô nye na a tu’a yemelane na a nji yem abui mam. Minsili mite mi nga bo na Job a bo éjote nyul a na a tyendé mfasane wé. (Job 42:3-6) É ne fe mfi asu dangane na bi kañese na bia yeme ki mame mese. Éyoñe bia yemelane na bi vo’o ke yeme mame mese, jam éte da ye volô bia na bi bo éjote nyul, a na bi tabe ndi na Yéhôva nnye a ye bo na bi yeme mame bia yiane yem, a volô bia na bi nyoñe mbamba mintyi’an.—Mink. 2:6.
Aval ane Job, éyoñe bia kañese na bia yeme ki jame si jame ka, nalé a ne bo bia mfi (Fombô’ô abeñe 2)
3. Jé bia zu yen ayé’é di?
3 Ayé’é di bia zu yene mame bia yeme ki a minju’u bi ne tôbane mie biyoñe biziñ amu bi nji yeme mame mete. Bia ye fe yen amu jé é ne mvo’é na bi bo teke yeme mame méziñ. Mame bia ye yé’é ma ye volô bia na bi kôme tabe ndi a Yéhôva, “nyô a ne nya ñyemane mame,” a ye kate bia mame bia yiane yem.—Job 37:16.
BI NJI YEME MÔS ASU’ULANE DA YE SO
4. Avale kalate Matthieu 24:36 a jô, jé bi nji yem?
4 Lañe’e Matthieu 24:36. Bia yeme ki éyoñ asu’ulane ya nta’ane mame wu da ye so. Ja’a Yésus, éyoñe a mbe si va, a nji be a yeme’e “môs ôte nge awolo.”a Mvuse ya valé, a nga jô minlômane mié na Yéhôva nnye a bili ngule ya tyi’ik éyoñe mame méziñe ma ye boban. (Mame mi. 1:6, 7) Yéhova a téléya ngum éyoñ asu asu’ulane ya nta’ane mame wu, ve bi se ngule ya yeme môs asu’ulane da ye so.
5. Mbôle bi nji yeme môs asu’ulane da ye so, amu jé jam éte é ne bia ndeñele?
5 Éyoñe bia fase mejô me Yésus, bia yene na bi nji tu’a yem abim éyoñe bia ye yange ôsusua na asu’ulane da so. Jam éte é ne bo na bi yen ayaé ya ke ôsu a yange nge ke bili atek, e dañe dañe nge bi yangeya môse Yéhôva ôte den a ntoo abui mimbu. Bi ne fe bili atek amu bibu’a ya nda bôte jangan, nge ke bôte befe ba kpwe’ele bia amu asu’ulan é ngenane teke so. (2 P. 3:3, 4) Bi ne fe fase na nge bia yeme môs asu’ulan, nalé a ne bo tyi’ibi asu dangane na bi ke ôsu a yange a jibi ékpwe’ele.
6. Amu jé é ne mvo’é na bi bo teke yeme môs asu’ulan da ye so?
6 Mbôle bia yeme ki môs asu’ulane da ye so, nalé a ve bia fane ya liti Yéhôva na bia kañe nye amu bia nye’e nye a na bi too nye mebun. Bia kômbô kañe Yéhôva nnôm éto, sa ke ve amu bia yange môs asu’ulan. A lôte na bi dañe kee mfasane wongan éyoñe “môse Yéhova” wo ye so, bia yiane dañe bem ôsimesane wongane mbamba be mame bia ye bi mvuse môs ôte. Nge bi bo nalé, bia ye tu’a kabetan a Yéhôva a tabe nye ndi.—2 P. 3:11, 12.
7. Jé bia yem?
7 É ne angôndô ya mfi na bi bem ôsimesane wongane jame bia yem. Bia yeme na melu ya asu’ulane me nga taté mbu 1914. Yéhôva a nga ve bia minkulane mejô mia liti na melu ya asu’ulane me nga taté mbu ôte, a nga kate fe bia abui mam afe da liti bia aval émo ja ye bo mvuse mbu ôte. Nalé a nga bo na bi yeme na “beta môse ya Yéhôva a nto bebé.” (Soph. 1:14) Bia yeme fe beta ésaé Yéhôva a yi na bi bo, nnye ate a ne na bi kañete bôte bevo’o “mbamba foé ya Éjôé.” (Matt. 24:14) Foé éte ja katebane mesi 240 a minkobô e lôte 1000. Da sili ki na bi yeme “môse nge awolo” asu na bi bo ayôñ ésaé ya kañete mbamba foé ate.
BIA YEME KI AVALE YÉHOVA A YE BO MAM
8. “Mboane ya Zambe” wo tinane aya? (Ecclésiaste 11:5)
8 Bia yeme ki “mboane ya Zambe.” (Lañe’e Ecclésiaste 11:5.) Bifia bite bia tinane na Yéhôva a bo mame nge ke kañese na mame méziñe me kui asu na a tôé nsôñane wé. Bi nji tu’a yem amu jé Yéhôva a kañese na mame méziñe me bobane nge ki aval a ye bo asu na a volô bia. (Bsa. 37:5) Kalate Zambe a ve’e mboane ya Zambe a avale mone a yaé abume nyia wé, ja’a beyeme mame ba kôme ke tu’a wôk avale mone a kômban abume be nyia, aval éte da da bia kôme ke yem avale Yéhôva a ye bo mam.
9. Mbôle bi nji yem avale Yéhôva a ye bo mam, nalé a ne bo na bi wô’ôtan aya?
9 Mbôle bia kôme ki yem avale Yéhôva a ye bia volô, jam éte é ne bo na bi kate nyoñe mintyi’ane miziñ. Éve’an é ne na, bi ne ko woñe ya nene ésaé nkañete jangane nge ke sulu nkôñ ényiñe wongane si, asu na bi ke suk ésaé nkañete vôme bekañete mbamba foé ba jemban. Éyoñe bia kate tôé minsôñane miangane ya nsisim, nge éyoñ ésaé nkañete bia bo é nji wume bibuma avale bia yi, nge ke na bia tôbane minju’u miziñ ésaé bia bo Yéhôva, bi ne taté na bia sili biabebiene nge Yéhôva a wô’ô bia mvaé.
10. Mbamba mefulu mevé bia bi éyoñe bi nji yem avale Yéhôva a ye bo mam?
10 Mbôle bia kôme ke yem avale Yéhôva a ye bo mame méziñ, nalé a volô bia na bi bi mbamba mefulu ane éjote nyul a yeme minné miangan. Nalé a volô bia na bi kôme yeme na Yéhôva nnye a yeme mame ma dañe mfi asu dangan. (Ésa. 55:8, 9) Bia yé’é fe na bia futi ndi jangane be Yéhôva a tabe ndi na mame mese bi ne bo, nnye étam a ne bia volô. Éyoñ ésaé nkañete jangane ja wume mbamba bibuma nge ki éyoñ ésaé éfe bia bo ékôane Yéhôva ja wulu mvo’é, Yéhôva nnye bia ve duma. (Bsa. 127:1; 1 Cor. 3:7) A nge mame me nji wulu avale bia yi, bia yiane ba’ale ôsimesane na Yéhôva a yeme mame mese. (Ésa. 26:12) Bia bo abime bi ne ngule ya bo a tabe ndi na Yéhôva a ye volô bia éyoñ ése. Bi too ndi na Yéhôva a ye volô bia to’o a ye ke bo asimba aval a mbe a bo’o melu mvus.—Mame mi. 16:6-10.
11. Jam avé bia yem é ne volô bia?
11 Bia yiane ba’ale ôsimesane na Yéhôva a ne nye’an, zôsô a fek. Bia yeme na a nye’e bia angôndô ya abui amu bia bo abui mam asu dé a asu bobejañ a besita. Bia yeme fe na Yéhôva a botane ba bese ba wulu ba’aba’a a nye.—Héb. 11:6.
BIA YEME KI MAME MA YE BOBAN AKITI
12. Jé bi ne yé’é kalate Jacques 4:13, 14?
12 Lañe’e Jacques 4:13, 14. Nya ajôô a ne na bia kôme ki yeme jame ja ye kui bia akiti. Émo bia nyiñe ji, “éyoñ a ndoba’ane bi akui be be bese.” (Eccl. 9:11) Bi vo’o yeme nge bia ye kui na bi tôé mame bia sôñ, bi vo’o yeme nge awu dé bi bia zañe va.
13. Mbôle bia yeme ki mame mese ma ye bobane melu ma zu, nalé a ne bo na bi wô’ôtan aya?
13 É ne bo ayaé ya jibi minju’u bia tôbane mie amu bia kôme ki yeme nge minju’u mite mia ye tu’a nene nge ke mia ye kômbane melu ma zu. Amu jé bia jô nalé? Amu nge bi dañe tyelé minleme yôp a lat a mame ma ye bobane melu ma zu, nalé a ne bo na bi jañele ava’a dangan. Ényiñe jangan é ne tyendé atemeteme nge ki na mbia be mame be ne kui bia ényiñ a bo na nleme wongan ô taé. A nge mame ma wulu ki avale bi mbe bi buna’an, jam éte é ne bo na bi bili atek a sulu mo si.—Mink. 13:12.
14. Ava’a dangan é tii a jé? (Fombô’ô fe befôtô.)
14 Éyoñe bia jibi minju’u bia tôbane mie to’o bi nji yeme vôme mia so, bia liti Ésa wongane ya yôp na bia kañe nye amu bia nye’e nye. Minkañete ya Kalate Zambe mia liti na Yéhôva a kamane ki na bi tôban avale minjuk ése. A yeme na sake ñyemane ya mame ma ye kui bia melu ma zu ñwô ô ne soo bia mevak ényiñ. Ve bia bi benya meva’a nge bia jô’é na Yéhôva nnye a liti bia zen a nge bia bo nye mewôk. (Jér. 10:23) Nge bia ye’ebe be nye éyoñe bia nyoñe mintyi’iane miziñe bia ye jô na: “Nge Yéhôva a kañese, bia ye nyiñ a bo jame si nge jame ka.”—Jacq. 4:15.
E Jeñe melebe me Yéhôva a bo nye mewôk a ne beta ében asu dangan (Fombô’ô abeñ 14-15)b
15. Jé bia yem a lat a melu ma zu?
15 Akusa bo bi nji yeme jame da ye kui bia môs ane môs, ve bia yeme na Yéhôva a ka’ale bia ényiñe ya nnôm éto e si va nge ke yôp. Bia yeme na a vo’o laane minsos a na jam éziñ é vo’o bo na a bo teke tôé bengaka’a bé. (Tite 1:2) Nnye étam a ne ngule ya “kate mam me ngenan te tame boban aso biyoñe bitô.” Mame mese a nga mane ka’ale melu mvuse me nga tôéban, a ma mese a ka’ale a lat a melu ma zu ma ye fe tôéban. (Ésa. 46:10) Bia kôme tu’a yeme na teke jôm éziñ é ne kandé bia nye’ane Yéhôva a nye’e bia. (Rom. 8:35-39) A ye ve bia fek, a ye su’u bia, a ve fe bia ngule ja sili asu na bi bo mbane ya jibi mame mese ma ye bia kui. Bi ne ñhe tabe ndi na Yéhôva a ye volô a botane bia.—Jér. 17:7, 8.
BI VO’O KE TU’A YEM ABIM AVÉ YÉHÔVA A YEME MÔT ASE YA BE BIA
16. Jé Yéhôva a yem a lat a môt ase ya be bia, a nalé a bo na bi wô’ôtan aya? (Besam 139: 1-6)
16 Lañe’e Besam 139:1-6. Nté wongan a kôme yeme môt ase ya be bia. A kôme yeme mame bia fas a avale bia wô’ôtan. A yeme mame bia jô a ma me ne bia minlem. A yeme fe mame mese bia bo a amu jé bia bo me. Njô bôte David a nga jô na, Yéhôva a ne ngul a ôjeja’a ya volô bia. Aval avé wo wô’ôtan éyoñe wo simesane na, Zambe ya ngul ése nnye a ne mbetane yôp a Nté ya biôme bise a nyoñe ngap a wo? David a nga jô na: “Aka’a ñyemane mam éte e dañeya ma; e ne ôyape yôp, me se ngule ya nyoñe de.”—Bsa. 139:6.
17. Amu jé é nji bo tyi’ibi ya kañese na Yéhôva a kôme bia yem?
17 Éko éziñe mame me nga kui nda bôte jangan, ayoñe dangan, nge ki mame bi mbe bi buni’i ôsusua na bia yeme benya mejôô, me ne bo na bi kate yene Yéhôva ane Ésa a nye’e bia, a nyoñe’e fe ngap a bia. Éyoñe bia simesane abé bi nga bo melu mvus, bi ne yene ve ane Yéhôva a vo’o bi nkômbane ya yeme bia, a nalé a ne bo na bi yene ve ane Yéhôva a ne ôyap a bia, ja’a David fe a nga wô’ôtan avale da. (Bsa. 38:18, 21) Môt a ve ngul ése na a tyendé fatan ényiñe jé, asu na a nyiñ avale da ve Yéhôva nlem avak, a ne sili émiene na: ‘Nge Zambe a kôme yeme tebe été jam, amu jé a yi na me tyendé fatan ényiñe me maneya yembane je?’
18. Amu jé é ne mvo’é na bi kañese na Yéhôva a kôme bia yem a dañ abime bia yeme biabebien? (Fombô’ô fe befôtô.)
18 Bia yiane jeñe na bi kôme wôk a kañese na Yéhôva a yeme bia a dañ abime bia yeme biabebien, a na a yene mbamba mefulu mangane biabebiene bia kate yen. Akusa bo a yeme bikobe biangan, avale bia wô’ôtan a bo mame méziñ, ve a ke ôsu a nye’e bia. (Rom. 7:15) Éyoñe bia tu’a yemelane na Yéhôva a yem avale môte bi ne bo, nalé a ye ve bia ngule ja sili asu na bi ke ôsu a bo nye ésaé a mevak.
Yéhôva a volô bia na bi yemete mbunane wongan a mbamba bengaka’a a ka’ale bia melu ma zu, a zen éte a volô bia na bi bo mbane ya jibi minju’u mia kui bia atemetem (Fombô’ô abeñ 18-19)c
19. Jé bia kôme yem a lat a Yéhôva?
19 Bia yeme na Yéhôva a ne nye’an. A bi nji sôan a jam éte. (1 Jean 4:8) Bia yeme na nge a jô bia na bi bo mame méziñ a na bi sa’ale ma mevok a ne amu a nye’e bia a amu a yi na bi bi mbamba ényiñ. Bia yeme fe na Yéhôva a yi na bi nyiñe nnôm éto. A nga ve ntañ asu na jam éte é boban. Amu Yésus a nga wu asu dangane bi ne ngule ya ve Yéhôva nlem avak akusa bo bikobe biangan. (Rom. 7:24, 25) Bia yeme na “Zambe a dañe nleme wongan, nde fe, a yeme mame mese.” (1 Jean 3:19, 20) Yéhôva a yeme bia a too fe ndi na bi ne bo nkômbane wé.
20. Jé é ne volô bia na bi bo teke dañe tyelé minleme yôp a lat a mame bia yeme ki?
20 Yéhôva a kate bia jam ése da sili na bi yem. Ajô te bi nji yiane tyelé minleme yôp jame bia yeme ki, a lôte na bi bo nalé bia yiane bem ôsimesane wongane ve mame ma dañe mfi. Éyoñe bia bo nalé, bia liti na bi too ndi a Yéhôva “Nyô a ne nya zosôô mfa’a ya ñyeman.” (Job 36:4) Akusa bo bia wô’ô ki mame méziñ éyoñe di, bia yeme na Yéhôva a ye ke ôsu a ye’ele bia mimfefé mi mame nnôm éto. Nlem ô ne bia njalan a mevak amu Ésa wongan a nye’e bia a ye ke ôsu a ye’ele bia mimfefé mi mam.—Eccl. 3:11.
JIA 104 Zambe a ve bia mbamba nsisim
a Yésus a ye wulu a nkane bita wo ye zu mane tyame mbia émo Satan nyi, ajô te bi ne jô na éyoñe ji Yésus a nga yem éyoñe bita ya Armaguédon bia ye taté a éyoñ a ye “mane medañe mé.”—Nlitan 6:2, 19:11-16.
b ATINANE YA BEFÔTÔ : Ésa ba mone ba kômesan épkwaé asu na nda bôt é tabe nkômesane nge jame da kui be atemetem.
c ATINANE FÔTÔ: Mojañ a tôbane minjuk a fase mevak a ye bi mfefé émo.