Jé ja kamane ma na me duban?

1. Jé Adam ba Ève be nga jañele, a asu’ulane ya été e mbe aya?

WO SIMESAN aya, za a yiane tyi’i na jame si jame ka e ne abeñ nge ke abé? Éyoñ Adam ba Ève be nga di ébuma ya yemelane mvaé ba abé, e mbe fo’o ve ane ba jô na be nji tabe Yéhôva a metiñe mé ndi. Be nga tobe na bebien ba tyi’i jam e ne mvaé nge abé asu dap. (Met. 3:22) Ve tame yene mam be nga jañele. Be nga jañele mbamba élat wob a Yéhôva. Be nga jañele fe fane ya nyiñe nnôm éto, nde fe be nga kôé bone bap metyi ya abé a awu. (Bero. 5:12) Ntyi’an Adam ba Ève be nga nyoñ ô nga soo be angôndô éngôngol ényiñ.

2-3. (a) Jé miak ya Éthiopie ô nga bo éyoñe Philippe a nga kañete wô? (b) Bibotane bivé bi ne bi éyoñe bia nyoñe mbaptizô, a bia zu yalan minsili mivé ayé’é di?

² Tame yen nsela’ane a ne zañ akute ntyi’an Adam ba Ève a wu miak ya Éthiopie ô nga nyoñ éyoñ Philippe a nga kañete wô. Mame Yéhôva ba Yésus be nga bo asu mone Éthiopien ate me nga nambe nye aval e mbe na, a nga tyi’i na a duban été été. (Mam. 8:34-38) Éyoñ bia fe bia tyi’i na bia ve biabebien ngumba a nyoñe mbaptizô ane miak ôte, bia liti ne sañesañ na bia ve Yéhôva ba Yésus akiba amu mam be nga bo asu dangan. Bia liti fe a zene éte na, bi too ndi a Yéhôva a na bia kañese na nnye a yiane tyi’i na jame si jame ka e ne abeñ nge ke abé.

³ Tame ve’ele simesane bibotan bise bia bi éyoñe bia kañe Yéhôva. Jam ôsu, bia ye bi biôm bise Adam ba Ève be nga mane jañele, a fane ya nyiñe nnôm éto. Amu na a zene ya mbunane wongan be Yésus, Yéhôva a jamé bia bikobe biangan a bia bi mbamba mone môte ya nlem. (Mt. 20:28; Mam. 10:43) Bi bili fe ma’a ya bo ébu’a jia ya nda bôte Yéhôva, a fane ya bu’ubane mame Yéhôva a ka’ale bebo bisaé bé melu ma zu. (Jean 10:14-16; Bero. 8:20, 21) Akusa bo mbamba be mam bete bese, bôte béziñ ba yen ayaé ya nyoñe ntyi’ane ya duban, a too ke na ba yem benya mejôô. Jé ja ndeñele be? A jé é ne volô be na be dañe mam mete?

MAM MA BO NA BÔTE BÉZIÑ BE KATE NYOÑE MBAPTIZÔ

4-5. Minju’u mivé Avery ba Hannah be nga tôbane mie?

⁴ Ba yene bebiene zezé. Bebiaé be Avery be ne Bengaa be Yéhôva. Bôte bese ba yem ésaa wé ane mbamba môt a mbamba mvendé. Ve Avery a mbe a kate’e nyoñe ntyi’ane ya duban. Amu jé? Émien a yalane na: “Me nji be me buni’i na me ne bo mbamba môt ane pepa.” Avery a mbe a simesa’ane na a nji be ngule ya be’e mimbe’e bôte be dubaneya ba yiane be’e. A jô na: “Me mbe me ko woñe ya ye’elan bôt été, me mbe fe me ko woñe ya bo bisaé pôsmôden a kañete menda menda.”

⁵ Hannah a bili mimbu 18, a ne angôndô ya awu ôsonô. A nga yaé a bebiaé bé be ne Benga be Yéhôva. To’o nalé, a nji be a simesa’ane na a ne ngule ya nyiñ aval ane Yéhôva a nye’e. Amu jé? Hannah a mbe a biasé’ émien angôndô. Biyoñ biziñ a mbe a wô’ô émien éngôngol aval e mbe na, a nga taté na a balé émien meveñ. A jô na: “Me nji ve’ele kate môte éziñ jam ete, to’o bebiaé bam. A me mbe me simesa’ane na, Yéhôva a vo’o kañese na me bo mbo ésaé wé amu mbia mboan ate.”

6. Jé é nga bo na vanessa a kate ji’a duban?

⁶ Mbia mewoso. Vanessa a bili mimbu 22, a jô na: “Bia mona minga éziñ bi mbe beta bemvôé, amvôé dangan é mbe é tabeya bebé mimbu awôm.” Ve mbôle mvôé jé éte é nji be Ngaa, é nji su’u ntyi’ane wé ya duban. Jam ete e nga ndeñele Vanessa, a jô na: “E nji bo tyi’ibi asu dame na me bi bemvôé, nde me mbe me ko woñe na, nge me telé amvôé dam a mona minga ate, da ye bo ayaé na me beta bi mvôé fe ane nye.”

7. Jé Makayla a mbe a ko woñ, amu jé?

⁷ Woñe ya bo mbia nsem. Makayla a mbe a bili mimbu mitan éyoñ ndôme jé é nga tebe feñ. Nté a mbe a yaék, a mbe a tu’a yen aval avé mbia ntabane ndôm é mbe é ndeñele’e bebiaé bap. A jô na: “Me mbe me ko woñe na, nge me duban, me ne bo mbia nsem, a tebe feñ, a bo na bebiaé bam be tu’a beta wô’ô nlem mintaé.”

8. Jé é nga bo na Miles a ko woñe ya duban?

⁸ Étibela’a. Ésaa Miles ba ngal be ne Bengaa be Yéhôva, ve nyia nye a nji bo Ngaa. Miles a jô na: “Bia nyia wom bi nga nyiñe mimbu 18. Éyoñ me nga kômbô duban, me nga ko woñe ya kate nye de, amu me nga yen aval a nga yaa éyoñ pepa a nga bo Ngaa Yéhôva. Me mbe me mate’e na bia nye bi bi mejô.”

AVAL Ô NE DAÑE MAM MA KAMANE WO NA Ô DUBAN

9. Nge wo yé’é fulu ôjibi a nye’ane Yéhôva, nalé a ye volô wo aya?

⁹ Adam ba Ève be nji tyi’i na ba bo Yéhôva mewôk, amu nye’ane wop asu Yéhôva ô nji be ngul. To’o nalé, Yéhôva a nga jô’é na be nyiñ ôbe ayap asu na be biaé bon, a na bebien be tyi’ avale ñye’elan ba ye ve be. É nji sili abui éyoñ asu na e kôme yené ne ngeññ na, ntyi’an Adam ba Ève be nga nyoñ na ba nyiñ teke bisi Yéhôva ô mbe akute ntyi’an. Ntôle mone wop ô nga wôé monyañ teke étom, mvuse ya valé si é nga jaé a évô a fulu ôkôlôt. (Met. 4:8; 6:11-13) Ve jame da, Yéhôva a nga ve bone be Adam ba Ève ba ye jeñe nye fane ya bi ényiñ. (Jean 6:38-40, 57, 58) Nté wo ye ke ôsu a yé’é fulu ôjibi a fulu nye’ane Yéhôva, wo fe wo ye tu’a nye’e nye. Wo ye fe tu’a kômbô sa’ale mbia zen Adam ba Ève be nga nyoñ, a tyi’i na wo ve womien ngumba be Zambe wôé.

10. Amu jé é ne tyi’ibi na bi kañe Yéhôva éyoñ bia tu’a bindi Besam 19:7?

¹⁰ Kele’e ôsu a yé’é yeme Yéhôva. Nté wo ye ke ôsu a yé’é na ô yeme Yéhôva, wo ye tu’a tabe ndi na, ô ne ngule ya ve nye nlem avak. Avery bia te jôô nye yôp, a jô na: “Ma bi ngule nyôl éyoñ ma lañ a bindi ngaka’a é ne kalate Besam 19:7.” (Lañek.) Éyoñ Avery a nga yen avale Yéhôva a nga tôé ngaka’a éte, nye’ane wé asu Yéhôva ô nga bo ngul. Nye’an ô nji volô ve na bi tabe ndi na bi ne ve Yéhôva nlem avak, ve wo volô fe na bi sa’ale mame Yéhôva a vini, wo yemete fe nkômbane wongane ya bo nye ésaé. Hannah fe bia te jôô nye yôp a jô na: “Ayé’é Kalate Zambe dam é nga volô ma na me tu’a yemelane na, éyoñ ma balé mamien meveñe nyôl, ma bo na Yéhôva a wô’ô nlem mintaé.” (1 P. 5:7) Hannah a nga liti na a kôme bo mam a yé’é Kalate Zambe. (Jc. 1:22) Nde jam ete e nga wume bibuma bivé? A jô na: “Éyoñ ma yene mbamba be mam ba kui ma amu ma bo Yéhôva mewôk, nalé a bo na me tu’a nye’e nye. Éyoñ ji, me too ndi na Yéhôva a ye liti ma zen éyoñ ése ma ye yi mvolan ényiñe jam.” Hannah a nga kui na a telé mbia fulu ya balé émiene meveñ. A nga su’ulane ve émiene ngumba be Yéhôva a duban.

11. Jé Vanessa a nga bo asu na a bi mbamba bemvôé, nalé a ye’ele bia jé?

¹¹ Tobe’e mbamba bemvôé. Vanessa bia te jôô nye yôp, nye fe a nga yemelane na, mvôé jé ja kamane nye na a kañe Yéhôva. Ane a nga telé amvôé ete. Ve a nji su’u valé. A nga jeñe na a bi bemvôé befe akônda été. Éve’ela Noé a nda bôte jé é nga volô nye abui. A jô na: “Be nga nyiñe zañe bôte be nji kañe Yéhôva, ve be nga late memvôé zañe jap, nda bôte été.” Nné ane a nga nyoñe mbaptizô, Vanessa a nga nyoñ ésaé nkpwa’a mefan. Éyoñ ji a jô na: “Nalé a nga volô ma na me bi mbamba bemvôé, sa ve akônda dam étam, ve abui mekônda afe.” Wo fe ô ne bi mbamba bemvôé nge wo bo Yéhôva ésaé a ayôñ ése.​—Mt. 24:14.

12. Adam ba Ève be nji ko avale woñ avé, nalé a nga soo jé?

¹² Te ko woñ ô nji yian. E ne mvo’é na bi ko woñ biyoñ biziñ. Éve’an é ne na, bia yiane ko woñe ya bo jam e ne abé mise me Yéhôva. (Bs. 111:10) Nge Adam ba Ève be nga ye bi avale woñ ete, be nji ye tebe Yéhôva ngame yat. Ve be nga viane bo nye melo. Mboan ôte ô nga bo na mise mab me kuiban; nalé a tinane na be nga yemelane na be nto bebo mam abé. Ane be nga kôé bone bap abé a awu. Éyoñ be yemelaneya été jap, be nga taté na ba wô’ ôson amu be mbe minsoé, ane be nga buti soé jap.​—Met. 3:7, 21.

13-14. (a) Avale kalate 1 Pierre 3:21 a jô, amu jé bi nji yiane ko awu woñ a lôte nné? (b) Mam mevé ma yiane tindi bia na bi nye’e Yéhôva?

¹³ Nté bia koo woñe ya ndaman élate jangan a Yéhôva (woñe wo yian), bi nji yiane ko awu woñ a lôte nné (woñ ô nji yian). Yéhôva a nga ve bia fane ya nyiñe nnôm éto. Nge da kui na bi sem a kôñelane nlem, Yéhôva a ye jamé bia a zene ya mbunan bi bili asu ñtan Yésus a nga ve. Beta jame wua bi ne bo asu na bi liti mbunane wongan a ne na, bi ve biabebiene ngumba be Yéhôva a duban.​—Lañe’e 1 Pierre 3:21.

¹⁴ Bi bili abui beamu ya nye’e Yéhôva. Ane ô vaa mbamba be mam a ve bia môs ôse, a ye’ele fe bia benya mejôô a lat a émien a nsôñane wé. (Jean 8:31, 32) A nga ve fe bia akônda asu na a tebele bia a volô bia. A volô bia na bi jibi minju’u bia tôbane mie den, a ve fe bia ndi nleme ya nyiñe nnôm éto Paradis melu ma zu. (Bs. 68:19; Nli. 21:3, 4) Éyoñ bia tu’a nyoñ éyoñe ya bindi mam mese ma liti na Yéhôva a nye’e bia, nalé a tindi bia na bi tu’a nye’e nye. A nge bia nye’e Yéhova, bia ye ko nye woñ avale da yian. Amu bi nji yi na Môt bia dañe nye’e a wô’ô mintaé nlem.

15. Jé é nga volô Makayla na a dañe woñe ya bo mbia nsem?

¹⁵ Makayla bia te jôô nye yôp, a nga kui na a dañ woñe ya bo mbia nsem éyoñ a nga tu’a wô’ô na Yéhôva a ne Zambe a jamé. A jô na: “Me nga tu’a wô’ô na bia bese bi be’e metyi ya abé a bia kop. Me nga kôme fe wô’ô na Yéhôva a nye’e bia a na a ye jamé bia a zene ya ntañ.” Ane nye’an ô nga tindi Makayla na a ve émien ngumba be Yéhôva a nyoñe mbaptizô.

16. Jé é nga volô Miles na a dañ étibela’a?

¹⁶ Miles a mbe a ko woñe ya duban amu a mbe a mate’e nyia, ve njome mekônda a nga volô nye na a dañe woñ ôte. Miles a kobô ajô njome mekônda ate a jô’ô na: “Ane ma, ésaa étame nnye a mbe Ngaa Yéhôva. A nga volô ma na me yem aval avé me ne laan a mema, a bo na a tu’a wô’ô na, sa ke pepa nnye a tindi ma na me duban, ve na ntyi’an ôte wo so be mamien.” Ba nyia be nji kui tyiñ. E nga sili na a kôlô nda nyia, ve a nji jô’é ntyi’ane wé ya duban. A jô na: “Éyoñ me nga yé’é mbamba be mam bese Yéhôva a bo asu dam, jam ete e nga nambe ma abui. Me nga tu’a wô’ô abim avé Yéhôva a nye’e ma éyoñ me nga kôme bindi atinane ya ntañ. Mam mete mme me nga tindi ma na me ve mamiene ngumba be Yéhôva a duban.”

TÔÉ NTYI’ANE WÔÉ YA BAPTIZÔBAN

17. Jé môt ase ya be bia a bili fane ya liti Yéhôva?

¹⁷ Éyoñ Ève a nga di ébuma afube ya Éden, a nga lume Yéhôva mvus. Éyoñ Adam ki a nga di ébuma, nye fe a nga liti na a nji bisi mbamba be mam bese Yéhôva a nga bo asu dé. Môt ase ya be bia a bili fane ya liti na a vini ntyi’an Adam ba Ève be nga nyoñ. Éyoñ bia duban, bia liti Yéhôva na bia kañese na nnye a bili ngule ya tyi’i na jame si jame ka e ne abé nge ke abeñ. Bia liti fe na bia nye’e Ésaa wongan a na bi too nye ndi.

18. Jé é ne volô bia na bi tôé ntyi’ane wongane ya kañe Yéhôva?

¹⁸ Éyoñ bi dubaneya, bia yiane ve ngul ése na bi nyiñe môs ôse aval ane nkômbane Yéhôva ô né, sa ke éñwongan. Bemillion be bôte ba ve ngule ya bo de môs ane môs. Wo fe ô ne bo de nge wo ke ôsu a fa’a mam me ne Kalate Zambe, nge wo tabe bisulan mban, a nge wo bo ôjeja’a ya kañete bôte bevo’o mam wo yé’é a lat a Zambe wongane ya nye’an. (Beh. 10:24, 25) Éyoñ wo nyoñ mintyi’an, jeñe’e melebe ma so Bible a ma ôlo ô ne mewôk a fek wo ve bia. (És. 30:21) Nalé a ye bo na mam mese ya ényiñe jôé me bo nya mvaé.​—Min. 16:3, 20.

19. Bi nji yiane vuane jé, amu jé?

¹⁹ Nge bia vuane ki abim avé melebe Yéhôva a ve bia me ne mfi ényiñe jangan, bia ye tu’a nye’e me. Nalé a ye fe volô bia na bi bo teke jô’é na jam éziñ ya émo Satan ji é bo na bi telé ésaé bia bo Yéhôva. Tame ve’ele simesane na Harmaguédon a lôteya, bi ntoo éjôé Yésus si. Womien wo ye tebe, ô se’ese nlô, a jô na: “Teke fo’o ntyi’an ôfe ô mbe ve soo ma bibotan ane wu me nga nyoñe na ma ve mamiene ngumba be Yéhôva a duban!”