Aval avé évuse ñyebe ja ve éyôlé Zambe mvit?

Zambe a ne nye’an, ve da yené na miñyebe mia bo angôndô ya mbia be mam a too ke na mia tametane na mia bo Zambe ésaé. Amu jé nalé a boban? Nya ajôô a ne na, miñyebe mite mi ne bivuse miñyebe, mia ve éyôlé Zambe mvit. Aval avé ba bo de? Zambe a wô’ôtan aya? A aval avé a ye kôm ajô ete?

1. Aval avé bivuse miñyebe bia ve éyôlé Zambe mvit a miñye’elane miap?

Bivuse miñyebe bi nga “veñesane benya mejô ya Zambe minsos.” (Beromain 1:​25) Éve’an é ne na, abui miñyebe e nji ye’ele bebuni bap na Zambe a bili éyôlé, a too ke na Bible a jô na bia yiane belan éyôlé Zambe. (Beromain 10:​13, 14) Éyoñ mbia jam éziñ a kui, betebe ôsu ya miñyebe miziñ be wô’ô jô na a ne nkômbane Zambe. Ve minsose le, Zambe a ne teke soo bôte mbia be mam. (Lañe’e Jacques 1:13.) Éngôngol ajô é ne na aval minsos ete da bo na bôt be tebe Zambe ôyap.

2. Aval avé bivuse miñyebe bia ve éyôlé Zambe mvit a mimboane miap?

Évuse ñyebe ja nyoñe ki bôte ngap avale Yéhôva a bo. Bible a jô a lat a bivuse miñyebe na: “Mam abé [map] me kuiya ja’a na yôp.” (Nlitan 18:5) Den a ntoo mintete mimbu, miñyebe mia bo mame me pôlitik, mia su’u bita, mi boya fe na angôndô ya abui bôt e wu. Betebe ôsu ya miñyebe miziñ ba yi na be bo minkukum. Ajô te, ba yemete bebuni bap na be ve be abui moné. Mam ba bo ma liti na be nji yeme Zambe, a na be nji yiane kobô bôt ajô dé.​—Lañe’e 1 Jean 4:8.

3. Aval avé Yéhôva a yen évuse ñyebe?

Nge mam évuse ñyebe ja bo ma vindane wo nlem, wo simesane na Yéhôva ke é wô’ôtan aya? Yéhôva a nye’e bôt, ve a wô’ô ôlun éyoñ a yen ane betebe ôsu ya miñyebe ba joñôlô bebuni a tibili be. Ajô te, a ka’ale na é mane tyame bivuse miñyebe bise a bii “bo teke beta yené.” (Nlitan 18:21) Ana’ana, Zambe a zu mane jiane bivuse miñyebe ya si ése.​—Nlitan 18:8.

TUKA’A FAK

4. Zambe a kañese ki miñyebe mise

Abui bôte da buni na miñyebe mi ne ane mezen, a na mezene mete mese ma ke be Zambe. Ye nalé a ne ñhe été? Lañe’e Matthieu 7:​13, 14, mvuse ya valé, yala’ane nsili wu:

• Jé Bible a jô a lat a zen é ne zôsôô?

Futi’i VIDÉO, mvuse ya valé, yala’ane nsili wu.

VIDÉO: Ye Zambe a kañese befatane b’ékaña’a bese?​—Éfas (3:​22)

• Ye Bible a ye’ele na Zambe a kañese fatane ékaña’a ése?

5. Évuse ñyebe ja vu ki nye’ane Zambe

Miñyebe mia bo abui mam da ve éyôlé Zambe mvit. Éve’an é ne na, mia su’u bita. Futi’i VIDÉO. Mvuse ya valé, yala’ane minsili mi.

VIDÉO: Mam miñyebe mi nga bo éyoñ ya Beta bita bi baa (2:​22)

• Mam mevé miñyebe mi nga bo éyoñ ya Beta bita bi baa?

• Wo wô’ôtan aya éyoñe wo yene mam be nga bo?

Lañe’e Jean 13:​34, 35 a 17:16. Mvuse ya valé, yala’ane minsili mi:

• Ye Yéhôva a kañese na miñyebe mi su’u bita?

• Bivuse miñyebe bia bo mbia be mam. Mam mevé wo yene miñyebe mi bo’ok ma liti na mi nji vu nye’ane Zambe?

6. Zambe a yi na bôt be kôlô évuse ñyebe

Lañe’e Nlitan 18:​4,a mvuse ya valé, yala’ane nsili wu:

• Wo wô’ôtan aya éyoñ wo wô’ô na Zambe a kômbô nyii bôte bese bivuse miñyebe bi nga joñôlô?

7. Kele’ ôsu a yé’é yeme nya Zambe

Ye mam évus ñyebe ja jô a bo ma bo na ô yene Zambe aval étam? Tame fas éve’an ji. Monafam a nyiñe nda ésaa wé. Ésaa wé a nga ye’ele nye aval a ne nyoñe mbamba mintyi’an. Ve mon ate a taté na a bo ésaa melo. Mvuse ya valé, a kôlô nda b’ésaa, a ke nyiñe mbia ényiñ. Ye bia yiane ve ésaa bijô amu mbia mintyi’ane mon a nga nyoñ?

• Ye bia yiane ve Yéhôva bijô a tyetebe nye amu mbia be mam évuse ñyebe ja bo?

ÔBALEBAS

Évuse ñyebe é nga ve jôé Zambe mvit a zene ya mbia miñye’elan, a mbia mimboane mié. Zambe a ye tyam évuse ñyebe.

Ô ne yalan aya?

• Wo wô’ôtan aya éyoñe wo yene mam évuse ñyebe ja ye’ele bôt, a mam ja bo?

• Aval avé Yéhôva a yen évuse ñyebe?

• Jé nje Zambe é bo évuse ñyebe?

MAM MEFE ME NE VOLÔ WO

Yene’e mam mebaé abui miñyebe da bo ma vindane Zambe nlem.

“Toutes les religions se valent-elles? Mènent-elles toutes à Dieu?” (Ô ne koone nye anjeñe mefoé dangan)

Amu jé Yéhôva a yi na bi kañe nye fufulu a bôte bevok?

“Est-il nécessaire d’appartenir à une religion organisée?” (Ô ne koone nye anjeñe mefoé dangan)

Fata éziñ a mbe a wô’ô ôlun amu mam ñyebe wé ô mbe ô bo’ok, ve jam ete e nji kamane na a yeme benya mejôô a lat a Zambe.

“Pourquoi un prêtre a quitté son Église ” (Vee ôyo! ya mbu 2015, Ngone baa)

Den a ntoo mintete mimbu, miñyebe mia laan minsos ajô Zambe. Nalé a bo na bôt be simesane na Zambe a ne njet, a na a nyoñe ke ngap a bia. Yé’é benya mejôô a lat a minsos milal miñyebe mia ye’ele bôt.

“Des mensonges qui empêchent d’aimer Dieu” (Nkume mmombô a bete ya mbu 2013, Ngon awôm a jia é too alu 1)