Yésus a bo mesimba, ve bôte ya Nazareth be nji buni nye

Yésus a te lôte ngumba môs a saék. Mvuse ya dulu a te bo a so’o Décapole, a te taté na a saé minga metyi ma to me kui nyul, a wômôlô fe ngone Jaïrus. Ve môs ô nga’ane teke man. Éyoñe Yésus a kôlô nda Jaïrus, mindindim mibaé mia tôñe nye be bete’e metyiñe yôp a jô na: “A mone David, ko bia éngôngo.”​—Matthieu 9:27.

Éyoñe ba loene Yésus na ‘Mone David,’ bôte bete ba liti na ba buni fo’o na Yésus a ne nyô a yiane nyoñ éto njôane David, a ne fe Messie. Yésus a bo ve ane a nji wô’ô be, éko éziñ asu na a yene nge ba ye fo’o bo mbane ya sili nye jame ba yi, a be’ ki ba liti fo’o na be ne mban. Éyoñe Yésus a nyiine nda, mindindim mite mibaé mia tôñe nye nda été. Ane Yésus a sili be na: “Ye mi abuni na me ne ngule ya bo jame di?” Ba yalan a ndi nlem ese na: “Ya, A Tat.” Nde Yésus a nambe be mis a jô na: “E bo’o mia ane mi abuni.”​—Matthieu 9:28, 29.

Été été, be nto ngule ya yen! Aval a nga jô bôte bevok, Yésus a jô be na, be bo te kañete bôte jam a te be bo. Ve amu be ne njalan a mevak, ba mane kañete bôt ajô dé vôm ase mvuse ya valé.

Éyoñe bôte bete bebaé ba ke, ba zu Yésus môt a ne mvumvu’u amu a bili mbia nsisim. Yésus a titane mbia nsisim ate, a été été môt ve taté na a kobô. Abui bôt e ne valé e ne fe’e ne vema a da jô na: “Môt a nji yen aka’a jame di Israël.” Bepharisien be ne fe valé. Be vo’o sô’ane mesimba mete, nde ba beta ba’alane minkomekane miap a lat a ngule Yésus a belane je, be jô’ô na: “A va mimbia minsisim a ngul njô mimbia minsisim.”​—Matthieu 9:33, 34.

Mvuse mon éyoñ, Yésus a bulane vôm a nga bialé e Nazareth, éyoñe ji a ke a beyé’é bé. Mbu wua ôsusua, a nga ye’ele e synagogue, a bôte be nga nye’e mam a nga jô; ve mvuse ya valé be nga kañ a kômbô wôé nye amu mam a nga ye’ele be. Éyoñe ji Yésus a jeñe na a beta volô bôte ba be be be nga to vôma wua.

E môse Sabbat, Yésus a bulane synagogue na a ke ye’ele. Abui e ne fe’e ne vema a sili na: “Môte nyô a koé aka’a fe’e dina vé, a bitua bi mam a bo?” Ba jô fe na: ‘Ye sa mona kabinda nyô? Ye nyia wé a nji bo jôé na Marie? Bobenyañe ke na: Jacob a Joseph, Simon a Judas? Ye bekale bé bese be nji bo be bia va? E mam mese ma ma so nye vé?’​—Matthieu 13:54-56, Mfefé Nkôñelan.

Bôte ba simesane na Yésus a ne fo’o ve bialebiale ya vôm ate. Ba jô bebiene na, ‘Nga bi nga yene nye a yaé va? Nde aval avé a ne bo Messie?’ Amu nalé, ja’a mam mese ma bo’olô ajô dé, to’o beta fek a bili a beta be mam a bo, be nji buni nye. Amu ba tu’a yeme Yésus, ja’a bivuvumane bié bia kolé ôbak ajô dé, amu nalé nde a jô na: “Nkulu mejô a ne te wum si jé a nda jé.”​—Matthieu 13:57.

Yésus a kame na be nji bi mbunan abime di. Nde a nji bo mesimba valé “nga fo’o ve ayôme minkôkon a nga beté mo, mi ve bo mvo’é.”​—Marc 6:5, 6, Mfefé Nkôñelan.