Mam bi ne yé’é a avale Yésus a nga bo éyoñ a nga tôbane meve’ele

Éyoñe Jean a duya Yésus, mvuse ya valé, nsisime Zambe wo ke Yésus fé ya Judée. A bili abui mame ya fas. Éyoñe Yésus a nga duban, “yôp e nga kandan.” (Matthieu 3:16) Ane a nga beta simesane mam mese a nga yé’é a bo éyoñ a mbe yôp. A bili fo’o abui mame ya fas!

Yésus a tabe fé été mimôse 40 a melu 40. Nté ôte ôse, a teke di jôm éziñ. Nde, éyoñe Yésus a wô’ô mbia zaé, Satan Diable a subu nye bebé na a zu ve’ele nye a jô’ô na: “Nge ô ne mone Zambe, jô’ô meko’o ma me veñesa’ane fembé.” (Matthieu 4:3) Mbôl a yeme na, a nji yiane belane ngule jé na a jalé miñyiane mié, Yésus a nji ku meve’ele mete.

Diable a nji su’u ve valé. A jeñe zene fe ya ve’ele nye. A kate Yésus na a yôô temple yôp a ku si. Ve, e bo beta asimba ate a nji ke Yésus ôsimesan. Yésus a belan éfuse ya Bible asu na a liti na, e ne abé ya ve’ele Zambe a avale mboon ete.

Nde Diable a beta ve’ele nye éyoñe lale, a liti nye “bijôé bise ya si ése a duma ese y’été,” a jô’ô nye na: “E biôme bisese’e bi, ma ye ve wo bie, nge ô kumbu si a kañe ma.” Ane Yésus a jô nye na: “Kelek a Satan!” (Matthieu 4:8-10, Mfefé Nkôñelan) A nji ku meve’ele mete amu a yeme na, Zambe étam nnye ba yiane kañ. Ôwé, Yésus a tyi’i na, a ke ôsu a wulu ba’aba’a a Zambe.

Bi ne yé’é abui mam a meve’ele mete, a avale Yésus a nga dañe me. Meve’ele mete me mbe fo’o été; nalé a liti na, Diable a nji bo ve zezé éve’ela ya abé aval abui bôte da simesan. Bi nji yene nye, ve a ne vevee. Nkañete wu wo liti fe na, Diable nnye a ne bijôé bise y’émo; bi ne nye mo été. Nge sa nalé, aval avé mveane Diable a nga kômbô ve Krist bijôé bite é nga ye bo nye meve’ele?

A nde fe, Diable a nga kate na, a bili nkômbane ya ve Yésus bijôé bise y’émo nge a kumbu si a kañe nye. Diable a ne fe ngule ya belane mezene mete na a ve’ele bia, a liti bia mezene ya bu’uban akum, éjôé, nge ke beta nkôñ émo ji. Nde éyoñe bia tôñ abo dulu Yésus a ke ôsu a wulu ba’aba’a a Zambe ja’a bia tôban avale meve’ele ese, bia liti na, bi ne fo’o fek! Ve, te bia vuane na, Diable a nga kandan a Yésus “akekui éyoñ éfe.” (Luc 4:13, Mfefé Nkôñelan) A ne fe bo avale da a bia, nde bia yiane tabe ntyel.