Minsili bôte ba sili
Amu jé Yésus a nga jô na: “Te si’a ko na me zuya ve mvo’é si nyô”?
Yésus a nga ye’ele beyé’é bé na be nyiñe mvo’é a bôte bevok. Ve môs éziñ a nga jô be na: “Te si’a ko na me zuya ve mvo’é si nyô. Me nji zu ve mvo’é, ve nkpwate mekôn. Amu me nga zu bo môt ba ésa wé be kanda’an, a minga ba nyia wé be kanda’an, a mbom ba ntyi be kanda’an.” (Mt. 10:34, 35) Jé Yésus a mbe a kômbô’ô jô?
Yésus a nji be a kômbô’ô tyam menda me bôt, ve a mbe a yeme’e na miñye’elane mié mii bo na bibu’a ya menda me bôt bi kandan. Ajô te, môt ase a kômbô bo ñyé’é Yésus a nyoñ mbaptizô, a yiane yeme na ntyi’an ôte ô ne bo na bibu’a ya nda bôte jé bi wô’ô ôlun. Nge nnôm, ngal, nge ke ébu’a éfe ya nda bôt ja wosane nye, e ne bo ayaé na a ke ôsu a tebe ne bip.
Kalate Zambe a lebe Bekristene na be tabe bôte bese mvo’é. (Bero. 12:18) Ve miñye’elan mi Yésus mi ne bo ane “nkpwaté mekôn” menda me bôte méziñ. Jam ete e ne kui nge ébu’a éziñ ya nda bôt ja kañese miñye’elan mi Yésus nté bibu’a bivo’o bia wosane mie. Éyoñ nalé a kui, bibu’a bivo’o ya nda bôt bia bo “besiñ” be nyi a nga taté na a yé’é benya mejôô.—Mt. 10:36.
Abui beyé’é be Yésus da nyiñ a bibu’a ya menda me bôt bi ne ñyebe ôfe, ajô te nye’an ba nye’e Yéhôva ba Yésus ô ne tebe meve’ele été. Éve’an é ne na, bôte ya nda bôte jap be ne tindi be na be jeme mebô’ô me tii a évus ékaña’a. Éyoñ nalé a kui, ba yiane tyik za nnye bé ve nlem avak. Yésus a nga jô na: “Môt a nye’e ésa nge nyia a dañ abim a nye’e ma, a nji bo aka’a môt da yiane bo môte wom.” (Mt. 10:37) Yésus a nji be a kômbô’ô jô na asu na môt a bo ñyé’é wé, a yiane sé’é nye’an a nye’e bebiaé bé. Ve a nga volô be na be liti jam da dañe mfi binyiñ biap. Ajô te, to’o bibu’a ya menda me bôte mangan bia wosane bia amu bia kañe Yéhôva, bii ke ôsu a nye’e be, ve bia yeme na nye’an bia nye’e Zambe ñwô bia telé ôsu.
Teke bisô na, nlem wo bo bia mintaé éyoñ bia tôbane mewosan nda bôt été. Ve Bekristen ba yeme mejô me Yésus ma: “Môt a bo te be’e [élé mintaé] jé a toñe ma, a nji bo aka’a môt da yiane bo môte wom.” (Mt. 10:38) Nalé a tinane na, Bekristen ba yene mewosane ya nda bôt ane ngabe jia ya minju’u beyé’é be Yésus ba yiane kañese jibi. Nde fe, be bili ndi nleme na, mbamba ntaban wop é bo na bibu’a ya menda me bôte map bi tyendé ôsimesan, a na bi bi nkômbane ya vô’ôlô mejô me Zambe.—1 P. 3:1, 2.