ÉNYIÑE BEKRISTEN

Mfefé jam asu ésulane ya zañe sondô

Ataté Ngon ôsu ya mbu 2018, ayé’é ya zañe sondô da ye bi meyemé asu ayé’é a média ba te nyoñe New World Translation of the Holy Scriptures (nwtsty) a ndôme kui nkol asu ayé’é, ja’a kalate a ne asu ayé’é a ngenan teke kui nkobô wônan. Teke bisô, mefoé bia ye nyoñ été, ma ye volô bia na bi kômesane bisulan. Ngo’o nge fatan ayé’é ete e ne volô na bi bo beta jam a ne mfi na, bi subu Ésa wongane ya yôp Yéhôva, bebé!

MEYEMÉ ASU AYÉ’É

Meyemé asu ayé’é ma ve mefoé ma lat a metum, géographie, a nkobô ya abui bifuse ya Kalate Zambe.

Matthieu 12:20

Nsañ ô ngenan ô kui ôtita: Melu mvus, be mbe be belane kôba, nnye ate a mbe abôndé é too nkôman a tyia, a njalan a mbon olive. Be mbe be futi’i nsañ mbon été asu na lambe a yôñ. Éfia Grek ba kôñelane na, ‘nsañ ô ngenan ô kui ôtita,’ ô ne bo nsañ wo kui ôtita amu ô ndôme dim, ve nkaba’a ô nji beta bo. Nkulan ajô Ésaïe 42:3 ô nga kobô ajô ya nkoon éngôngole Yésus; Yésus a ye vaa mone ndi nlem éngôngole môt é nga’an é bili.

Matthieu 26:13

Ma jô fo’o mia na: Éfia Grek a·menʹ ja so bikanga ya nkobô Hébreu ʼa·menʹ ja tinane na, “é bo’o nalé,” nge na “teke vaa nge beté.” Yésus a mbe a bela’ane je éyoñ ése na, a kobô nya ajôô, a bo ngaka’a, nge kuli ajô; nalé a mbe a yemete na jam a jô é ne été a da ye fo’o bobane nalé. É ne njôane na, mbelane Yésus a mbe a bela’ane “ma jô fo’o mia na,” nge amen, ô ne ve mimfufup mintilan été. Éyoñe ba ba’alan éfia éte fifiti (a·menʹ a·menʹ), ane bia koone je kalate Jean, ba kôñelane mejô me Yésus mete na, “ma bele fo’o ane ma jô mia na.”—Jn 1:51.

MÉDIA

Befôtô, minkañane mi biôm, bevidéo be nji kobô a bive’ela bia fô’ôsan, ma kat abui mam me ne Kalate Zambe été.

Bethphagé, Nkôle Beolivier, a Jérusalem

Mone vidéo nyi a liti zene ja ke Jérusalem vôme jôp da tôô, ataté nlame ba loene dene na et-Tour—nnye ate a mbe Bethphagé ya melu ya Kalate Zambe—akekui vôme ya Nkôle Beolivier wo dañ ôyabe yôp. Béthanie a ne mbo nnôme Bethphagé, asiliki Nkôle Beolivier mbo nnôm. Éyoñe Yésus ba beyé’é bé be mbe Jérusalem, be mbe be bili fulu ya ke bômbô Béthanie; éyoñe ji ba loene tison éte na El-Azariyeh (El-Eizariya). Éyôlé éte é ne nkobô Arabe, a ja tinane fulasi na, “La place de Lazare.” Teke bisô, Yésus a nga tabe nda Marthe, Marie, a Lazare. (Mt 21:17; Mc 11:11; Lc 21:37; Jn 11:1) Éyoñ a nga té nda jap na a ke Jérusalem, Yésus a nga yiane nyoñe zene ja funane nyi bia yene vidéo. Ngone Nisan é too melu 9 ya mbu 33 É.J., éyoñe Yésus a nga bete mon éjakase yôp na a ke Nkôle Beolivier e Jérusalem, a mbe a yiane so Bethphagé, a tôñe zene ya Jérusalem.

Njoñ wo taté Béthanie akekui Bethphagé
Bethphagé
Nkôle Beolivier
Ôtôñe Cédron
Nkôle ya vôme Temple a tele

Sen é beme étimekili

Fôtô nyi a liti éve’ane ya étimekili ya môt be nga bômelé sen étyé é mbe 11,5 cm. Nya étimekili ate émien a nga yené mbu 1968; môt ate a nga yiane nyiñ éyoñe Beromain. Be nga yen étimekili éte e Nord ya Jérusalem éyoñe be nga vune vôm ate. É ne fo’o ndeme ya na, be mbe be bela’ane mesen asu ya na, be tyelé môt aboñ élé. Sen éte é mbe é yiane funane nyi Beromain be nga belane je na, be tyelé Yésus Krist élé. Be nga yen étimikili éte éwolo mekok ba loone fulasi na ossuaire, vôm ate nnye be mbe be futi’i bivese bi môt a wuya, éyoñe minsôn mié mi maneya boé. Nalé a mbe a liti na, mvuse ya valé, be mbe ngule ya jame môte be nga wôé aval da yian.—Mt 27:35.