Ye mebô’ô mese me ne mvo’é mise me Zambe?

Yéhôva a yi na bi kôme bu’uban ényiñ a na bi bo bi nyoñe’ éyoñ ya vôman. Ve ye mebô’ô mese mme a yene mvaé? Aval avé bi ne liti Yéhôva na bia nye’e nye éyoñ bia vôman?

1. Amu jé abui mebôk da lu’ane ki a nkômbane Yéhôva?

Éko éziñ wé ku avem éyoñ wé yeme na abui mebô’ô bôte ba jeme den da lu’an ki a miñye’elane ya Kalate Zambe, a na me tii a évus ékaña’a. Nde fe na, abui mebô’ô ya été e bili élat a mimbia minsisim, a ma su’u ñye’elane wo jô na nsisime môt ô ne teke wu. Mebô’ô méziñe ya été ma tôñe metum me bôt, nge ke ôsimesane wo jô na nge môt a bo teke tôñe metum méziñ, mbia jam é kui nye. (Ésaïe 65:11) Yéhôva a jô bebo bisaé bé na: “Kuian atan . . . a te nambane jôm é ne mvin.”​—2 Becorinthien 6:​17.a

2. Yéhôva a wô’ôtan aya éyoñ bia jeme mebô’ô ma ve bôte duma da yiane ke be?

Yéhôva a jô bia na bi tabe ntyele ya ku ôlame ya “buni môt.” (Lañe’e Jérémie 17:5.) Mebô’ô méziñ ma wumulu bejô bôt a beta bebo bita. Mebô’ô mevo’o ma bo na bôte be simesan éyoñ ayoñe dap e nga bi éto fili, nge ke na be kañ mendeme ya ayoñ. (1 Jean 5:​21) Ba bo fe mebô’ô méziñ asu na be wumulu bikôan bi pôlitik. Aval avé Yéhôva a wô’ôtan éyoñ bia wumulu bôte nge ke bikôan biziñ a too ke na ba wumulu mam a vini?

3. Jé é ne bo na abô’ô éziñ e yené abé mis me Zambe?

Bible a tyili “minso’an mi vin, njeman mbia mebôk, [a] mbia bisulane ya di a nyu.” (1 Pierre 4:3) Éyoñe ba bo mebô’ô méziñ, e wô’ô kui na bôte be kate jôé bebien, a ku ôlame ya bijabô. Asu na bi ba’ale élate jangan a Yéhôva, bia yiane sa’ale avale mvite mimboon ete.

TUKA’A FAK

4. Sa’ale’e mebô’ô me ne abé mise me Yéhôva

Lañe’e Beéphésien 5:​10, mvuse ya valé, yala’ane minsili mi:

• Jé wo yiane taté jeñe na ô yem ôsusua na wo tyi’i na wo jem abô’ô éziñ?

• Mebô’ô mevé ma wum vôm ô too?

• Ye wo simesane na mebô’ô mete ma ve Yéhôva nlem avak?

Bi tame kobô ajô abôk abialé. Ye ô tameya sili womien nge Zambe a wô’ abô’ô ete mvaé? Kalate Zambe a nji jô afôla éziñ na mbo ésaé Yéhôva a nga jem abôk abialé. E ne été na, a nga kobô ajô abô’ô ete biyoñe bibaé, ve bôte ba kañe ke nye mbe be nga jeme de. Lañe’e Metata’a 40:​20-​22 a Matthieu 14:​6-​10, mvuse ya valé, yala’ane minsili mi:

• Jé é nga boban mebô’ô mete mebaane?

• Éyoñ wo fombô minkañete mite, wo simesane na Yéhôva a wôk abôk abialé aya?

Ve, ô ne sili womiene na, ‘Nge ma tyi’i na ma jem abôk abialé nge ke abôk afe Kalate Zambe a nji kañese, ye jam ete e ne ndeñele Yéhôva?’ Lañe’e Nkôlan 32:​1-8. Mvuse ya valé, futi’i VIDÉO, a yala’ane minsili mi:

VIDÉO: Mebô’ô Zambe a vini (5:07)

• Amu jé bia yiane jeñe na bi yemelane mam me ne mvo’é mise me Yéhôva?

• Aval avé bi ne bo de?

Aval ô ne yem nge abôk éziñ e ne mvo’é mise me Zambe

• Ye abô’ô ete da lu’an a miñye’elane ya Kalate Zambe? Asu na ô yem, jeñe’e na ô fas aval avé abô’ô ete e nga taté.

• Ye abô’ô ete da wumulu bôt, bikôan biziñ, nge ke mendeme ya ayoñ? Yéhôva étam nnye bia yiane ve duma, a bi too ndi na nnye étam é zu vaa minju’u mise bia tôbane mie si va.

• Ye metume ya abô’ô ete ma wosane memvinda ya Kalate Zambe? Bia yiane ba’ale biabebiene mfubane mise me Zambe.

5. Volô’ô bôte bevo’o na be semé mam wo buni

VIDÉO: Timi’in mam wo buni évôvoé été (2:01)

Lañe’e Matthieu 7:​12, mvuse ya valé, yala’ane minsili mi:

• Aval éfuse ji ja jô, ye wo yiane kat évuvumane jôé ja kañe ki Yéhôva na a yiane ki jem abô’ô éziñ a too ke na a yene abô’ô ete mvaé?

• Aval avé ô ne liti bôte ya nda bôte jôé na wo nye’e be akusa bo wo jeme ki mebô’ô méziñ a be?

6. Yéhôva a yi na ô nyiñe meva’ été

Yéhôva a yi na bi nyiñe meva’ été a nda bôte jangan a bemvôé bangan. Lañe’e Ecclésiaste 8:​15, mvuse ya valé, yala’ane nsili wu:

• Aval avé éfuse ji ja liti na Yéhôva a yi na bi nyiñe meva’ été?

Yéhôva a yi na bebo bisaé bé be bu’uban ényiñ a na be vôman nsamba. Futi’i VIDÉO asu na ô yem aval avé jam ete da kôme yené éyoñe ya beta bitôkane biangan.

VIDÉO: Beta bitôkan biangan bia soo bia abui mevak (5:​40)

Lañe’e Begalate 6:​10, mvuse ya valé, yala’ane minsili mi:

• Ye wo yiane yange abô’ô éziñ asu na ô bo bôte “mam me ne mvaé”?

• Wé dañe bi mevak éyoñ évé? Ye éyoñ ô ne ntindane ya ve môt jôm éziñ amu na abô’ô éziñ e ne, nge ke éyoñe wo ve nye je amu wo kômbô de bo?

• Abui Bengaa be Yéhôva e wô’ô bo mebôk asu bone bap a dasé be. Nge ô bili bon, mbamba be mam bevé ô ne bo asu dap?

ÔBALEBAS

Yéhôva a yi na ô kôme bu’ubane mbamba biyoñ a nda bôte jôé a bemvôé bôé. Ve a yi fe na ô sa’ale mebô’ô me ne abé mise mé.

Ô ne yalan aya?

• Minsili mivé ô ne sili womien asu na ô yem nge abôk éziñ e ne abé mise me Yéhôva?

• Aval avé ô ne volô nda bôte jôé a bemvôé bôé na be kôme wô’ô ntyi’ane wôé a lat a mebô’ô wo jeme ki?

• Jé ja liti na Yéhôva a yi na bi vôman a na bi nyiñe meva’ été?

MAM MEFE ME NE VOLÔ WO

Yene’e mebô’ô méziñ Bekristen ba yiane ki jem.

“Amu jé Bengaa be Yéhôva be ne teke jeme mebô’ô méziñ?” (Ô ne koone nye anjeñe mefoé dangan)

Yene’e mam menyiñ ma liti amu jé bia buni na abôk abialé e ne abé mise me Zambe.

“Amu jé Bengaa be Yéhôva be nji bo mebô’ô ya abialé?” (Ô ne koone nye anjeñe mefoé dangan)

Tame yen ane mone mongô a nye’e Yéhôva a ve mbamba éyalan éyoñ a yen ékpwe’ela sikôlô.

‘Ô ne édima mis me Yéhôva’ (11:35)

Bemillion Bekristen be nga tyi’i na ba jeme ke abô’ô Kilisimas. Amu jé be nga nyoñe ntyi’an ôte?

“Ils ont trouvé mieux” (Nkume mmombô a bete ya Ngon awôm a baa é too alu da, mbu 2012)