A ve betoyini be bôte bidi a bone be belet a kos

Minlôman awôm a mibaé mi nga wô’ ôbane nkañete ya Galilée mvaé, a mia kañete Yésus “abime mam ese be nga bo, a ye’ele.” É ne été na be te’eya. To’o nalé, be nji ke ve’ele bi éyoñe ya di amu abui bôte da so a ke. Nde Yésus a jô be na: “Mia kik, tameka zuan bi ke avie, e vôm a ne teke bôt, mi nyoñe mon awo’on.”​—Marc 6:30, 31, Mfefé Nkôñelan.

Ba dañ éfunga été, éko éziñ e fefele Capernaoum a ke vôme bôte be nji bo mfa’a ya est ya Ôsôé Jourdain, e Bethsaïda yat. Ve, abui bôte da yen ane ba ke, a ba bevo’o ba wô’ô foé éte. Nde ba bume mimbile na ba ke yange éfunga e kindik.

Éyoñ a kôlô éfunga, Yésus a yene nsamba bôt, ane a wô’ô be éngôngo amu be ne ane mintômba mi ne teke mba’ale. A taté fe na “a ye’ele be [abui mam]” a lat a Éjôé. (Marc 6:34) A taté fe na a saé ‘bôt ba kômbô saban.’ (Luc 9:11) Éyoñ éyoñe ja lôt, beyé’é bé ba jô nye na: “Vôme nyô bôt be nji tabe été, awolo ki e lôteya abui, su’u bôt be ke mfa’a minlam mi né na be kuse bebiene bidi.”​—Matthieu 14:15, Mfefé Nkôñelan.

Yésus a yalane be na: “Be nji yiane ke; miabebien, va’ane be bidi be aye di.” (Matthieu 14:16) Ja’a na Yésus a nga yeme jôm a zu bo, a ve’ele Philippe a sili’i nye na: “E ne bia ye ke kuse belet vé na bôte ba be di?” Philippe a ne fo’o môte ba yiane sili nsili ôte amu nlame wé ô ne fefele Bethsaïda. Ve, e kuse belet a nji bo bo mfi, amu befam be ne valé be ne bebé 5 000. A tañe bôt éte é ne ba’aban nge ba lañe binga a bongô! Philippe a yalan a jô’ô na: “Belet tañe bedenié mintete mibaé, é vo’o yiane môt ase na a nyoñe ve mon ôfus.”​—Jean 6:5-7, Mfefé Nkôñelan.

Éko éziñ amu a kômbô liti na, be vo’o ve bôte bete bese bidi, André a jô na: “Mongô éziñ a ne va, a bili belet étaan a kos ébaé: ve jôme té é ne jé asu abim abui bôte di?”​—Jean 6:9 Mfefé Nkôñelan.

Bi nto Ngone lale nge Ngone nyini, a Paque ya mbu 32 É.J. a mbeme zu kui, a mimfefé bilo’o mia buti abôbône nkôl. Yésus a kate beyé’é bé na be jô bôte na be tabe bilok, be too nta’ane mengôse me bôte 50, mevo’o ki bôte 100. Ane a nyoñe belet étan a kos ébaé, a ve Zambe akéva. Éyoñ éte a be’e belet a kabe fe kos bone mengap. Yésus a ve bie beyé’é na be kabe bie bôt. Jame ya kam e ne na, bôte bese ba di a jaé!

Mvuse ya valé, Yésus a jô beyé’é bé na: “Kelane mia to’é afufus ese da te buk, jôm éziñ é bo te ja ntuk.” (Jean 6:12, Mfefé Nkôñelan) Be ne ngule ya jalé minkoé 12 a afufus é nga bu’u!