Te bo na “ayôme bone” Yéhôva e kolé ôbak

1. Jé Yéhôva a nga bo asu môt ase ya be bia?

YÉHÔVA a nga dutu môt ase ya be bia be nye. (Jean 6:44) Nalé a tinane na éyoñ Yéhôva a nga yene bizu’u bi bôte bise bi ne si nyô, a nga yen édima jôm be wo, a nga yen na ô bili mbamba nlem, a na ô ne ngule ya nye’e nye. (1 Mka. 28:9) Yéhôva a yeme wo, a yeme tebe été jôé, a nye’e fe wo. Nga jam ete da ve wo ngule nyul?

2. Aval avé Yésus a nga liti na Yéhôva a nyoñ ngab a mintômba mié mise?

² Avale Yéhôva a nyane wo, nde fe a nyane bobejañ a besita bevo’o ya akônda nalé. Asu na a volô bia na bi tu’a wô’ô jam ete, Yésus a nga ve’e Yéhôva a mba’ale mintômba. Nge mbam mintômba ô bili mintômba ntet, éyoñ ete wua wo jañ, mba’ale mintômba a ye bo aya? “Ke a [ye] li’i [mintômba] mewôm ébul a ébu, a ke minkô a jeñe wu ô dimiya.” Éyoñ mba’ale mintômba a yen ntômba ôte, a bôme ke wô, a viane vak. Ñye’elan ôvé bia nyoñe valé? Ntômba Yéhôva ôse ô ne édima mise mé. Yésus a nga jô na: “Éso wônan ya yôp a nji nye’e na mone wua ya [ayôme] bone di a . . . jañ.”​—Mt. 18:12-14.

3. Jé bia zu yen ayé’é di?

³ Teke bisô na ô vo’o yi na monyoñ a te’e nsisim amu jam ô nga jô nge bo, sa nalé? Jé bi ne bo asu na te bia kolé bôte bevo’o ôbak? A jé bi ne bo nge môt éziñ a kolé bia ôbak? Bii yalane minsili mite ayé’é di. Ve bia zu taté yene beza Matthieu kabetôlô 18 a loone na “aka’a [nge ke, ayôme] bone di”

BEZA BE NE “AYÔME BON”?

4. Beza be ne “ayôme bon”?

⁴ “Ayôme bon” Yésus a jôô de e ne beyé’é bé bese, bongô a benya bôtô. Be kusa bi ôkala ôvé, be ne “bitum bi bon” amu ba yi na Yésus a ye’ele be. (Mt. 18:3) Akusa bo ba so mesi mesi, be bili fe mefulu a metum me sela’an, bese ba buni Krist, a Krist fe a nye’e be abui.​—Mt. 18:6; Jean 1:12.

5. Yéhôva a wô’ôtan aya éyoñ môt a kolé mone wé ôbak?

⁵ “Ayôme bon” ete ese e ne édima mise me Yéhôva. Asu na bi wô’ avale Yéhôva a yene be, bia yiane fombô avale biabebien bia yene bon. Bia nyane be. Bia jeñe na bi kamane be amu be bili ki ngule nge fek ane benya bôtô. Bi ne teke nye’e bi yene’ ane môt a ndeñele nyi mbok, ve bia dañe wô’ô abé éyoñ môt a ndeñele étume mon. Aval ete da da, Yéhôva a kômbô kamane bia. A wô’ô angôndô ya abé éyoñ a yene môt éziñ a kômbô’ô kolé mone wé ôbak.​—És. 63:9; Marc 9:42.

6. 1 Becorinthien 1:26-29 a liti na émo ja yene beyé’é be Yésus aya?

⁶ Mfa’a ôvé ôfe beyé’é be Yésus be ne ane “ayôme bon”? Avale bôt avé émo ja semé? Bôte be bili akum, ba ba wum, a bôte be bili éjôé. Ve ja yene beyé’é be Yésus ane zezé bôt, ane ayôme bongô. (Lañe’e 1 Becorinthien 1:26-29.) Ve Yéhôva nye a yene ki be nalé.

7. Aval avé Yéhôva a yi na bi yene bobejañe a besita?

⁷ Yéhôva a nye’e bebo bésaé bé bese, ba be boya nye ésaé abui mimbu a ba be ndeme yeme benya mejôô. Bobejañ a besita bangan bese be ne mfi mise me Yéhôva, ajô ete, ba yiane fe bo mfi mise mangan. Bia yiane ‘nye’e bobenyañ’ bangan bese, sake mingum mi bôt. (1 P. 2:17) Bia yiane bo nkômesane ya bo jam ese bi ne ngule ya bo asu na bi kamane be a nyoñ ngab a be. Nge wo wô’ô na jam éziñ wo te bo monyoñ da kolé nye ôbak, ô nji yiane ba’a mo a jô na a dañ ôngase, a na a yiane vuane dili. Jé é ne bo na bobejañ béziñ be ji’a wô’ô ôlun? Éko éziñ mame me nga kui be ényiñ ma bo na be wô’ô bebien éngôngol. Bevo’o ki, be ndeme yeme benya mejôô, ajô ete, be ngenane teke yeme ji’a jamé bôte bevok. Ja’a bia wô’ôtan aya, jame bia yiane jeñ e ne ve na mvo’é é bo akônda été. Nde fe, nge môt a yemelane na a ne ôngase, a yiane jeñe na a tyendé mbia fulu ate. A yiane bo jam ete asu mvo’é jé émien a asu na a ba’ale mbamba élat a bobejañ.

SEMÉ’É BÔTE BEVO’ ADAÑE ABIME WO SEMÉ WOMIEN

8. Éyoñe Yésus a mbe si va, jé é mbe é dañe mfi mise me bôt?

⁸ Amu jé Yésus a nga kobô ajô “ayôme bon”? A ne amu beyé’é bé be nga sili nye na: “Za a dañ, ayoñ ya yôp?” (Mt. 18:1) Abui Bejuif e mbe e yi’ na bôte be semé be a wumulu be. Ñyeme mam éziñ a jô na: “Jam e mbe e dañe mfi mise me bôt e mbe ve na bôte be wumulu be, a na be ve be duma.”

9. Jé beyé’é be Yésus be mbe be yiane’ bo?

⁹ Yésus a mbe a yeme’e na Bejuif be mbe be nye’e be suñu’u minkôñ, ajô ete, beyé’é be Yésus be nga yiane ve ngul asu na te ba vu be. A nga jô be na: “Môt a ye bo éwôlô môt be mia, a ye bo ane mongô; a môt a tele mia ôsu, a ye bo ane môt a bo mia bisaé.” (Luc 22:26) Bia bo ane “mongô” éyoñ môt ase ya be bia a ‘semé nyô mbok adañe abim a semé émien.’ (Beph. 2:3) Nge bi bo de, nalé é volô na bi bo teke dañe kolé bôte bevo’ ôbak.

10. Melebe me Paul mevé bia yiane tôñ?

¹⁰ Nge bia kôme fas, bii yene na môt ase ya akônda a dañe bia mfa’a éziñ. Bii yene jam ete tyi’ibi nge bia nyoñ éyoñe ya fombô mbamba mefulu map. Bia yiane ba’ale melebe me Paul ma: “Za a bo wo na, ô bo aval afe? A za jômô ô bili, nje ô nga bo te nyoñ? Ve nge ô nga nyoñe je, amu jé wo wumu womien aval ane nge ô nji nyoñe je?” (1 Bec. 4:7) Jôm ete nje ñhe bi nji yiane jeñe na bôt be wumulu bia nge ke na bi yene biabebien nkenge. Éve’an é ne na, nge mojañ éziñ a yeme bo minkañete a nge sita éziñ a ne atyeñ mfa’a ya taté meyé’é, Yéhôva nnye bese ba yiane ve duma.

JAMÉ’ A NLEM ÔSE

11. Nkana njô bôt ba mbo ésaé wé wo ye’ele bia jé?

¹¹ Éyoñe Yésus a maneya kate beyé’é bé na be nji yiane kolé bôt bevo’ ôbak, a nga kane be nkana njô bôt a mbo ésaé wé. Njô bôt ate a nga jô mbo ésaé wé na a bo teke beta ya’ane beta ékôla a mbe a bili nye. Mvuse ya valé, mbo ésaé ate a nga ke bi mbo ésaé mbo’o na a mba’a ve mane ya’an ékôla a mbe a bili nye, a too ke na ékôla éte é mbe tyôtyoé adañe ji a mbe a bili njô bôt. Ane njô bôt a nga wua mbia mbo ésaé ate mimbôk, amu a nga bene mvamane môt mbo’ avale njô bôt émien a nga mvamane nye. Jé nkana ôte wo ye’ele bia? Yésus a nga jô na: “Nalé fe Tate wom a ne yôp a ye bo mia, nge mia môt ase a bo te jamé monyañ nleme wé.”​—Mt. 18:21-35.

12. Aval avé bia ndeñele bôte bevok éyoñe bia bene jamé?

¹² Jame mbo ésaé a nga bo e nga telé émien mbia été, ve e nga ndeñele fe bôte bevok. Jam ôsu, a nga liti na a ne njet éyoñ a nga bi nyi a mbe a bili nye moné, a fete “nye nda mimbôk, . . . akekui éyoñ a ye ya’ane nye akum a bili nye.” Jame baa, mboane wé ô nga ndeñele bebo bisaé bevok, amu “éyoñ . . . be nga yene jam e nga bo, be nga dañe wô’ ôlun.” Aval ete fe, mam bia bo me ne ndeñele bôte bevok. Nge môt a bo jam da kolé bia ôbak, éyoñe te bia bene jamé nye, jé é ne kui? Jam ôsu, bia bo nye nlem mintaé, amu bia bene jamé nye, a éko éziñ bii taté fe na bia sa’ale nye nge ke taté na bia vini nye. Jame baa, mboon ôte wo ye fe ndeñele bôte bevo’o akônda, amu bé yene na mvo’é é nji beta bo zañe bobejañ béziñ.

13. Jé jam e nga kui nkpwa’a mefan éziñ da ye’ele bia?

¹³ Éyoñe bia jamé bobejañ, ane ô vaa na nalé é ve biabebien mevak, é bo fe na bôte bevo’o be vak. Nkpwa’a mefan éziñ bi ne loone na Crystal, a nga kôme yene jam ete. Sita éziñ a mbe a kolé’é nye ôbak akônda dé. Crystal a jô na: “Mame sita ate a mbe a jô’ô ma me mbe biyoñe biziñ ve ane a jii ma ôtyeñ. Éyoñe bi mbe bi kele’e kañete vôm éziñ, me nji be me yi’ na bia nye bi bete bete metua wua. Jam ete e nga bo na me taté na ma wô’ô ésaé nkañete njuk, a bo éyôé.” Crystal a mbe a simesa’ane na a bili mbamba beamu ya wô’ô sita ate ôlun. Ane a nga tyi’i na a tame ke wutan nge ba’ale ôviti’i ziñ nlem. A nga tôñe melebe méziñe ya Nkume mmombô a bete ya Ngon awômô é too melu 15 ya mbu 1999, nlô ajô ô ne na “Pardonnez de tout votre cœur,” ane a nga jamé monyañ wé. Crystal a jô na: “Me nga yeme na bia bese bia biban na bi jaé mfefé môt, a na Yéhôva a bili nkômbane ya jamé bia môs ôse. Me nga wô’ôtan ane ba vaa ma mbe’e bitul. Ane me nga beta bo mevak.”

14. Matthieu 18:21, 22 a liti na nlôman Pierre a nga yen ayaé ya bo jé, a aval avé bi ne tôñe melebe Yésus a nga ve nye?

¹⁴ Bia yeme na bia yiane jamé bôte bevok, ve nalé a nji bo tyi’ibi éyoñ ése. Éko éziñ nlômane Pierre fe a mbe a wô’ôta’ane nalé biyoñ biziñ. (Lañe’e Matthieu 18:21, 22.) Ve jé é ne volô bia? Jam ôsu, bia yiane simesan abim avé Yéhôva a jamé bia. (Mt. 18:32, 33) Bi nji yian mvame jé, ve a jamé bia a nlem ôse. (Bs. 103:8-10) Aval ete da da, bia fe “bia yiane nye’esan.” Bi bili ve na bia jamé bôte bevok, teke aval afe. Bobejañ a besita bangan ba yiane na bi jamé be. (1 Jean 4:11) Jame baa, bia yiane simesane bibotan bia bi éyoñ bia jamé. Éyoñe bia jamé, bia volô môt a te kolé bia ôbak, bia bo na akônda e bo nlatan, bia kaman élate jangan a Yéhôva, a bia vaa biabebien beta mbe’e bitul. (2 Bec. 2:7; Beco. 3:14) Jam lale, ye’ela’ane Yéhôva, amu nnye a jô bia na bi nye’e bôte bevok. Te jô’é na Satan a ndamane ngul élat ô bili a bobejañ a besita. (Beép. 4:26, 27) Bia yiane sili Yéhôva mvolan asu na mvo’é é bo akônda été.

TE KAÑESE NA JAM ÉZIÑ E BO NA Ô KOLÉ ÔBAK

15. Becolossien 3:13 a liti na bia yiane bo jé éyoñe mojañ nge ke sita a bo bia jam da bo bia nlem mintaé?

¹⁵ Nge é bo ke na monyoñ a ke wo bo jam éziñ wo yen angôndô ya ayaé ya jamé? Wo yiane bo aya? Va’a ngul ése asu na mia nye mi tabe mvo’é. Kate’e Yéhôva avale wo wô’ôtan. Sili’i Yéhôva na a volô môt a te bo wo mbia jam, a na a volô fe wo, na ô yene mbamba mefulu mé, mefulu ma bo na Yéhôva a nye’e nye. (Luc 6:28) Nge wo kate vuan jôme monyoñ a te bo wo, jeñe’e mbamba zene ya laan a nye. Jam e ne volô wo e ne na ô jô womiene na, monyoñ a vo’o vañe bo wo mbia jam. (Mt. 5:23, 24; 1 Bec. 13:7) Nté mia nye mia laan, kele’ ôsu a yene nye ane mbamba môt. Jé ô ne bo nge a bene na mi kôm ajô? Kele’ ôsu a jibi monyoñ. (Lañe’e Becolossien 3:13.) Jam da dañedañ mfi e ne na, ô bo teke ba’ale ôviti’i ziñ, amu jam ete e ne ndaman élate jôé a Yéhôva. Te ve’ele kañese na jam éziñ e bo na ô kolé ôbak. Nge ô bo de, wo ye liti na teke jôm éziñ éfe wo nye’e adañe Yéhôva.​—Bs. 119:165.

16. Mbe’e ôvé môt ase ya be bia a bili?

¹⁶ Bi ne meva’a ya kañe Yéhôva fufulu a bobejañ “mbame wua,” bi bili “mba’ale wua.” (Jean 10:16) Kalate Organisés pour faire la volonté de Jéhovah a jô afep 165 na: “Mbôle bia bu’uban a mbamba élat a ne zañe bia be bobejañ, môt ase a yiane jeñe na a ba’ale élat éte.” Ajô ete, bia yiane ve ngule na bi yene bobejañ a besita avale Yéhôva a yene be: Bia bese bi ne édima “ayôme bon” Yéhôva. Ye nne wo fe wo yene bobejañ a besita nalé? Yéhôva a yene ngul ése wo ve asu na ô volô be a na ô nyoñ ngab a be.​—Mt. 10:42.

17. Jé bia yiane nyoñ ntyi’an ya bo?

¹⁷ Bia nye’e bobejañ a besita bangan bese. Ajô te, môt ase a bo “te bôé monyañe wé jôme ya kolé ôba’a zen, nge jame ya dume nye si.” (Bero. 14:13) Bia semé bobejañe bangan a besita bangan adañe abime bia semé biabebien, bia yi fe na bi jamé be a nlem ôse. Nde fe, bi nji yiane kañese na mame bôte bevo’o ba bo me kolé bia ôbak. Ve bia yiane tôñesan “mam ma [soo] mvo’é, a mam bia volane me biabebien.”​—Bero. 14:19.