Mfi ya jamé

Pierre a maneya wô’ô melebe Yésus a te ve mfa’a ya kôme mejô zañe bobenyañ, a zene ya taté ke laan a monyañ fo’o ve mia bebaé. Ve, é ne v’ane Pierre a kômbô yem abime biyoñe ba yiane de bo.

Nde Pierre a sili na: ‘A Tat mojañ a ye bo ma abé biyoñe tañ aya me jamé’é nye? Ye biyoñe zangbwal?’ Betebe ôsu ya bamiñyebe ba ye’ele na môt a ne jamé akekui biyoñe bilal. Nde Pierre a yiane simesane na nge a jamé monyañ ‘akekui biyoñe zangbwal’ nalé a ye liti na a ne mbamba nlem.​—Matthieu 18:21, Mfefé Nkôñelan.

Ve jame da, ôsimesan ya lañe tañe biyoñ môt a bo bia abé ô nji bo ñye’elane Yesus. Nde a sôan ôsimesane Pierre a jô’ô na: “Me nji jô wo na a kui biyoñe zangbwa, ve na zangwale biyoñ zangbwa.” (Matthieu 18:22, Mfefé Nkôñelan) Nalé a tinane na e jamé éyoñe y’éyoñ ése. Pierre a nji yiane tyi’i abime biyoñ a yiane jamé monyañ.

Ane Yésus a kane Pierre ba bôte bevo’o nkana na a liti be amu jé be ne ntindane ya jamé. Nkana ô ne wu mbo ésaé a nji vu mbamba nleme masa wé. Njô bôt éziñ a kômbô bo sito’o a bebo bisaé bé. Ba taté zu nye mbo ésaé a bili nye mvôla betalen 10 000 [60 000 000 deniers]. A nji bi jôme ya bulane mvôla te a zen éziñ. Nde njô bôt a bendé na be kuan émien a ngal a bone bé asu na a ya’ane mvôla. Ane mbo ésaé a ku mebo me masa wé a kute meboñ si a ye’elane nye na: “Tame jibi ma, a ma ye bulane wo mvôla ése.”​—Matthieu 18:26, Mfefé Nkôñelan.

Njô bôt ve wô’ô nye éngôngol a wô’ô nye mintaé, nde a mane jamé nye beta mvôla wé. Éyoñ njô mbôt a maneya a nye, mbo ésaé ve kui atan a tôban ébe mbo ésaé wé, nyô a bili nye bedenier 100. Nde a bi nye a miate nye tyiñ a jô’ô na: “Bula’an jôm ô bili.” Ve ébe mbo ésaé a ku si a nga ye’elane nye a jô’ô na: “Jibi’i ma, ma ye ya’ane wo.” (Matthieu 18:28, 29, Mfefé Nkôñelan) Ve jame da, mbo ésaé njô bôt a te jamé a nji ve’ele vu masa wé. Nye ve futi ébe mbo ésaé wé mimbôk akekui na a mane ya’ane nye mvôla jé.

Yésus a ke ôsu a jô na, éyoñ beébe bebo bisaé be yeneya mbia mboone te, ba ke kañete masa wop jam da te boban, nde masa a loone nye a jô nye na: “A wo mbia mbo ésaé, me nga jamé wo mvôla jôé ése amu ô nga ye’elane ma; nga wo fe ô nga yiane ko ébe mbo ésaé wôé éngôngo ane ma fe me nga ko wo éngôngo?” Njô bôt ve zu wô’ô ôlun a kee mbia mbo ésaé e mo be minjenjete mi bôt mia ba’ale mimbôk akekui a ye mane ya’ane tañ mvôla ése a bili. Yésus a suu nkobô a jô’ô na: “Avale te fe Ésaa wom a ne yôp a ye bo mia nge mi nji jamé môt ase monyañe wé, njaman wo so nye nlem.”​—Matthieu 18:32-35, Mfefé Nkôñelan.

Beta ñye’elane ñhe le bia bi a lat a njaman! Zambe a nga jamé bia beta mvôla ya abé. Ja’a monyañ wongane ya nsisim a bo bia jé, jam ete é vo’o lôt abé dangan. Nde fe, Yéhôva a nji jamé bia ve éyoñe jijia, ve betoyini biyoñ. Nde, ye bi nji yiane jamé bobejañ bangan abui biyoñ ja’a bi bili beamu ya wô’ô be abé? Fo’o v’avale Yésus a nga ye’ele Nkañete ya nkôle yôp, Zambe a ye ‘jamé bia abé bi boya nye ane bia fe bia jamé abé bôt be boya bia.’​—Matthieu 6:12, Mfefé Nkôñelan.