Yésus a kulane betebe ôsu ya ñyebe ba siñe nye

Betebe ôsu ya miñyebe ba siñe Yésus be nji kui na be samele nye, nge bi nye na be ke nye be Beromain. (Luc 20:20) Éyoñe ji, nté a ngenan e temple, e Ngone Nisan 11, Yésus fe a telé be meve’ele été, a liti fe be za a né. Émien a sili be na: “Mia simesan aya ajô Krist? A ne mone za?” (Matthieu 22:42) Bôte bese ba kôme yeme na Krist, nge na Messie a so mvoñe bôte David. Éyalane te nje fe ba ve nye.​—Matthieu 9:27; 12:23; Jean 7:42, Mfefé Nkôñelan.

Nde Yésus a sili be na: “Nge nalé, nsisim ô nga liti David na a loene nye Tate aya, éyoñ a nga jô na, Tate [Yéhôva] a nga jô Tate na, Tabe’e si mbo nnôme wom, akekui éyoñ me aye bôé bôt be asiñe wo mebo môé si? Nge David a loene nye na Tate, wôna a ne mone wé aya?”​—Matthieu 22:43-45.

Bepharisien ba ku bivô, amu ba buni na môt a ye so mvoñe bôte David a zu va be éjôé Beromain si. Ve éyoñ a tu’a timine mame me ne ntilan Besam 110:1, 2, Yésus a kôme liti na Messie a ye bo ve zezé njô bôt a ne môta binam. A ne Tate David, nde ñhe éyoñe a ye tabe mbo nnôme Zambe, a ye nyoñ éjôé. Éyalane Yésus a ve ja bo na besiñe bé be tabe ne mieññ.

Éyoñe ji, Yésus a kobô asu beyé’é bé a abui bôt afe da vô’ôlô nye. A ve be abendé a lat a bescribe a Bepharisien. Amu bôte bete be “to éto Moïse” éyoñe ba ye’ele Atiñe Zambe. Ane Yésus a jô bôte ba vô’ôlô nye na: “Ajô te mejô mese be ajô mia, bo’ane me a ba’ala’ane me: ve mam be abo, te boane me; amu be ajô mejô te bo me.”​—Matthieu 23:2, 3.

Éyoñe te Yésus a liti na be ne medu’an a jô’ô na: “Ba bo bikpwaé bekalate be Zambe biabe ndam.” Bejuif béziñ be be’e mvom asu nge ke e mo map bone biwolé bi bili bone bifuse ya Mintilan mia so Atiñ. Bepharisien ba bo na émbiap bi bo ndam asu na be liti na, ba dañe tôñ Atiñ a éva’ ése. A fe na, ba “bo miñwôndé ya mengômesane map ayap.” Bone b’Israël bese be mbe na ba futi miñwôndé e mengômesane map, ve Bepharisien ba bo na, énmiap mi bo ayap abui. (Nlañane Bôt 15:38-40) Ba bo mam mete mese amu na “bôte be yene be.”​—Matthieu 23:5, Mfefé Nkôñelan.

Ja’a beyé’é be Yésus be ne bi fulu ete, fulu ya bo miñyéné, nde a jô be na: “Ve mia, te mia kañese lobane na Rabbi; môte wua nye a ne Ñye’ele wônan, mia bese mi ne bobenyañ. E si nyô, te mia loone môt éziñ ésoo wônan, amu mi bili wua ve Ésoo wônan a ne yôp. Te mia lobane na beliti bôte zen, amu nliti zene wônan a ne wua ve Krist.” Nde aval avé beyé’é ba yiane yene bebien, a jé ba yiane bo? Yésus a jô be na: “Nyô a dañe beta môt e be mia a ye bo mbo ésaé wônan. Nyô a bete émiene yôp a ye silibane si a nyô a suu émiene si a ye betebane yôp.”​—Matthieu 23:8-12, Mfefé Nkôñelan.

Mvuse ya valé, Yésus a yo’é bescribe a Bepharisien abui biyoñ amu nsisime medu’ane be bili a jô’ô na: “Bidim a mia, beyeme bekalate a Bepharisien bôte bebadu’u, amu mia dip éjôé ya yôp ôsu be bôt; miabebien teke nyiin été a teke jô’é ba ba kômbô nyiine na be nyiin.”​—Matthieu 23:13, Mfefé Nkôñelan.

Yésus a komekane Bepharisien amu be nji bi mefulu me bôte be ne bitôtôlô mfa’a ya nsisim, nalé a yené a été ba telé bebien é nsela’ane ji bôte bevok. Éve’an é ne na ba jô na: “Môt a kalane nda Zambe teke jam é ne bo nye, ve nyô a kalane or a ne été nye a ntii mvôla.” A mboon ôte, ba liti liti fo’o na be ne mindindim amu ba dañe ngôné gôlôt ya temple, sa ke mfi ya beta vôm ate mfa’a ya nsisim, vôme ba kañe Yéhôva. A ba “vuane jam da dañ anen e metiñ: nya ntyi’ane mejôô.”​—Matthieu 23:16, 23, Mfefé Nkôñelan; Luc 11:42.

Yésus a loone Bepharisien bete na ‘mindindime beliti zen, ba viane léé afi a mine kamel.’ (Matthieu 23:24, Mfefé Nkôñelan) Ba léé woon woba na be bo teke mine éloñelaloñelan amu ba jô na é ne mvin. Ve ba kate kui na be semé mam ma dañe mfi Atiñ, fo’o ve ane ba mine kamel, tit é ne fe mvin, é to fe nya anene.​—Lévitique 11:4, 21-24.