Môse Yésus a kandane tabe e Temple

E nté môse Yésus a kandane tabe e temple wo lôt, a ke ôsu a kulane medu’ane bescribe a Bepharisien, a loone be e bôt été na bôte medu’an. A liti de a éve’ane ji: “Mi asôp élaé a be’e mfa’a ya atan, ve mfa’a ya été bi ne mame ya mvô a mam abé ne lut! A ndindime môte ya Pharisien, taté’é sôp élaé a be’e mfa’a ya été, wôna bi aye bo fe mfuban atan.” (Matthieu 23:25, 26) Bepharisien ba tôñe metum asu mone jam ase ja’a mfa’a ya mfuban wo yené, ve be nji bisi aval bôte be ne nlem été a be nji jeñe na be fubu bebien mfa’a ôte.

Mboane medu’ane wop wo tu’a beta yené aval afe, amu be ne ôjeja’a ya lôñe mesoñ bekulu mejô a bo na me faé. Ve da, aval Yésus a jô, be ne “bone be bôt be nga wôé bekulu mejô.” (Matthieu 23:31) A ba liti fo’o de amu ba jeñ a mezene mese na be wôé Yésus.​—Jean 5:18; 7:1, 25.

Yésus a kate jame da yange betebe ôsu bete nge be teke tyendé a jô’ô na: “A benyo, a mvoñe mekpwe, mi aye sa’ale mekua me ya [Géhenne] aya?” (Matthieu 23:33) Géhenne a tinane na, “Vallée ya Hinnom;” vôm ate a nji bo ôyap a Jérusalem, a été nnye ba di’i biôm bise. Éve’ela éte ja kôme liti awu ya nnôm éto bescribe a Bepharisien ba ye tôbane de amu be ne mbia be bôt.

Beyé’é be Yésus ba ye liti nye ane “bekulu mejô, beyem mam, a betili bekalate.” Nde ñhe ba ye bo be aya? Yésus a kobô a lat a betebe ôsu ya ñyebe a jô’ô na: “Mbe bevo’o mi aye wôé, a tyelé be [élé] yôp; mbe bevo’o mi aye bibi be nkasa menda me Zambe menan, a kpwe’ele be minlam minlam: ajô te mi aye nyoñe mekua ya metyi me bôt be ne zôsô mese me nga kui si nyô, ataté metyi me Abel a mbe môte ya zôsô, akekui metyi me Zacharie . . . nnye mi nga wôé.” Nde a bendé be na: “Me ajô fo’o mia na, Mam mete mese me aye kui be bôte ya miaé wu.” (Matthieu 23:34-36) Mejô mete ma ye tôébane mbu 70 É.J., éyoñe nkane bita ya Rome wo te zu tyame Jérusalem a bo na abui Bejuif e wu.

Jam ete da ndeñele Yésus éyoñ a simesane mbia jam a yange be, ajô te a jô na: “A bôte ya Jérusalem, a bôte ya Jérusalem, mi wô’ô wôé bekulu mejô, a lume bôt be azu mia minlôman mekok! Me nga kômbô kôane bone benan mekôan abui, ane nyia kup a kôane bone bé mefape si, mi ve ben! Tama yenan, nda jenan é li’iya momo, teke môt.” (Matthieu 23:37, 38) Bôte ba vô’ôlô nye be ne sili bebiene na, a kobô ajô “nda” fé. Ye mbamba temple Yéhôva a nga lôñe Jérusalem nye a kômbô kaman?

Yésus a beta jô na: “Amu me ajô mia na, Mi aye fe yene ma, ve éyoñ mi aye jô na, Ébotan a môt a zu jôé [Yéhôva] Tate.” (Matthieu 23:39) A kobô mejô ya nkulan ajô bia koone wô kalate Besam 118:26 wo jô na: “Ébotan a nyô a zu a jôé Yéhôva: Bi botaneya mia bi to nda Yéhôva.” Jam ete da liti fo’o na mejô mete me nji fombô temple a ne nlôñane Jérusalem, amu nye ate a ye tyamban.

Éyoñe ji, Yésus a ke éfas éfe ya temple, vôme biwolo ba futi moné bi né. Éyeka’a biwolo bite é n’ane toñ. Bôte be ne futi moné wop e mon abé a ne yôp. Yésus a yen ane abui Bejuif da bo mimvean, minkukum mia dañ futi ‘abui moné.’ Nde Yésus a yene nzôzoé nkuse minga ô futi’i ‘bone minsañe mi moné mibaé mi to tañ étun ébôbolo.’ (Marc 12:41, 42) A kôme yem abim avé Zambe a wô’ô mveane wé mvaé.

Yésus a loone beyé’é bé a jô be na: “Me ajô fo’o mia na, minga nyô a ne nkus a nzôzoé a te futi akum éwolo été, a dañe bôte bese be afuti.” Jé a kômbô jô? A liti de a jô’ô na: “Amu ba bese be ate futi, be bili akum de ayiane be a di de abuk; ve nye a ne nzôzoé a te futi akume dé se, a ényiñe jé ése.” (Marc 12:43, 44) Mboon ôte wo selan a wu betebe ôsu ya ñyebe Bejuif!

Nté môse 11 ya Ngone Nisan wo lôt, Yésus a kôlô temple. A ye ke beta so valé. Nde ñyé’é wua a jô na: “A Ñye’ele, tame yen aka’a meko’o di, a aka’a nlôñane di?” (Marc 13:1) Nya ajôô a ne na, meko’o méziñe ya Temple me ne angôndô y’anen, jam ete é nga bo na, a yené fo’o v’ane a vo’o ku môs éziñ. Nde ñhe, é ne bo aval étam éyoñe Yésus a jô na: “Ye ô lô beta nlôñan nda nyô? Ako’o de aye li’i e bete’ ako’ afe yôpe va, te vas.”​—Marc 13:2.

Éyoñ a maneya kobô mam mete, Yésus a minlômane mié ba tyi’ilan mbi’ili ya Cédron asu ya na be ke Nkôle Beolivier. Ane éyoñe ja lôt, ba be Pierre, André, Jacques a Jean ba tôban. Nkôle yôbe valé, be ne ngule ya yen aval temple a ne mbamba nlôñan.