Tawôla Tate

E mam me ngô’é, Yésus a te ye’ele minlômane mié fulu éjote nyul éyoñ a te sôbe be mebo. Éyoñe ji, éko éziñ éyoñe be maneya di Pâque, a tote nkulan ajô David wu: “Ja’ane nya mvôé wom me nga nyiñe nye mvo’é, nyô a nga di bidi biam, a bete étimekili ya wosane ma.” Nde a beta jô na: “mia bôt mi to va, wua a ye koñe ma.”​—Besam 41:10, Mfefé Nkôñelan; Jean 13:18, 21.

Minlôman mia fomban, a môt ase a sili nye na: “A Tat, ye ma?” Ja’a Judas Iscariot a bo de. Nde Pierre a jô Jean, mbôle a too fefele Yésus e tebele na, a sili nye môt a ye bo jam ete. Nde a sili nye na: “A Tat, a ne za?”​—Matthieu 26:22; Jean 13:25.

Yésus a yalane nye a jô’ô na: “Môt me aye dup ôfufus édi’a mfiañ, a ke nye vie, nnye le.” Ane Yésus a dube éfuse belet mfiañ été, a nyoñé a ve Judas a jô’ô na: “Mone môt a ye kôlô, aval ane e ne ntilan ajô dé: ve ngo’o môt a koñe Mône môt! Mvaé nge môt ate a nji bialé.” (Jean 13:26; Matthieu 26:24) Nde Satan a nyiine Judas nyul. Môt a nga wulu ékotekot été nyu, a ke ve émien mfa’a ya bo nkômbane Diable. Ane a bo “nyô a ye jañ.”​—Jean 6:64, 70; 12:4; 17:12.

Yésus a jô Judas na: “E jam wo bo, bo’o d’avô.” Minlômane mivo’o mia yiane simesane na, mbôle Judas nnye a ba’ale moné ya nkop jôm ete nje a jô nye na: “Kele kuse biôme ya abôk, nge na va’a bingôngol bi bôt jôm éziñ.” (Jean 13:27-30, Mfefé Nkôñelan) Ve a li’i bo jam ete, Judas a ke koñe Yésus.

Ngô’é éte ébien, nyi ya Pâque, Yésus a telé Tawôla Tate. A nyoñe fembé, a bo meye’elan a ve fe akiba, a mane be’e je bifus a ve je minlômane mié. A jô na: “Nyôle jam nyô é ne mvean ajô denan: boka’an mi boane jame di, mi simesa’ane ma.” (Luc 22:19) Minlômane mia kalane bifuse bi fembé a di bie.

Éyoñe ji, Yésus a nyoñ élaé woon, a ye’elan a ve fe akiba, a a kalane fe be je. Bese ba nyu élaé Yésus a te jô je na: “Élaé ji, é ne mfefé élate ya metyi mam, mme me ne nkuian ajô denan.”​—Luc 22:20.

Nde ñhe, Yésus a telé mesimesa’ane ya awu dé, a beyé’é bé ba yiane bo de mbu ôse Ngone Nisan é too melu 14. Nalé ate a ye bo na bôt be ke ôsu a simesane jame Yésus ba Ésa wé be nga bo asu na be kôté bôt be bili mbunan éto belo ya abé a awu. Jam ete da dañe Pâque Bejuif, amu da ngoné nya nkôtane asu ényiñe ya bone be bôte bese ba buni.

Yésus a jô na metyi mé “me aye kui amu ajô ya va abui bôt mbia be mam map.” Minlômane a bôte befe be ne ane be ba ye bu’uban a njamane mame m’abé map. Ane be, bôte befe ba ye bo benyoñe ngap ya Éjôé Ésa wé.​—Matthieu 26:28, 29.