“Ndemben meve’ele m’ébo te zu be mia”
“Momba’an, a bo’o mbane ya ye’elane Zambe, ndemben meve’ele m’ébo te zu be mia.”—MATTHIEU 26:41.
NGULE biyebé bi nga too Yésus abui nlem—a lôté abime a tôbane ya ane abialé môt. Awu Yésus Krist, mone Zambe, é nto étua ya bebé. Yésus a kôm yem na, avôlavôl, nnéane b’ébi nye, b’éve nye mekua, a tyélé nye élé. Yésus a tu’a fe yeme na, mam mese é bo; a mam mese é jô mene ve éyôlé ésa wôé mvit nge fubu ke je. Yésus a nga to ayeme na, ényiñe ya nnôm éto bôt bese ya si nyô étii jam azu bo. Jé nj’ébo mfa’a ya mam mese ma?
2 Yésus a beye’é bé be nga ke afup ya Géthsémané. Yésus a nga nye’e vôm ate. Ane a nga ke ôsu ôbe nté a li’i beyé’e bé. Eyoñ a nga bo étam, ane a nga ye’elan Esa wôé a nlem ôse—sake ve éyoñe jia, ve biyoñe bila. To’o ane Yésus a mbe te bijô, a nji kômbô tôbane meve’ele mete a ngul jé étam.—Matthieu 26:36-44.
3 Bia fe bi atôbane meve’ele éyoñe ji. Meteta’a ya nsoé kalate wu, bi nga yen na bi anyiñe melu m’asu’ulane nta’ane mam wu. Meve’ele m’aso bia émo Satan, me ne ve k’ôsu. Jam nyô ase ajô na a kañe Zambe a bo nge jô, éne fubu jôé Zambe nge ve de mvit, a éne yemete ndi nlem jé y’ényiñ ya mfefé si nge momo. Bi anye’e Yéhova. Bi tyi’iya na bi ‘ajibi minjuk akekui asu’ulan’—asu’ulan y’ényiñ jangan nge asu’ulan ya nta’an mam wu, asu’ulane ése d’étaté so be bia. (Matthieu 24:13) Ve j’éne volô bia na, bi k’ôsu a ba’ale na éyoñ é nto étun, a na bi mombô?
4 Amu a mb’ayeme na beye’é bé—ba ya melu mvus a ba ya melu ma—b’étôbane meve’ele, Yésus a nga jô be na: “Monba’an, a bo’ane mban ya ye’elan Zambe, ndemben meve’ele m’ébo te zu be mia.” (Matthieu 26:41) Mejô ma m’atinan aya melu mangan? Meve’ele mevé bia tôban me? A aval avé bi “a mombo”?
Meve’ele ya bo za jame?
5 Môt ase ya be bia a tôban meve’ele, Satan a telé bia na bi ku “ôlam wé.” (2 Timothée 2:26) Kalate Zambe aye’ele bia na Satan a wosan bôt b’akañe Zambe. (1 Pierre 5:8; Nlitan 12:12, 17) Jé a sôñ? Nsoñane wé ônji dañe na bi wu. Satan ase ngule ya yene mfi éziñ nge bi awu bito amvôé a Zambe. Satan a yem fe na éyoñe awolo dé d’é kpwan, Yéhova é wômelô mimwuan, a awu d’ébo momo.—Luc 20:37, 38.
6 Satan a kômbô ndaman jôm j’adañe dia ényiñe jangan—élat bia be Zambe. Satan a bili ôvañ na, metyama’an me kui zañ Yéhova a bôt bese y’émo. Amu nalé, nge mbunan wongan ôwôé—ntelane nkatan mbamba foé a mbenan ényiñ kristen—Satan é wôk avak abui! (Beéphésien 6:11-13) “Nyô a ve’ele bôt” a taté suan, meve’ele mebien ke mvus ya valé.—Matthieu 4:3.
7 “Medu’ane” me Satan mene mevale meva. (Beéphésien 6:11, Jewish New Testament) Ane du’u bia a zen y’ôzañ akum, woñ, nsôane bisô, nge njeñane mam minvôman. Ve ôlam a dañe belane wô ône mveane nlem atek. Aval ane nyô a jeñ fan, Satan a yeme na, njañelan ndi nlem w’ate’elan môt, a avale môt te éne tyi’ibi ya ku meve’ele. (Minkana 24:10) Nne a dañe ve’ele bia éyoñ nlem wongan wo “dañe nte’an abui”.—Besam 38:8.
8 Mam m’ate’elan nlem mene ve fôé nté ôse bi asubu asu’ulane bebé, a mam mete mese ngule ya sa’ale bia. (Fombô’ô nlô éfia wu: “Mam m’atindi bôt na be bili ate’e nlem.”) Mam m’ate’elan nlem, m’ate’elan fe minsôn miangan. E “kus éyoñ ” y’abo mam ya nsisim—nye’ane mejô me Zambe, ntabane bisulan bekristen, a nkañetan mbamba foé—m’ébo angôndô y’ayaé nge nyôle jangan a nleme wongan bine nte’an. (Beéphésien 5:15, 16) Simesane na nyô a ve’ele bôt a yi na ô jô’é ésaé Zambe. Ve ényiñ bi anyiñ ji j’aye’ele bia na, sake éyoñe ya tabe njeme ji, nge ji ya dimi na éyoñ é nji beta bo! (Luc 21:34-36) Aval avé bi dañe meve’ele a mombô? Mam menyine ma mene bia volô.
“Bo’o mban ya Ye’elan”
9 Tabe’e Yéhova mebun a zen ya meye’elan. Simesa’ane éve’ela’a ya Yésus a nga ve afup Ya Géthsémané. Jam avé a nga bo éyoñe biyebé ya nlem bi nga lôte nye nné? A nga ye’elane Zambe a nleme ôse na a volô nye “ane éduduk énga kui nye nyôl ane beta metoé metyi, metoé si.” (Luc 22:44) Tame fas jame te. Yésus ambe ayeme Satan abui. Eyoñe a nga too yôp, Yésus a nga yen mezen mese Satan a belane me na mbuni Zambe a timbi ôlam wé. Yésus a mbe a yeme na ane ngule ya ye’elan éyoñ ése Satan a ve’ele nye, a yeme fe na édañe me ve’ele mese Satan é tele nye ôsu. Nge mona Zambe émien a nga bi nkômban ya sili mvolan be Zambe, biyoñ tañaya bi ayiane sili Zambe ngule jé!—1 Pierre 2:21.
10 Beta’a simesane na, éyoñe a maneya jô beye’é bé na be bo “mbane meye’elan”, Yésus émien a nga beta jô na: “Nsisim, ône ngul, ve minsôn mi ne atek.” (Matthieu 26:41) Yésus a nga kobô ajô ya minsôn mivé? Sake émié; jôm éne atek, é njibe ngule ya bo nyôle jé é mbe te bijô. (1 Pierre 2:22) Ve d’aselane mfa’a beye’é bé. Amu mam m’ave môt abé, a nkômban ntyamane metiñ me Zambe bi aso abialé, m’abo na beye’é be Yésus b’ayi mvolan na be bo te tyam metiñ me Zambe. (Beromain 7:21-24) Amu jam éte a nga jô be—a bekristen ya melu ma—na be sili ngul ya dañe meve’ele. (Matthieu 6:13) Yéhova a nye’e avale meye’elane te. (Besam 65:2) Aval avé? Meval mebaé.
11 Ôsusua, Zambe a volô bia na bi yemelane meve’ele. Meve’ele me Satan mene ane melam b’afuti dibi été. Nge ô bo te yene me, w’étimbi été. A zen ya Kalate Zambe a minsoé bekalate be bili minye’elane ya Kalate Zambe, Yéhova afaé bia éfufup na bi yeme sa’ale melam mete. Mimbu ya mvus, bekalate, bitôkane bengaa be Yéhova bi nga bemé biyoñ te lañe na bi tabe nyaa ntyele a nkoane môt mbok woñ, mbia nkean binoñ, ôzañe akum, a meve’ele mefe m’aso be Satan. (Minkana 29:25; 1 Becorinthien 10:8-11; 1 Timothée 6: 9, 10) Nga w’ayiane ve Zambe akéva amu ave bia melep ma? (2 Becorinthien 2:11) Mimbemek mite mine éyalan ya meye’elan bi asili Zambe na ave bia ngule ya dañe meve’ele.
12 Yéhova a beta fe yalane meye’elane mangan éyoñe a ve bia ngul ya jibi meve’ele. Kalate Zambe a jô na: “Zambe . . . ase ngule ya kañese na, mi yene nju’u w’alôte mia nkôñ, ve mfa’a ya nju’ute ékôme fan na, ô bi ngule ya jibi wô.” (1 Becorinthien 10:13) Zambe ase ngule ya kañese na ngul ya dañe meve’ele ébo bia momo—nge bi ake ôsu a tabe nye mebun. Aval avé nde Zambe “akôm fan ” ya vaa bia meve’ele? Zambe ‘a kap mfufup nsisim be bôt be asili nye.’ (Luc 11:13) Nsisim ôte wo volô bia na, bi simesane metiñ me Zambe, w’ayemete ntyi’ane wongan ya bo mam mene mvaé, a w’avolô bia na bi bo mam ane mimfefek. (Jean 14:26; Jacques 1:5, 6) Ône fe volô bia na bi bi mbamba mefulu a titane ma men’abé. (Begalate 5:22, 23) Nsisim Zambe wo tindi bebuni bé na bebo ‘mvolan w’ave bia ngule nyôl.’ (Becolossien 4:11) Nga wo muñ éyoñ Yéhova a yalane bia biyoñ abui a nye’an mam bi asili nye meye’elan?
Sili’i mam Zambe ane bo eyoñ ji
13 Nge bi akombô k’ôsu a mombô, bi ayiane tu’a yem mam Zambe ane bo bia éyoñ ji, a ma ase ngule ya bo. Amu minju’u y’ényiñ, d’akui na bi bi atek nlem biyoñ biziñ. Ve bi ayiane simesan na, Zambe a nji jô na minjuk miangan mise mii man nta’an mam wu. To’o bebuni Zambe ya melu mvus be nga tôban minjuk ane mewosan, azoé, ngule mintaé nlem, akon.—Mam Minlôman 8:1; 2 Becorinthien 8:1, 2; 1 Bethessalonicien 5:14; 1 Timothée 5:23.
14 Den fe, avale minjuk di d’atôñ bia: mewosan, azoé moné, abui nlem mintaé, ôkon, a minju’u ya ényiñ. Nge Yéhova a kaman na avale mam te ébo te kui be bia, nne Yéhova éyalan mbia nkobô Satan aya? (Minkana 27:11) Yéhova a jô’é na besiñ bé be kuli minjuk, meve’ele, a éyoñ éziñ etyes awu be bebuni bé.—Jean 16:2.
15 Jé nje Yéhova a nga kak? Avale bi yene ya, a nga ka’a bia ngule ya dañ avale meve’ele mese bine tôban me, nge ndi nlem jangan ése éne be nye. (Minkana 3:5, 6) Mfa’a ya ba’ale bia mam ya nsisim, Zambe a belan mejô mé, nsisim wé, a ékôane jé na bi ba’ale amvôé bia be nye. Eyoñ amvôé bia be Zambe éne ngumba, nlem ô bôô bia si, to’o awu d’abi bia. Te ke jôm éziñ—to’o awu—éne ndeñele Zambe na bebuni bé be bo te yene mvaé. (Behebreu 11:6) Mfefé si Zambe a nga kak bia ô nto bebé. Mimbamba mi mam mise Zambe a nga kak bia mii tôéban mfa’a mebu’uban ya bôte b’anye’e nye.—Besam 145:16.
Simesa’ane amu je Zambe a jô’é abe
16 Na bi jibi akekui amané, bi ayiane simesane amu jé Zambe a jô’é na abé é boban. Nge d’akui éyoñ éziñ na minju’u miangan mi alôte bia nkôñ, bi ayiane simesane na Satan a nga kômbô suñ Zambe étôto’o jé. Satan a nga bo fe bisô mfa’a ya jôm bôt b’asôñ ékaña’a a élat ba be Zambe yat. (Job 1:8-11; 2:3, 4) Mam mete, a Zen Zambe a nga top na a kôme, me m’alôte binyiñ biangan abui biyoñ. Ye sa nalé?
17 Amu Zambe a jô’é étun éyoñ na mbia be mam be boban, nalé a nga ve bôt befe fan ya nyoñ benya mejô. Simesa’ane na: Yésus a nga juk abui na bi nyiñ. (Jean 3:16) Ye bi nji yiane ve Zambe akéva amu mboan ôte? Ve ye bine fo’o jibi minjuk tañ étun éyoñ na, bôt befe be yene ényiñ? Nge bi akômbô jibi akekui mané, bi ayiane yebe na fe’e Yéhova éne abui alôté énjangan. (Esaie 55:9) Abé d’émane zen j’adañ mvaé mfa’a ya nta’ane mam Zambe a mvo’é jangan ya nnôm éto. Ye éne bo avale afe? Ekotekot éziñ énji bo be Zambe!—Beromain 9:14-24.
“Subu’u Zambe bebé”
18 Bi ayiane tebe Yéhova bebé na bi ba’ale na éyoñ énto étun abui. Bi bo te vuane na Satan a belan ngule j’ése na a tyam amvôé bia be Yéhova. Satan a yi fe na bi buni na asu’ulan éngenan ôyap, a na ényiñ kristen a nkañetan mbamba foé bi nji bo mfi. Ve ane “nlaéne minsos a ésa minsos.” (Jean 8:44) Bi ayiane tyi’i na “bi a tebe Diable ngam yat.” Amvôé bia Yéhova éne jôm bi nji yiane yene zésé mise mangan. Kalate Zambe ave bia mbamba melep ma: “Subu’u Zambe bebé, ndemben nye fe ésubu wo bebé.” (Jacques 4:7, 8) Nne ône subu Yéhova bebé aya?
19 Mban meye’elan a édo’o mfasan mejô me Zambe bine mfi. Eyoñ minju’u y’ényiñ mi alôte bia nkôñ, yo’é Yéhova nlem wé nne ngeñ. W’éyem éyalane ya meye’elan môé avôlavôl éyoñ wo fe w’akate nye ne sañesañ jame w’ayi. Yéhova ébo te yalane wo avale w’akômbô éyoñ ése, ve nge w’akômbô ve nye duma a ba’ale élat mia nye, éve wo mvolan w’ébo na ô k’ôsu a jibi. (1 Jean 5:14) Abim ése w’éyene ane Yéhova a wulu ényiñ jôé, abimete fe nde w’ésubu nye bebé. Ene mfi na bi vu mezen a mefulu me Yéhova avale me ayene kalate w’été. Abim édo’o mfasan mejô me Zambe éne volô wo n’ôyeme nye, abimete fe nlem wôé w’éjaé a nye’an Zambe. (Besam 19:14) Nye’ane ôte w’évolô wo a lôté jôm ése na, ô dañ minjuk a na ô mombô.—1 Jean 5:3.
20 Nsubane Yéhova bebé, ône fe mfi ane ntaban nlatan a bebuni bevok. Jame te nde bi azu fas nye’elan w’asu’ulan nsoé kalate wu.
MINSILI YA FAS
• Memane y’ényiñ jé, a éyoñ mintaé mi nga bi nye abui, jé Yésus anga bo, a jé anga jô beye’é bé na be bo? (Étune ntilan 1-4)
• Amu jé Satan adañ fem bebuni be Yéhova, a Mezen me vé a ve’ele bia ? (Étune ntilan 5-8)
• Amu jé bi ayiane bo mban meye’elan nge bi akômbô kabe meve’ele me Satan (Étune ntilan 9-12), yem mam Yéhova ane bo éyoñ ji (Étune ntilan 13-15), simesan zen Zambe a jô’é jé abé (Étune ntilan 16-17), “subu Zambe bebé” (Étune ntilan 18-20)?
[Encadré ya afep 25]
Mam m’atindi bôt na be bi ate’e nlem
Ôkon/nyômban. Nge ayap ôkon, nge nyômban bine bia ékolé ôbak, bine bili ate’e nlem amu bi nji fe beta bi ngule y’abo Zambe ésaé ane éyoñ ya mvus.—Behebreu 6:10.
Nte’ane nlem. Ndi nlem jangan éne sis nge bi akate bôt mejô me Zambe ve teke nsôl.—Minkana 13:12.
Eyoñ bi asimesan na bi nji volô jôm. Amu be nji tame se’e be môse éziñ, abui befam a binga b’asimesan na, mot éziñ a nji nye’e be, to’o Yéhova ayene be avale da.—1 Jean 3:19, 20.
Eyoñ bi awô’abé nlem été. Nge mbuni Zambe ate bo nyô mbok jôm awô’ô ôlun abui, jamete éne tindi nyô awô’ô ôlun na a tylii bisulan a jô’é nkañetan mbamba foé ya éjôé Zambe.—Luc 17:1.
Mewosan. Nkanda’ane minyebe ône dutu mewosan, ziñ, a épkwe’ela’a.—2 Timothée 3:12; 2 Pierre 3:3, 4.
[Fôtô ya afep 26]
Yésus a nga jô na bi ayiane “bo mban meye’elan” ndemben bii bi mvolan éyoñ meve’ele