Pilate a jô be na: “Mi lôô môt ate!”

Pilate a nga jô ékoane bôte ja jeñe na é wôé Yésus na: “Me . . . nji yene môte nyô mbia be mam mi abo’olô nye: nalé fe Hérode a nji yene nye jam abé.” (Luc 23:14, 15) Éyoñe ji, mbôl a jeñe na a kamane Yésus, Pilate a belane zene fe a jô’ô bôte bete na: “Ve mbôle mi bili tum na ma suu mia môte wua asu Pâque, ye mia kômbô na me suu Njô Bejuif?”​—Jean 18:39, Mfefé Nkôñelan.

Pilate a yeme mone mimbô’ô éziñ ba loone na Barrabas, nnye ate ba yem ane ñwuwup a éngana’a a to fe ñwôé bôt. Nde ñhe Pilate a sili be na: “Mi akômbô na, me suu mia za? Ye Barrabas, ye Yésus a ne jôé afe na Krist?” Bemie beprêtre ba tindi bôt a ngul ése na be jô na Barrabas nnye be suu sa ke Yésus. Nde Pilate a beta be sili na: “Be ne bebaé, me suu mia za?” Ékôane bôte ja yôtane na: “Barrabas!”​—Matthieu 27:17, 21.

Pilate a wô’ ôlun, a sili be na: “Me aye bo Yésus a ne jôé na Krist, aya?” Ba bete metyiñe yôp be jô’ô na: “Tyelé nye [élé]!” (Matthieu 27:22) Môt a ne te mekua le ba jô na be wôé. Nde Pilate a sili be na: “Z’aval abé a nga bo? Me nji yene jam éziñe be nye da yiane awu. Ajô te ma ye suu nye éyoñe me maneya bo na be bibi nye minkasa.”​—Luc 23:22, Mfefé Nkôñelan.

Akusa bo Pilate a ve ngule jé ése, a ayo’ ése ékôane bôte ja yôtane tyiñe jia na: “Tyelé nye [élé] yôp!” (Matthieu 27:23) Betebe ôsu ya miñyebe be nga tindi bôte na be bo mbia jam aval é ne na, be yi na metyi me kui! Sa ke metyi me njejete môt, nge ñwôé bôt éziñ. A ne metyi me môt a ne te bijô, nyô be nga nyoñ a meva’a mese aval ane Njô e Jérusalem melu metan ôsusua. Nge beyé’é be Yésus be ne valé, be ne bivôl a fe’e njañan.

Pilate a yene fo’o na jam ése a bo é ne teke’e ndoñ. Zô’é bôte ba bo é ne ve bete bet, a nyoñe mendim a sôpe mo vôm ékôane bôt é nga to a jô be na: “Me ne mfuban ajô metyi me môte nyô; ve mia mia ye toban.” Ve mboan ôte o nji tindi be na be tyendé ôsimesan. Ba viane jô jô na: “Metyi mé me tabe’e be bia a e be bone bangan.”​—Matthieu 27:24, 25, Mfefé Nkôñelan.

Ngovina a kômbô fo’o jalé ñyiane wop a lôte na a bo jam é ne zôsôô. Asu na a jalé ñyiane wop, Pilate a suu Barrabas. Mvuse ya valé a ve tyiñe na be va Yésus mengômesan a bibi nye minkasa.

Éyoñe be maneya tya’a nye ébôm, bezimbi ba ke Yésus be ngovina. Nsamba bôt wo dañe beta sulan, a tibili nye. Ba mane tiñ ékate biyo a some nye je nlô a ngul. Bezimbi ba futi fe nye ôlé e wo ya mbo nnôm a jalé nye évele ngômesan aval ane ji njô bôt a jaé. Nde ba taté fe na ba kpwe’ele nye a jô na: “Mbôlô, Njô Bejuif!” (Matthieu 27:28, 29) Ba tui fe nye menden nyul a bibi nye mebaé memañ abui biyoñ. Nde ba nyoñe nye ôlé be nga ve nye wo, a bibi nye wô nlô a tu’a beta nyiñeli “ékate biyo” ya ékpwe’ele ba te jalé nye.

Pilate a kam évôvoé Yésus a njibane wé aval é ne na, a jeñe zene fe ya beta sôbe mo mé mfa’a ya ajô ete. Nde a jô be na: “Mi lôô, ma zu mia nye liti atane mu mi yeme na me nji yen to’o ajô éziñ da ve nye mekua.” Ye Pilate a buni na nge a zuu Yésus, metyi a nyul ése, ékôane bôt ete ja ye tyendé ntyi’ane wop? Nté Yésus a tele ôsu ékôane bôt é ne njalan a njet, Pilate a jô be na: “Mi lôô môt ate!”​—Jean 19:4, 5, Mfefé Nkôñelan.

To’o meveñ me ne nye nyul ése, Yésus a liti fulu évôvoé a ôjibi a bia bo na Pilate a bo fe’e ne vema, a jam ete da yené e minkobô mié mi ne njalan a ésemé a nkoon engôngol.