A saé nzezam a mbamba nlem

Nté Yésus ba beyé’é bé benyin ba kañete “e meba me Zambe map, a afôla ese ya Galilée,” foé a late a beta be mame a bo ja mane yametane vôm ase. (Marc 1:39, Mfefé Nkôñelan) Foé te ja ke kui tison éziñ, vôme môt a kone zam a to. Dokita Luc a liti na ‘zam e ne nye nyôle ne nyaañ!’ (Luc 5:12) Éyoñ ôkon ôte ô tabeya nyule môt ayap, wo mane di bibu’a ya nyule jé ôte’ete’e ôte’etek.

Nde, ôkone nzezame wu ô nto mbia ngul aval e ne na a vo’o beta tabe bôt été. A nde fe a yiane yôtan éyoñ bôte be ne nye fefel na, “Te mfuban, te mfuban,” a nalé a volô be na be bo teke dañe subu nye bebé a bo teke kôébane ôkone wé. (Lévitique 13:45, 46) Ve jé nzezam wu wo zu bo éyoñe ji? A sube Yésus bebé a ku mebo mé si, a nga ye’elane nye a jô’ô na: “A Tat, nge wo ame’ete, ô ne ngule ya bo me mvo’é.”​—Matthieu 8:2.

Môt ate a bili fo’o beta mbunane be Yésus! Ôkon ôte wo yiane bo na a yené étua éngôngol. Nde jé Yésus a bo? Ô nga ye bo aya nge ô mbe valé? Mbôle Yésus a wô’ô nye éngôngol, nde a same wo wé a nambe môt ate. Yésus a jô nye na: “Me me’eteya; bo’o mvo’é.” (Matthieu 8:3) Ja’a é ne ayaé asu bôte béziñ na be buni jam ete, zam ja kôlô nyule môt ate été été.

Ye wo ye ke wô’ô mvaé ya tabe éjôé njô bôt a ne njalan a mvam a bili fe ngul ane Yésus? Aval a nyoñe nzezame wu da ve bia ndi nleme na, éyoñe Yésus a ye bo Njôô ya si se, nkulan ajô wu wo ye tôéban: “A ye ko môt a ne nzôzoé a nyô a ne ôsame, éngôngo, a ye nyii minsisime ya bôt be ne éngôngo.” (Besam 72:13) Ôwé, Yésus a ye fo’o volô bôte bese ya si ba tôbane minjuk amu a bili nkômbane ya bo de.

Bia beta simesane na ôsusua na nzezam wo saéban, abui bôt é nga tabe fe’e ne vema amu ésaé nkañete Yésus a nga bo. Éyoñe ji abui bôte da zu wô’ô nlañe ya asimba di. Ve jame da, Yésus a nji yi na bôte be bi mbunan a zene ya mame ba wô’ô me fombô’ô nye. A yeme nkulan ajô wo jô na a ye bo te “bete tyiñe jé yôp, nge bo na, é wô’é nseñ,” nalé a tinane na, a ye ke jeñe na be wumulu nye. (Ésaïe 42:1, 2) Amu nalé, Yésus a jô nzezam a ndôme saé na: “Bo’o te kate môt; ve ke liti prêtre nyôle jôé, ô ve biôm ane Moïse a nga jô.”​—Matthieu 8:4.

Avale bi ne simesan, abime mevak môt ate a bili da tindi nye na a kañete jam da te kui nye. A ke kañete foé éte vôm ase. Jam éte da bo na bôte be bi nkômbane ya yen a yeme mam mete. A da bo na, Yésus a bo teke beta bi fane ya ke tisone bôte be teke nye yen, ajô te a nyoñ mon éyoñe ya tabe étam vôme môt a nji bo. Ve jam ete é nji kamane na bôt be so bevôm bevôm asu na a ye’ele be a saé be.