Minlôman mia beta jeñe na mi bi beta bito

Yésus a beyé’é bé be ndôme tyi’ilane Pérée na ba ke Jérusalem mfa’a ya sud. Éyoñe ji ba dañ Ôsôé Jourdain e fefele Jéricho. Bôte befe ba zu a be asu abô’ô Pâque ya mbu 33 É.J.

Yésus a tele beyé’é bé ôsu: a yi fo’o na a ke kui tison awolo asu abô’ô Pâque. Ve beyé’é ba ko woñ. Éyoñe Lazare a nga wu a na Yésus a mbe a yiane kôlô Pérée na a ke Judée, Thomas a nga jô bôte bevo’o na: “Nkeane bia be nye bi wu.” (Jean 11:16, 47-53) Nde bi ne wô’ô amu jé beyé’é ba ko woñ, dulu éte e ne fo’o man abé Jérusalem wôé.

Asu na a kômesane be asu mam ba zu tôbane me, Yésus a nyoñ minlômane mié fefel a jô be na: “Mi lôô bia ke e Jérusalem, a mona môt a ye keeban e mo bivete betuni a beyeme bekalate, a ba ye ve nye mekua ma yian awu a ba ye kee nye e be meyoñ me ne te yeme Zambe be bo nye ane ba kômbô a bôme nye a tyelé nye [élé], e môse lale a ye wômô.”​—Matthieu 20:18, 19, Mfefé Nkôñelan.

Éyoñe lale le Yésus a kobô beyé’é bé ajô ya awu dé a ñwômane wé. (Matthieu 16:21; 17:22, 23) Ve éyoñe ji, a liti na ba ye tyelé nye élé yôp. Ba vô’ôlô nye, ve be nji tu’a wô’ô jôm a jô be. Éko éziñ ba buni na, ba ye beta telé éjôé ya ayoñ Israël e si, a na ba ye bi duma a étôto’ éjôé te ba be Krist.

Salomé, nyia nlômane Jacques a Jean, a yiane bo dulu te. Yésus a nga yiane ve minlômane mite mibaé éyôlé é ne na “bone be zo’oyañ,” amu fulu jap. (Marc 3:17, Mfefé Nkôñelan; Luc 9:54) É nga kui biyoñ biziñe na, balé bete bebaé be jeñe na be bi beta bito Éjôé Krist. Nyia woba a yeme fe de. Éyoñe ji, a subu Yésus bebé, a kute meboñe si, a ye’elane nye asu jam éziñ. Yésus a jô nye na: “Wo kômbô jé?” Nye na: “Jô’ô na, éjôé jôé, bone bame bana bebaé, ba ye tabe wua mbo nnôme wôé, nyô mbo’o mbo ngale wôé.”​—Matthieu 20:20, 21, Mfefé Nkôñelan.

Jam a sili da so fo’o be Jacques ba Jean. Mbôle Yésus a ndôme liti na a mbeme zu bi ôsame a ékpwe’ele, nde a jô be na: “Mi nji yeme jam mi aja’é. Ye mi ne ngule ya nyu élaé me aye nyu?” Be na: “Bi ne ngu.” (Matthieu 20:22) Ve, be ngenane teke fo’o kôme wô’ô jôme nalé a tinan.

Yésus a jô be na: “Mfa’a élaé jam mia ye nyu, ve mfa’a ya tabe mbo nnôme wom a mbo ngale wom saa ke ma ma ve dili, ve asu ba ésaa wom a nga mane kômesane de.”​—Matthieu 20:23, Mfefé Nkôñelan.

Éyoñe minlôman awôm mivo’o mia yeme jame Jacques ba Jean ba te ke sili, mia wô’ô mbia ôlun. Nga sa Jacques ba Jean mbe be nga dañe kobô ajô te éyoñ minlômane mi nga too mi sañeta’ane de na be yem, za a dañe ba bevok? (Luc 9:46-48) Jam da bobane le da liti fo’o na, minlômane awôm a mibaé mise mi nji tôñe melep Yésus a nga ve be mfa’a ya sulu bebiene si. Nkômbane ya bi beta bito ô nga’ane be minlem.

Yésus a tyi’i na a kôm ajô te asu na ziñ é bo teke tabe be minlem été. A loone beyé’é bé awôm a bebaé, a nye’an ôse a ve be mbamba melebe ma: “Mia yeme na e bôte mia yene be bili éjôé ya meyoñ, be titi meyoñ mete yôb a ngul, e nde fe beta be bôt, ba tibili meyoñ. Ve avale te e nji bo e be mia. Ve nge môt éziñ a kômbô bo beta môt e zañe jenan, a ye bo mbo ésaé wônan; a nge môt éziñ a kômbô bo môt ôsu ya be mia, a ye bo mon ôlo asu bôte bese.”​—Marc 10:42-44, Mfefé Nkôñelan.

Yésus a ve be éve’an ba yiane tôñ: éve’ane jé émien. A jô na: “Mona môt nye ke a nji zu na be saane nye, ve asu ya na nye a saane bôt a ve ényiñe jé na a tañe bôt abui.” (Matthieu 20:28, Mfefé Nkôñelan) Tañe mimbu mila, Yésus a te saé asu bôte bevok. A ye fe ke ôsu a bo de akekui éyoñ a ye wu asu môta binam! Beyé’é bé ba yiane vu nye a jeñe na be saé asu bôte bevok, a lôte na be yange na be saane be, a ba yiane bo mam ane bongô teke jeñe na be bi beta bito.