Yésus a té mbôndane fe’e Bepharisien si

Besiñe be Yésus ba wô’ô mbia ôlun. A ndôme kane minkana mia kulan mbia mboone wop. Ajô te Bepharisien ba bôndé fe’ éyoñe ji asu na be lame nye. Ba kômbô tindi nye na a kobô jam éziñ da ye bo na, be ke somane nye be ngovina ya Rome. Nde ba ya’ane bôte béziñ na be ke lame nye a bifia.​—Luc 6:7.

Ba jô nye na: “A Ñye’ele, bi ayeme na wo akobô mejô a ye’ele bôte zôsô, te semé ngume môt, ve ye’ele fo’o bôt zene Zambe: Ye a ne mvaé bi ve César moné ya taxe, ye momo?” (Luc 20:21, 22) Yésus a ku ki ôlam ôte amu a yeme na, asimesan dap é ne njalan a medu’an. Nge a jô na, ‘Momo, é nji bo mvaé ya ya’ane taxe,’ be ne nye ve mekua na a tebe éjôé ya Rome ngame yat. Ve nge a jô na, ‘Ôwé, ya’ane taxe,’ e bôte be te’eya a étibila’a ya Rome ba ye wô’ô jam ete abé a vini nye. Nde a yalane be aya?

Yésus a yalane be a jô’ô na: “Amu jé mia bôbôlô ma, A bebadu’u be bôt? Lita’ane ma moné toya.” Nde ba liti nye denié wua. Ane a jô be na: “Fôtô za nyô a za a nee ntilane wu?” Ba yalane nye na: “César.” Nde Yésus a ve be angôndô y’abeñ éyalan a jô’ô na: “Bula’ane ñhe César biôme bi César a Zambe biôme bi Zambe.”​—Matthieu 22:18-21, Mfefé Nkôñelan.

Nde bôte bete be ne fe’e ne vema. Ba ku fo’o ve bivô, a ke. Ve môs ô ngenane te man, besiñe bé fe be ngenan be jeñe’e mezene ya bi nye ôlam. Éyoñe Bepharisien be maneya same, betebe ôsu ya ñyebe ôfe ba subu Yésus bebé.

Besadducéen, bôte be nji buni na ñwômane miñwuan wo ye boban, ba zu sili Yésus nsili a lat a ñwômane miñwuan, a ajô ya bobenyañ be nga bi minga wua. Ba sili nye na: “A Ñye’ele, Moïse a nga jô na: Nge môt éziñ a wu tee bon, monyañe wé a ye lu’u minga wé a biaé monyañe wé ate mvoñe bôt. Bobenyañe zangbwale béziñ be nga too be bia, ntôl ve luk a wu te li’i mvoñe bôt, ane a nga li’i monyañe wé minga wé; avale te fe e nga kui e be monyañe baa, nyô lale a kui nyô zangbwale. Mvus éte minga fe a nga wu. Nde ñhe éyoñe ya ñwômane miñwuan, minga nyô a ye bo nga za ya bobenyañe zangbwale ba? Amu bese be nga lu’u nye.”​—Matthieu 22:24-28, Mfefé Nkôñelan.

Yésus a belane mintilane mi Moïse Besadducéen ba kañese, a jô’ô na: “Ke mia fu’u fé amu mi ne teke yeme mintilan, teke yeme ngule Zambe! Éyoñe bôte ba ye wômô, a so vôm ya miñwuan, befam teke fe luk, binga ki teke fe ke meluk, ba ye tabe ve aval ane b’éngele be ne yôp. Mfa’a ya ke na bewu ba ye wômô, ye mi nji lañ e vôme kalate Moïse a kañete ajô ya ntut, ane Zambe a nga jô nye na: Me ne Zambe Abraham a Zambe Isaac a Zambe Jacob? A nji bo Zambe miñwuan, a ne Nyô bevevee. Mia fu’u fo’o fé angôndô.” (Marc 12:24-27, Mfefé Nkôñelan; Nkôlan 3:1-6) Éyalan éte ja bo na jama bôt a kam.

Yésus a maneya dibe Bepharisien a Besaduccéen menyu, nde betebe ôsu ya miñyebe mite mise mibaane ba fulan asu na be beta zu bôbôlô nye. Mone scribe wua a sili nye na: “A Ñye’ele, metiñe me Zambe atiñ avé de adañ?”​—Matthieu 22:36.

Yésus a yalane nye na: “Atiñ de adañ e ne na, A bôte ya Israël, vô’ôla’an; Tate [Yéhôva] a ne ve wua, ve Tate [Yéhôva] Zambe wongan: nyeke’e Éso [Yéhôva] Zambe wôé a nleme wôé ôse, a nsisim wôé ôse, a nlô wôé ôse, a ngule jôé ése. Di baa nde e ne na, Nyeke’e bôte befe ane wo nye’e womien. Atiñ afe e nji dañe metiñe ma.”​—Marc 12:29-31.

Éyoñ a wô’ô éyalan éte mone scribe a jô na: “Wo abele, a Ñye’ele, ô jôya fo’o mvaé na a ne ve wua; mfe a nji bo ve nye: nge môt a nye’e nye a nlem ôse, a nlô ôse, a ngul ése, a nye’e fe bôte befe ane a nye’e émien, mejô mete me adañe betite bese be atyi’i a di’i asu Zambe.” Amu Yésus a yene na mone scribe a te yalane mvo’é, nde a jô nye na: “[Éjôé] Zambe é se fe wo ôyap.”​—Marc 12:32-34.

Yésus a ye’ele e temple valé a nga ke melu melal (Nisan 9, Nisan 10, a Nisan 11). Bôte béziñ ane mone scribe nyi, ba te wô’ô meva’a ya vô’ôlô nye. Ve sake betebe ôsu ya ñyebe, balé bete be nji “fe beta jibi sili nye jam.”