A saéban amu a nambe Yésus ngômesan

Abui Bejuif da nyiñe fefele Mañ ya Galilée e nord-ouest, da wô’ô na Yésus a soya Décapole. Be yianeya fe wô’ô jam a ndeme bo éyoñ ôkôs ô nga vuñ e mañe ya Galilée, a nga bo na évuñulu a mendim bi tabe ne mieññ. Éko éziñ abui da yeme fe na a nga saé bôte be mbe be bili mimbia minsisim. Nde, “bôt abui” ba sulane mañ, mfa’a ya Capernaoum na be zu yange Yésus. (Marc 5:21) Ane a telé mebo e kindik, bôte be ne ôjeja’a ya yene nye.

Môte wua ya bôte be ne ôjeja’a ya yene Yésus a ne Jaïrus, évete jia ya nda Zambe. A ku si mebo me Yésus a taté na a dañe ye’elan nye: “Mone wom a ne mona minga a ye wu: me aye’elane wo na, ô zu beté nye mo môé, wôna a ye nyiñ, a bo mvo’é.” (Marc 5:23) Aval avé Yésus a zu yalane meye’elane me Jaïrus a bo a nlem ôse asu na, a volô ngo jé jia a nye’e abui, é bili ve mimbu 12?​—Luc 8:42.

Nté a ke nda Jaïrus, Yésus a tôbane jam afe da bo na a wô’ô bôt éngôngol. Abui bôt da bômane Yésus é ne ôjeja’a ya yen ane a bo asimba afe. Ve jame da, minga éziñ a to bôt été valé, a ôsimesane wé ô ne ve beta ôkon a bili.

Minga nyi a boya mimbu 12 metyi me kui nye nyul. A ne ngone Bejuif. A keya a wulu menda mebiañ teke’e ndoñ, moné ve ke. Ve ôkone wé ô ne ve ke ôsu a “nenenen.”​—Marc 5:26.

Mi ne kôme wô’ô amu jé ôkone wé wo te’e nye a ve fe nye ôsone nyul. Be wô’ô bo teke kobô ajô aval ôkon ete bôt été. A jam da dañ e ne na, Atiñe Moïse, éyoñe metyi ma kui minga nyul, a nji bo mfuban. Môt ase a nambe nye nge nambe biôm bié a yiane wobane mendim, a be’e fe nsem akekui mame ngô’é.​—Lévitique 15:25-27.

Éyoñe minga nyi a “wô’ôtaneya Yésus,” a jeñe nye. Mbôl a nji bo mfuban, a jeñe mezene mese a ne bi na a tulane jama bôt été, a jô’ô émiene na: “Nge ma nambe nye ja’ane ve mengômesan étam, ma ye bo mvo’é.” Éyoñ a kuiya na a nambe ngômesane jé, été été ve wô’ôtan ane metyi ma ji’a nye len! A “yeteya mfa’a ya ébubua ôkone jé.”​—Marc 5:27-29, Mfefé Nkôñelan.

Nde Yésus a jô na: “Za a te nambe ma?” Wo simesane na minga ate a bo aya éyoñ a wô’ô bifia bite? Pierre ve kame na Yésus a sili avale nsili te, nnye na: “Ndula bôt a bôman a bameta’ane fe wo!” Nde amu jé Yésus a sili na, “Za a te nambe ma?” Yésus nye na: “Môt éziñ a te nambe ma, amu ma yeme na ngul éziñ ja te kôlô be ma.” (Luc 8:45, 46, Mfefé Nkôñelan) Ôwé, nsaéan ôte wo te nyoñe Yésus abime ngul éziñ.

Éyoñe minga a yene na be kulaneya nye asoé, a ku Yésus mebo si a fô’ôba’an. E mise me bôte bese a mane kate bebela ase a lat a ôkone wé a aval a te bo mvo’é awolo te ébien. Yésus a jô nye a mbamba nleme na: “A ngo jam mbunane wôé ô nyiiya wo; kele ñhe mvo’é, ébubua ôkone jôé é yeteya.”​—Marc 5:34, Mfefé Nkôñelan.

Da yené fo’o na, nyu Zambe a te top asu na a jôé si a ne mbamba nlem, a yeme wô’ô bôt engôngol, a nji su’u ve na a nyoñ ngap a bôte bevok, a bili fe ngule ya volô be!