Jé fo’o ja ve môte mvit?

Mbôle Paque ya mbu 32 É.J. a nga zu a subu, Yésus a yeme a ésaé nkañete e Galilée. Nde fe, a yiane ke Jérusalem asu Paque, aval ane Atiñe Zambe da jô. Ve da, Yésus a bo de a ntyel ôse amu Bejuif ba jeñe na be wôé nye. (Jean 7:1) Mvuse ya valé, a beta bulane Galilée.

Éko éziñe na Yésus a ne Capernaoum éyoñe Bepharisien ba be bescribe ba zu be nye be so’o Jérusalem. Amu jé ba wulu abime dulu ete? Ba jeñe fane ya ve Yésus mekua na, a tyame metiñe me Zambe. Ba sili nye na: ‘Amu jé beyé’é bôé ba biasé [metum bimvame biangan]? Amu be abo te sôbe mo map éyoñ be adi.’ (Matthieu 15:2) Zambe a nji jô bôte bé na be tôñe metume ma jô na be ‘sôbe mo map akekui ékuteboñ.’ (Marc 7:3) Ve Bepharisien ba yene na e bo te bo nalé a ne mbia ntyaman atiñ.

A li’i ve be éyalan éyoñe jia, Yésus a liti aval avé ba vañe tyam Atiñe Zambe. A sili be na: “Mia ki, amu jé mia tyame abendé Zambe a jôé ya [metum menan]? Ke Zambe a nga jô na: Semé’é ésoo baa nyua, a na: Nyô a yo’é ésaa nge nyia, a yiane wôéban. Ve mia mia jô na: Nyô a jô ésaa nge nyia na: Mvolan ô nga yiane nyoñe be ma ô ntoo mvean ô ne étyi, môt ate aa bili ke na a semé ésaa wé.”​—Matthieu 15:3-6, Mfefé Nkôñelan; Nkôlan 20:12; 21:17.

Bepharisien ba jô na moné, biôme môt a bili, nge jôm ése é vebaneya be Zambe ane mvean, bi ne biôme ya temple, amu nalé be vo’o ke belane bie asu nsôñan ôfe. Ve nya ajôô a ne na, môt a ngenan a bili jôm é vebaneya be Zambe. Éve’an é ne na, fam é ne jô na moné nge biôm a bili bi nto “korban” nge na mvean asu Zambe nge temple, fo’o ve ane be vo’o beta belane mvean ôte asu jam afe. Moné a biôm bi mo bi nga’an émbié, ve fam ja jô na ja vo’o belane bie asu na a jalé miñyiane bebiaé bé be nto minnôm. Amu nalé, a vañe tube mimbe’e a bili mfa’a bebiaé bé.​—Marc 7:11.

Yésus a yeme wô’ô jam ete ôlun, amu ba vañe tonekan Atiñe Zambe; nde a jô na: “Ajô te mi veya atiñe Zambe momo, amu [metum menan]. A bôt mi ne medu’an, nkulu mejô Ésaïe a nga bele éyoñ a nga jô ajô denan na, Bôte ba be awumu me biyaé; ve minlem miap mi ne ôyap. Be akañe me momo nkañan, amu be aye’ele bôt mejô me ne mejô me bôt.” Bepharisien be nji bi éyalane ya ve Yésus éyoñ a lume be bifia bite. Nde a loene jama bôt na a subu nye bebé. Nye ve na: “Vô’ôla’an, a wôk: sa jôm je ake môt anyu je andamane nye; ve jam de aso môt anyu, nde de andamane môt.”​—Matthieu 15:6-11; Ésaïe 29:13.

Mvuse ya valé, éyoñe be nto nda, beyé’é ba sili Yésus na: “Ye wo ayeme na Bepharisien be ate yaa éyoñ be ate wô’ô njôan ôte?” Nde a yalane na: “Mvoñ ése Tate a ne yôp a nji bé, je aye tébane si. Joka’ane be: be ne mindindim mi aliti bôte zen. Nge ndindim wo awulu ndindim mbok, mi aye ku ébé mibaane.”​—Matthieu 15:12-14.

A ne ve ane Yésus a si’an éyoñe Pierre a kobô asu beyé’é bese bevok, a sili’i atinane ya jôm ja ve môte mvit. Yésus a yalan a jô’ô na: “Ye mi nji yeme na, jôm ése je ake anyu je alôt a ke abum a ke fé? Ve mam me akui anyu me aso nlem; mme [ma ve môte mvit]. Amu mam me aso bôte minlem, mme ma: mbia be mam bôt be asimesan, ñwôane bôt, mejian, bibon, wup, bibôta, a ébiasé; mme me ne mam me [ave bôte mvit]; ve ajô ya di, te taté sôpe mo, nde e ne te [ve bôte mvit].”​—Matthieu 15:17-20.

Yésus a nji kamane mfubane ya nyul, nge simesane na môt a nji yiane sôbe mo ôsusua na a yame bidi nge di bie. A viane vini mboane medu’ane betebe ôsu ya ñyebe ba jeñe na be tonekan metiñe me Zambe me ne zôsô a zene ya metume me bone be bôt. Nya ajôô a ne na, mbia be mam ba so môt nlem mbe ba bo na a bo mvit.