Ngo’o miaé mi bôte mi ne te bisi mam

Yésus a bili abui nye’an asu Jean Baptiste, ve aval avé abui bôte da yene Jean? Yésus a jô na: “Bôte ya miaé wu . . .  be afunan ane bongô be to si vôm bôt be bo be sula’an, be aloene ba bevok a jô na, Bi maneya loñe mindiñ, mi te jem; bi maneya yi du, mi te yi.”​—Matthieu 11:16, 17.

Jé Yésus a kômbô jô? A ve atinan a jô’ô na: “Jean a nga zu, te di, te nyu, be ajô na, a ne mbia nsisim. Mone môt a nga zu, ve di, ve nyu, nde be ajô na, Tameka yenane môt a ne mbia ndian, a dañe nyu vin, a ne mvôé benyoñe taxe, a bôt be ne abé!” (Matthieu 11:18, 19) Jean a nga ve ényiñe jé tyi’ibi ane mone Naziréen, a nga kui kui na a tyi vin, ve jame da miaé bôte wu wo jô na a bili mimbia minsisim. (Nlañane Bôt 6:2, 3; Luc 1:15) Yésus ki a nyiñ ane bôte bese. A di a nyu te beté ôdo’é, ve ba jô na a ne ndok a mbia nyuane meyok. Da yené fo’o na miaé bôte wu ô ne étyi te yene jam éziñe mvaé.

Yésus a ve’e miaé te a bone be bongô be too makit a ba bene jem éyoñe bongô bevo’o ba loñe mindiñ, a ba bene yôn éyoñe ba bevo’o ba yôn. Nde a jô na: “[Nalé fe, MN] ñyeman wo akabe amu mimboane mié.” (Matthieu 11:16, 19) Ôwé “mimboane” miap, nge na mame Jean ba Yésus ba bo, mia liti na mame bôte ba jô be, me ne bibôta’a mejô.

Éyoñ a maneya ve’e miaé bôt ôte ane bôte be ne te bisi mam, Yésus a komekane bitisone ya Chorazin, Bethsaïda, a Capernaoum, bevôm a nga bo beta be mam. Yésus a jô na nge a nga ye bo mame mete e Tyr a Sidon, bitisone Bephénicien bôte ya bitisone bite be nga ye kôñelane minlem. A kobô fe ajô ya Capernaoum, vôm a tabeya ôbe nté. Ja’a vôm ate, abui é nji bisi mam a jô. Yésus a jô a lat a tison éte na: “Bôte ya Sodome be aye dañe yen mvaé môs Zambe a ye tyi’i bôte mejô.”​—Matthieu 11:24.

Éyoñ éte Yésus a lu’u Ésa wé, nnye a solé “beyem mam a bôt be ne mefek” bidima bi mame ya nsisim, ve a liti’i bie e be bezezé bôt, ba be ne ane minkeñelé mi bon. (Matthieu 11:25) A ve be abeñe mbañete: “Za’ane be ma, mia bese mi awô’ô njuk, a kate mimbe’e, ma me aye ve mia awo’an. Beka’an mbe’e wom, a yé’é be ma; amu me ne évôvoé, a nlem ne mieññ! wôna minlem mienan mi aye wo’an. Amu ésaé jam é ne tyi’ibi, a mbe’e wom ô ne éveves.”​—Matthieu 11:28-30.

Yésus a ve bôte mvolane minlem aval avé? Betebe ôsu ya ñyebe ba ka’a bôt adite mbe’e a mame ya metum, aval ane metiñe ya môse Sabbat. Ve Yésus a volô bôte minlem éyoñ a ye’ele be benya mejôô a lat a Zambe, ñye’elan ô nji bi ajô éziñ a metum. A volô fe minlem mi bôte mi ju’uya a mbia éjôé ja so be betebe ôsu ya pôlitik, a ba ba wô’ô bebien éngôngol amu mam abé map. Yésus a liti be aval avé be ne bi njamane ya mam abé map a aval avé be ne tabe mvo’é a Zambe.

Ba bese ba kañese mbe’e Yesus be ne ngule ya ve bebien ngumba be Zambe na ba kañe nye, Ésa wongan a ne njalan a nkoan éngôngol a mvam. A nji bo mbe’e ô ne adit, amu mevimda me Zambe me nji bo adit.​—1 Jean 5:3.