Ñye’elan a lat a njaman

Mame Yésus a bo a mam a jô, ma nambe bôt aval ane minlem miap mi né. Jam ete da yené ne ngeññ nda môt éziñ ya Galilée. Mone Pharisien a to jôé na Simon a bañete Yésus na a zu di, éko éziñ asu na a kôme yen nyô a bo beta be mam. Yésus a kañese amu a yene na a bili fane ya ve nkañete, fo’o ve aval ane a nga kañese mimbañete mivok mi so’o be benyoñe taxe a bebo mam abé.

Ve jame da, be nji belane Yésus aval be wô’ô zu ba belane beyeñ. Éyoñe môt a wulu a besilefas minjoñe ya Palestine, mebo mé ma mane bo ayôñ a mvit, amu nalé be wô’ô sôbe nneñ mebo a bivôvoé mendim. Ve be nji belane Yésus aval ete. Be nji zu wubane nye ane be wô’ô zu ba bo. Be wô’ô fe bo be sôé nneñ mone mbon nlô na be liti na ba mvamane nye, a na ba belane nye mvo’é. To’o mam mete be nji me bo asu Yésus. Nde ñhe, ye ba te fo’o nyoñ Yésus avale da yian?

Bôte ba te bañete, ba mane tabe tebele a ba taté na ba señ bidi. Éyoñ be nga di, minga éziñ a nyiin asoé teke na ba te bañete nye. Ba yeme nye nlam ôte ane “mbo abé minga.” (Luc 7:37, Mfefé Nkôñelan) Bone be bôte bese be ne bebo mam abé ve, a ne v’ane minga nyi a nyiñe fo’o aval e nji yian, ékoziñ a ne wôlôwôs. A yianeya wô’ô miñye’elane mi Yésus, ja’a mbañete asu ‘ba bese ba kate mimbe’e na be zu be nye asu awo’an.’ (Matthieu 11:28, 29) Bifia a mimboane mi Yésus mia te nye yiane nambe, nde a te tyi’i na a zu yene nye.

A tebe Yésus mvus, a kute meboñ. Mili’i me nga kui nye mis me lene’e mebo me Yésus, a nga fimine me a ésile jé. A taté fe na a latan anyu dé a mebo me Yésus a sôé nye mon ôlobinda a te so nye. Simon a yene jam ete, a a nji ve’ele wô’ô mvaé; ane a jô émiene na: “Nge môte nyô a mbe nkulu mejô, a nga ye yeme za e nye minga a nnambe nye a né, a na a ne mbo abé minga.”​—Luc 7:39, Mfefé Nkôñelan.

Mbôl a yemelan ôsimesane Simon, Yésus a jô nye na: “A Simon me bili jam éziñ ya jô wo. Nye Yésus na: Kobô’ô a Ñye’ele. Nsé memvôla a nga bili bôte be bili nye memvôla bebaé: Wua bedenié mintete mitan, nyô mbo’o bedenié mewôm metan. Mbôle be nji bi jôme ya ya’an, a nga jamé mvôla e be be bebaane. E mbé a ye dañe nye’e nye?” Éko éziñ Simon a yalan a liti’i na ajô te e nji nambe nye, a jô’ô na: “Ma ve’e fe’e na e nyô a nga jamé beta tañ.”​—Luc 7:40-43, Mfefé Nkôñelan.

Yésus a kate nye na a bele. Éyoñ éte a fombô minga a jô Simon na: “Ye ô lôô e minga nyô? Ma te nyiin e nda jôé, ô nji ve ma mendim asu mebo mam, ve nye a te ve mebo mam émumun a mili’i mé, a fimi me a ésile jé. Ô nji latane ma anyu, ve nye, nté ma te nyiin, a nji jô’é latane mebo mam a anyu dé. Ô nji sôôé me mbone nlô; ve nye a maneya sôôé ôlobinda e mebo mam.” Yésus a mbe ngule ya yemelane na minga nyi a jôban a na a kôñelaneya nlem amu mbia ényiñ a mbe a nyiñik. Nde a mane bifia bié a jô’ô na: “Ma jô wo de na: ézu’u mam abé jéé é ntoo njaman, amu e nye a dañeya nye’e. Ve nyô ba jamé tyôtyoé a nye’e fe tyôtyoé.”​—Luc 7:44-47, Mfefé Nkôñelan.

Yésus a nji ve’ele kañese mvit ényiñ éte. A viane liti na a wô’ô bôte be nga bo mbia be mam éngôngol, bôte ba liti na ba jôban a kôñelane minlem a jeñe mvolane be Krist. A abime mvolane nlem minga nyi a yiane bi éyoñ Yésus a jô nye na: “Mam abé môé, me ntoo njaman. . . . Mbunane wôé ô nyiiya wo, kele mvo’é.”​—Luc 7:48, 50, Mfefé Nkôñelan.