Ba wôé môt abô’ô abialé

Nté minlômane mi Yésus mia bo ésaé nkañete jap e Galilée, môt a nga taté kañete ajô Yésus a nji bi fili éte. Jean Baptiste a ngenan ve mimbôk den a nga ke mimbu mibaé.

Jean a nga kobô bosa na e nji be zôsô na, Njô bôte Hérode Antipas a nyoñ Hérodiade ngale monyañe wé Philippe ane ngale wé. Hérode a nga tyam alu’u dé a minga ôsu asu na a lu’u Hérodiade. Aval ane Atiñe Moïse da liti, nde ete Hérode a kômbô liti na a tôñ, alu’u te é ne mejian a da tyame metiñ. Amu a nji nye’e minkomekan Jean a bo nye, Hérode a bi nye a futi nye mimbôk, éko éziñ na Hérodiade nnye a tindi nye na a bo nalé.

Hérode a nji fo’o yeme jé a yiane bo Jean, amu bôt ba ‘yene nye ane nkulu mejô.’ (Matthieu 14:5) Hérodiade nye a kôme yeme jam ba yiane nye bo. A “siñe nye,” a ke fe ôsu a jeñe fane ya wôé nye. (Marc 6:19) A su’ulane fe bi fane te.

Mone nté ôsusua na ba di Paque ya mbu 32 É.J., Hérode a bo beta abô’ô ya abialé dé. Beta be bôt a bivete ya nkane bita Hérode a betebe ôsu ya Galilée be ne abô’ô ete. Nté abô’ô ete da lôt, ba lôme Salomé mone Hérodiade a nga bi a Philippe, na a ke jem asu beyeñ. Bôte ba nye’e abô’ô dé.

Mbôl a dañe wô’ô ngone ntoñe jé mvaé, Hérode a jô nye na: “Sili’i ma jôme wo kômbô, me ve wo je.” A kane fe nye ngana na: “E jôm ése fo’o wo ye sili, ma ye ve wo je, ja’a na ma sal éjôé jame zañ.” Ôsusua na a yalan, Salomé a kui atan a ke jô nyia na: “Jé nje me ke sili?”​—Marc 6:22-24, Mfefé Nkôñelan.

Ke fan ébien Hérodiade a mbe a jeñe’e le! A ji’a yalane na: “Nlô Jean Baptiste.” Été été, Salomé ve bulane be Hérode a ja’é nye na: “Me ayi na ô ji’a ve me nlô Jean Baptiste be’e été.”​—Marc 6:24, 25.

Jam ete da taé Hérode nlem abui, amu beyeñ a te bañete ba te wô’ô ngaka’a a nga bo Salomé. Jam ete da ndeñele nye na, a bo teke tôé ngaka’a jé to’o nalé a tinane na a wôé môt a nji bo jôm. Nde ñhe, Hérode a lôme mba’ale mimbôk, a mane fe nye kate jam a yiane bo. A môt ate a beta so mvuse ya valé a bili nlô Jean Baptiste ô bete ésua été. Nye ve ve Salomé nlô ôte, nye’ ki a kele wô be nyia.

Éyoñe beyé’é be Jean ba wô’ô jam da te boban, ba zu nyoñe mbim a ke jame wô. Mvuse ya valé ba ke kate Yésus mbia jam ate.

Ôbe nté ô lôteya, éyoñ Hérode a wô’ô na Yésus a saé bôt, a tita’ane fe mimbia minsisim, nlem ô bôô ke nye si. A sili émiene nge Yésus, môt a bo mame mete, a nji bo Jean Baptiste “a wômôya miñwuan.” (Luc 9:7, Mfefé Nkôñelan) Nalé Hérode Antipas a kômbô yene Yésus. Sa ke amu a kômbô wô’ô mejô mé. Hérode Antipas a kômbô yene Yésus asu na, a yeme nge mame ba jô a lat a nye me ne été nge momo.