Yésus a ve melebe a lat a ékol ôbak a mboon abé

Yésus a ndeme fo’o mane liti beyé’é bé aval avé ba yiane yene bebien. Ba yiane yene bebien ane bone be bongô, teke bete bebiene yôp a teke jeñe minkôñ. Beyé’é ba yiane ‘nyoñ aval étume mone te a jôé dé, nalé ba ye fe nyoñe nye.’​—Matthieu 18:5.

Minlôman mia to mi sañetan ajô ya môt a dañe ba bevok, nde ba yiane nyoñe mejô me Yésus ma ane minkomekan. Éyoñe ji, nlômane Jean a kate Yésus jam éziñ é ndeme boban a jô’ô na: “Bi nga yene môt a va mimbia minsisim amu jôé dôé; ane bi nga kame nye, amu a nji tôñe bia.”​—Luc 9:49.

Ye Jean a yene na, fo’o ve minlômane mie étam mia yiane vaa bôte mimbia minsisim? Nge nalé a ne été, aval avé Bejuif ba, be ne ngule ya vaa bôte mimbia minsisim? Jean a yiane simesane na môte nyi a nji yiane vaa mimbia minsisim amu a nji tôñe Yésus a minlômane mié.

Jean a zu kam amu Yésus a jô na: “Te kamane nye, amu na teke môt éziñ a bo étua jam e jôé dam, a ne ji’a beta kobô ma abé été été. E nde ñhe, e nyô a nji tebe bia e ngame yat, nye a ne ngame jangan. Ajô te, e môt ase a ye nyuu mia ékpwase mendim amu na mi ne bôt be Krist, ma kate mia bebela na, a se ngul ya jañele ma’ane mé.”​—Marc 9:39-41, Mfefé Nkôñelan.

Nya ajôô a ne na, éyoñ éte, môt a nji be ntindane ya tôñe Yésus Krist asu na a bo ngame jé. Valé akônda Bekristen é mbe é ngenane teke kômban; nde nge môt a nji wulu a Yésus nalé a nji tinane na a ne nsiñe wé nge na a wumulu évuse ñyebe. Da yené na môt ate a bili mbunan éyôlé Yésus, a mejô me Yésus ma liti na môt ate a ye bi ma’ane mé.

Jam afe e ne na, é ne bo mbia jam nge bifia a mimboone minlômane mia bo na môt ate a kolé ôbak. Yésus a liti na: “E môt ase a ye dutu wua ya ayôme bongô da buni ma dina na a ku abé été, jam da dañ mvaé mfa’a wé e ne na, be fañe nye ako’o nnen ba ko’o de bidi tyiñ, a wua nye e mañ été.” (Marc 9:42, Mfefé Nkôñelan) Ane Yésus a liti, beyé’é bé ba yiane wua jôm ése é ne bo na be kolé ôba’a fé, ja’a biôm bi ne nya mfii ane wo, abo, nge dis. E ne mvaé ya tabe teke bidima bi biôme bite a jibi ke nyiine nalé Éjôé Zambe a lôte na, bi be’e bie a jañ e Géhenne (Mbi’ili ya Hinnom). Minlôman mi yianeya yene mbi’ili te e fefele Jérusalem vôme ba di’i mbuan, nde be ne ngule ya wô’ô na, vôm ate a ne ndeme ya njañane ya nnôm éto.

Yésus a bemene fe be a jô’ô na: “Taba’ane ntyele ya biasé wua ya ayôme bôte di. Amu ma kate mia na beéngele bap ya yôp, éyoñ ése, ba fombô asu Ésaa wom a ne yôp.” E mise me Ésa, “ayôme bôte” ete e ne mfi abim avé? Yésus a kobô ajô môt a bili mintômba 100, ve wua y’été wo jañ. Môt ate a li’i mi 99 na a ke jeñe wu ô ne njañan, a éyoñ a yene wô a vak a wô a dañe mi 99 mi nji jañ. Yésus a beta jô na: “Nde nkômban ésoo wônan a ne yôp ô ne na wua ya ayôme bôte di ô bo te jañ.”​—Matthieu 18:10, 14, Mfefé Nkôñelan.

Éko éziñ Yésus a simesane nsañeta’ane ô mbe e zañe minlômane mié a lat a môt a dañe ba bevok, nde a jô be na: “Biane nku e be miabebien été, taba’ane fe mvo’é wua a nyô mbok.” (Marc 9:50, Mfefé Nkôñelan) Nku wo bo na bidi bi tu’a bo zam. Bifia bi bili nku bi ne bifia môt a ne ji’a kañese a bifia bia volô na mvo’é é tabe. Nsañeta’ane ki ô nji volô asu mvo’é.​—Becolossien 4:6.

Biyoñe biziñ, beta mejô me ne kui, ve Yésus a liti aval avé be ne me kôm. A jô na: “Nge monyoñ a bo wo abé, kele’ liti nye vôm a kop, mia nye bebaé: nge a wô’ô wo, wôna mia monnyoñ mi lateya ñbwa.” Nge a bo te wô’ô wo? Yésus a lebe na: “Lo’ene môte wua nge bôte bebaé, nalé bôte bebaé nge bela be aye tiñeti mejô mese ane be akobô.” Ja’a mboon ôte ô nji ve bibuma, ba yiane ke ajô te ‘akônda été,’ nalé a tinane na e yene bemvendé na be tyi’ ajô ete. Nge a ke ôsu a bene wôk? “A ye tabe mfa’a wôé ane môt a ne te yeme Zambe a nyoñe taxe,” avale bôte Bejuif be mbe te yeñ a be.​—Matthieu 18:15-17.

Bemvendé y’akônda ba yiane tôñe Mejô me Zambe. Nge ba yene na mbo abé a yian minkomekan a melep, ntyi’ane wop ‘wo ye bo ô nto ntiñetane yôp.’ Ve nge be lôô na môt a nji ku, wo ye bo ô nto ‘nkulane yôp’ été. Metiñe mete ma ye bo nya mfii éyoñ akônda Bekristen da ye teléban. Yésus a jô a lat a avale mintyi’an ete na: “Vôm bôte bebaé nge bela be asulan a jôé dam, me ne be zañ vôm ate.”​—Matthieu 18:18-20.