Môte ya Samarie a liti na a ne fo’o môt a ne nyu mbo’o bebé

Nté Yésus a ngenane fefel Jérusalem, abui Bejuif da subu nye bebé. Abui da kômbô nyoñe ñye’elane wo so be nye, ve bevo’o ba kômbô ve’ele nye. Wua ya be be a ne ñye’ele Atiñ a sili nye na: “A Ñye’ele, ma yiane bo aya ane ma ye nyoñ ényiñe ya melu mese?”​—Luc 10:25, Mfefé Nkôñelan.

Yésus a yeme na môt ate a nji sili nye nsili ôte fo’o ve amu a kômbô bi éyalan. Éko éziñ a yi na Yésus a jô jam da ye bo na Bejuif be wô’ ôlun. Yésus a kui na a yeme na môt ate a mbili ôsimesane wé. Nde Yésus a yalane nye a fe’ ése asu na a tindi môt ate na émien a kulan ôsimesane wé.

Yésus a sili na: “Jé é ne ntilane kalate metiñ? Wo alañ aya?” Môt ate a te yé’é Atiñe Zambe, nde a ve éyalane ja so été. A belane bifia bia so kalate Deutéronome 6:5 a Lévitique 19:18, a jô’ô na: “Nyeke’e [Yéhôva] Zambe wôé a nleme wôé ôse, a nsisime wôé ôse, a ngule jôé ése, a nlô wôé ôse; nyeke’e fe môt a ne wo bebé, ane wo anye’e womien.” (Luc 10:26, 27) Ye mbamba éyalane fo’o le?

Yésus a jô môt ate na: “Ô yalaneya zôsô: bo’o nalé, wôna wo aye nyiñ.” Ve, ye nne nsañetan wo mane valé? Môt ate a nji yi na be ve zezé mon éyalane nalé; a jeñe na a “liti na émien a ne zôsô,” asu ya na be yeme na, mfasane wé wo too abeñ, a na a bele éyoñ a nyoñe bôt aval a bo. Nde a sili na: “Môt a ne me bebé a ne za?” (Luc 10:28, 29) Bi ne buni na nsili ôte ô ne zezé nsili, ve ô ne nya édo’o. Amu jé bia jô nalé?

Bejuif ba buni na ‘môt a ne be bebé’ a ne fo’o ve môt a ba’ale metume Bejuif, a da yené v’ane kalate Lévitique 19:18 a yemete fe de. Nya ajôô a ne na, mone Bejuif a ne yemete na, a “nji yiane fulane mam” a môt a nji bo môte ya Bejuif. (Mam Minlôman 10:28) Ajô te mone Bejuif, nge éko éziñ abui Bejuif be ne beyé’é be Yésus, be ne yene bebien na be ne zôsô éyoñ ba yeme nyoñe Bejuif bevok. Ve, be ne biasé môt a nji bo mone Bejuif, amu a nji bo ‘môt a ne be bebé.’

Aval avé Yésus a ne sôan ôsimesan ôte, teke balé môt ate nge balé Bejuif ba vô’ôlô nye? A belane nkana na a bo de a jô’ô na: “Môt éziñ a nga kôlô Jérusalem a ke Jéricho; ane a nga koé bôt be nga bo be wôlé’ bôte biôm, mbe be nga va nye ngômesan, a bôme nye, a li’i nye ane mbim.” Yésus a ke ôsu a jô na: “Prêtre éziñ a nga lôte zen éte: éyoñ a nga yene nye, ane a nga sa’ale. Aval ete fe, môte ya Lévite, éyoñ a nga kui vôm ate, a yene nye, a nga sa’ale. Ane môt éziñ ya Samarie, éyoñ a nga ke a wulu, a nga kui vôm a nga bô: éyoñ a nga yene nye, a nga ko nye éngôngo.”​—Luc 10:30-33.

E môte Yésus a kobô nye nlañe wu a kôme yeme na, abui beprêtre a belévite da saé e Temple ba nyiñe Jéricho. Asu na be kôlô Temple a bulane menda map, ba wulu tañe bekilimeta 23. Njoñ ôte ô ne abé, amu bezemimfaka be ne njalan été. Nge beprêtre a belévite ba tôbane mone Bejuif mbok a to minju’ été, nga ba yiane volô nye? Ve nlañe Yésus a laane wu, be nji de bo. A ne môte ya Samarie, môte Bejuif ba biasé, nnye a nga zu volô nye.​—Jean 8:48.

Aval avé môte ya Samarie a nga volô mone Bejuif be nga bôme nyi? Yésus a ke ôsu a jô na: A nga “ke vôm a nga bô, a tiñeti nye meveñ, a sôé nye mbon a vin meveñ; ane a nga beté nye tite jé yôp, a ke nye nda beyeñ, a ba’ale nye. Alu da e lôteya, ane a nga nyoñe franc ébaé, a ve je mie nda beyeñ, a jô na, Ô tuka’a ba’ale nye; nge tañ je aye bo abui, éyoñ me aye beta so, me aye ya’ane wo.”​—Luc 10:34, 35.

Éyoñ a maneya kane nkana, Yésus, Beta Ñye’ele, a sili môte nyi nsili na a bibi nye abaé abum a jô’ô na: “Bôte bete bela, za wo asimesane na, a nga bo môt a nga koé bôt be nga bo be wôlé’ bôte biôm, ane môt a ne nye bebé a yiane bo?” Éko éziñ, môt ate a yalan a wô’ô aval étame ya jô na “môte ya Samarie,” nde a yalane nye na: “Nyô a nga ko nye éngôngo.” Nde Yésus a ve ñye’elan wo so nkana ôte ô too ne sañesañ a jô’ô na: “Kele’ bo aval ete.”​—Luc 10:36, 37.

Za aka’a mbamba fatane ñye’elane di! Nge Yésus a nga ye su’u ve na a kate môte nyu na, to’o môt a nji bo mone Bejuif a ne fe môt a ne nye bebé, y’émien a Bejuif be nga to valé be nga ye kañese jame te? Bia ve’e na teké’é. Ve jame da, mbôl a belane mame bôte ba vô’ôlô nye ba kôme yem éyoñ a bo nlañ ôte, éyalane ya nsili, “Môt a ne ma bebé a ne za?” ja kôme yené ne ngeññ. E môt a ne fo’o wo bebé a ne nyu a liti bôte bevo’o nye’an a mvam avale Kalate Zambe a ye’ele.