Miñye’elan a lat a fulu anyep a meye’elan

E Nkôle Beolivier mfa’a ya est, asiliki nkôl, nlame Béthanie ô ne valé, bebé a Jérusalem tañe kiliméta élal. (Jean 11:18) Nne Yésus a ke wôé, nda be Marthe a Marie, bobenyañ. Ba ndôme jap Lazare be ne bemvôé be Yésus, a be ne meva’a ya nyoñe nye.

A ne fo’o mbamba jame na wo bi Messie ane nneñ. Marthe a ne ôjeja’a ya mane kôme mam ma sili asu Yésus, nde a taté na a kômesan abui bidi. Nté Marthe a ne bisaé été ne tubuk, monyañe wé Marie nye a to mebo me Yésus a vô’ôlô nye. Mvuse mon étun éyoñ, Marthe ve so a jô Yésus na: “A Nti, ye jame te teke ndeñele wo na mojañ a li’i ma me bo ésaé étam? Jô’ô ñhe nye na a volô ma.”​—Luc 10:40, Mfefé Nkôñelan.

A li’i komekane Marie, Yésus a viane ve Marthe melep amu a jô’é na abui mam e nyoñe nye éyoñe jé, nye na: “A Marthe, a Marthe, nleme wôé ô tyele yôp, wo ayen njuk amu mam abui: ve jame da [e ne mfi]; amu Marie a tobeya jam e ne mvaé, be se ngule ya va nye de.” (Luc 10:41, 42) Ôwé, Yésus a liti valé na, é nji bo mfi ya nyoñ abui éyoñe na be yame nye abui bidi. Fo’o ve zeze ésua bidi jia é ne yian.

Nkômbane Marthe ô nji bo abé. A kômbô liti fulu anyep. Ve amu ôsimesane wé ôse ô tii ve bidi a yam, nalé a bo na a sup beta ñye’elan a so be Mona Zambe émien! Yésus a ngôné na, Marie a te nyoñe ntyi’an ô ne mvo’é, a na wo ye bo nye mfi ayab éyoñ. Bia bese bia yiane fe nyoñe ñye’elan a jam ete.

Éyoñ éfe, Yésus a ve fe beta ñye’elan ô ne ve avale da a lat a ajô afe. Wua ya beyé’é bé a sili nye na: “A Tat, ye’ele’ bia [ane bi] ye’elane Zambe, ane Jean a nga ye’ele beyé’é bé.” (Luc 11:1) Yésus a nga bo de den a nga ke mbu wua a étun Nkañete wé ya Nkôle yôp. (Matthieu 6:9-13) Ve, éko éziñ ñyé’é ate a nji be valé éyoñe te. Nde Yésus a beta ba’alane mam me ne mfi. Ane a ve éve’an na, a ngôné mfi ya bo mbane meye’elan.

A jô na: “Mi to va, za a ne mvôé, nge a ke be nye zañ alu, a jô nye na, A mô, kôlé’ me mimamane mi fembé mila; amu mô a te so zen, me se bidi ya ve nye; nnye ke a ye yalan nda été na, Te ndeñele ma: mbé ô nto ndiban, bia be bon bi bô énoñ; me se ngule ya kôlô si a zu ve wo. Me ajô mia na, Akôsa bo a ye bo te kôlô si a ve nye amu a ne nye mvôé, a ye kôlô si a ke ve nye abim a jeñ, amu a bo mbane ya ja’é nye.”​—Luc 11:5-8.

Yésus a nji jô na Yéhôva a nji kômbô yalane bia éyoñe bia sili nye mam ane mvôé éte. A viane liti na nge mvôé ja taté yemete mebo si, a su’ulane ve nyô mbo’o jôm a sili amu a k’ôsu a ja’é, teke vaa nge beté, Ésa wongane ya yôp, nnye a nye’e bia, a ye yalane bebo bisaé bé ba wulu ba’aba’a a nye! Yésus a ke ôsu a jô na: “Jaka’an, wôna mi aye nyoñ; jeñan, wôna mi aye yen; kutan mbé, ndemben a ye dii mia wô. Amu bôte bese môt a ja’é a ye nyoñ; môt a jeñ a ye yen; a môt a kut mbé, a ye dii nye wô.”​—Luc 11:9, 10.

Yésus a yemete ôsimesane wé a zene y’éve’an é tii a bone be bôt a jô’ô na: “Ésaa mbé ya be mia, nge monafame wé a sili nye kos a ye viane ve nye akok? Nge na nge a sili nye kos a ye viane ve nye nyo éjiane kos? Nge na nge a sili atyi kup, a ye viane ve nye kata ôlet? Nge mia mi ne mbia be bôt mia yeme ve bone benane mbamba be biôm, kô fé Ésaa a ne yôp a ye dañe ve [mbamba] nsisim e be ba ba sili nye nye!” (Luc 11:11-13, Mfefé Nkôñelan) Nga mbamba ndi nleme bi bili le na, Ésa wongan a n’ôjeja’a ya vô’ôlô bia a yalane bia éyoñe bia sili nye biôm?