Yésus a liti vôm meva’a ma so

Yésus a ndeme mane ve ñye’elan a lat a meye’elan, ve a nji bo éyoñ ôsu le a kobô ajô te nté ane a nga taté ésaé nkañete jé. Éyoñ a mbe a bo’o mesimba e Galilée, be nga jô na a bo me a zene ya ngule ja so be njôô mimbia minsisim. Éyoñe ji, bôte ya Judée fe ba beta simesan ve avale da.

Éyoñ Yésus a titane mbia nsisim a bo na môte a kate kobô, abui bôt e ne fe’e ne vema. Ve bôte ba biasé nye be nji yene mam avale da. Ba vañe bôté nye ajô be jô’ô na: “A va mimbia minsisim a ngule ya Beelzébul njô mimbia minsisim.” (Luc 11:15) A bevo’o ba kômbô yeme mam mefe ma liti za a ne Yésus, nde ba sili nye ndem ja so yôp.

Yésus a yemelane na ba kômbô ve’ele nye, nde a yalane be aval a nga bo a bôte be nga biasé nye e Galilée. A liti be na éjôé ése e ne nsalane zañ ébien é vo’o tabe ayabe éyoñ a jô be na: “Nge Satan a saleya zañ a siñ émien, ayoñe dé de aye tabe aya?” Ane Yésus a jô be éyoñe jia na: “Ve nge me ava mimbia minsisim a ônyui Zambe, wôna [Éjôé] Zambe e kuiya be mia.”​—Luc 11:18-20.

Éyoñe Yésus a jô na ‘ônyui Zambe’ a bo na bôt ba vô’ôlô nye be simesane jam é nga boban Israël. Bôte be nga to nseñe nda Pharaon be nga jô éyoñe be nga yene Moïse a bo’o asimba na: “Ônyui Zambe vi!” A ne fe ‘onyui Zambe’ ñwô ô nga tili memvinda awôm e bifase meko’o bibaé. (Nkôlan 8:19; 31:18) Avale da fe, “onyui Zambe”: mbamba nsisim wé nge ngul a bo je mam, nje ja volô Yésus na a titane mimbia minsisim a saé bôte ba kon. Ajô te bi ne jô na Éjôé Zambe é kuiya e be besiñe be Yésus, amu émien, Njôô ya Éjôé éte a ne be mis été, a bo fe mesimba.

Ngule Yésus a bili mfa’a ya titane mimbia minsisim é ne ndem ja liti na, a ne ngul a dañe Satan. A yemete ôsimesan ôte éyoñ a kobô ajô môt a ne ngul a dañe nyi mbok a ba’ale nda njô bôt, a bili fe abui bityé mewosan. A beta ba’alan éve’an éte éyoñ a kobô ajô mbia nsisim a kôlô môte nyul. Nge môt a nji jalé vôme mbia nsisim a te kôlô a mam me ne abeñ, mbia nsisim ate é beta ke so a mi mivo’o zangbwal. A été môt ate ja ye bo abé a dañe ji ya atata’a. (Matthieu 12:22, 25-29, 43-45) A ne fo’o jam da kui a ayoñ Israël.

Mejô mete ma nambe minga éziñ a vô’ôlô Yésus, nde a jô na: “Ébotan a abum e nga biaé wo, a mebé ô nga nyañ.” Binga bese be mbe Bejuif be mbe be kômbô’ô biaé môt é bo nkulu mejô, e dañe dañe nyi a mbe a yiane bo Messie. Ajô te minga ate a simesane fo’o na, Marie a yiane bi meva’a me ne ngum aval amu nnye a ne nyia ñye’ele ate. Ve Yésus a komekan minga ate a liti’i jam da so môt benya meva’a, a jô’ô na: “Ve ajô de adañe di e ne na, Ébotan a bôt ba wô’ô mejô me Zambe a ba’ale me.” (Luc 11:27, 28) Yésus a nji liti to’o v’éyoñe jia na Marie a yiane bi ngum aval duma éziñ. Ja’a bi ne fam nge minga, benya meva’a bi ne bi me tii a ésaé bia bo Yéhôva, sa ke minkañ mi ne zañe nda bôte jangan nge ke mam bia kui na bi bo.

Aval Yésus a nga bo Galilée, a komekan bôte ba sili nye na a liti be ndeme ja so yôp. A jô be na ba ye bi ndem éziñ nge ô vaa “ve ndeme Jonas.” Jonas a ne ndem amu a nga tabe melu melal abume kos, a ke fe kañete Ninive a ayo’ ése, a jam ete é nga bo na bôte bete be jôban abé dap. Ve Yésus a jô na: “Mi lô, môt a ne va a dañe Jonas.” (Luc 11:29-32) Yésus a dañe fe Salomon, nnye ate minga a mbe njô bôte ya Shéba a nga zu wôk.

‘Éyoñ be maneya bo’é lampe’ Yésus a jô na, ‘môt a nji telé nye ébé si, nge éwolo si, ve telé nye tawôlô yôp.’ (Luc 11:33) A kômbô jo na, e ye’ele a bo mesimba mise me bôte ba, a ne v’ane ba solé éfufube ya lampe. Amu be nji beme mise map e mam a bo, ba supe nsôñane ya ésaé jé.

Yésus a ndeme fo’o titane mbia nsisim, a bo fe na môt a mbe mvuk a beta taté na a kobô. Jam ete da te yiane tindi bôte na be ve Zambe duma a kañete bôte bevo’o mam Yéhôva a bo. Nde Yésus a ve bôte ba yene jam ese a bo v’abé abendé di: “Ajô te fasek a yen nge éfufup é ne be wo, é nji bo dibi. Ajô te nge nyôle jôé ése é ne éfufup, te vôm a ne dibi, je aye fo’o bo éfufup ne lut! Aval ane lampe a dañe faé a ve wo éfufup.”​—Luc 11:35, 36.