Nda bôte Yésus ja ke Jérusalem

Éyoñe ya nda bôte Joseph ba bemvôé bap, a bivuvumane biap, ba yiane ke Jérusalem na be ke jem abô’ô Pâque ya mbu ôse é kuiya. (Deutéronome 16:16) A té Nazareth akekui Jérusalem, a ne bo bekiliméta 120. A ne éyoñe ya mevak asu môt ase. Yésus a mbili mimbu 12, a a ne ôjeja’a ya tabe abôk, a ke temple.

Asu Yésus a nda bôte jé, abô’ô Pâque e nji bo ve zezé abô’ô ya ngumba môs. Môse wo tôé môse ya Pâque ô ne atata’a ya Abô’ô ba di fembé é ne te mvusan tañe melu zangbwal. (Marc 14:1) Abô’ô ete é wô’ô boban éyoñe ya Pâque. Nkôlane ya ba kôlô nda jap e Nazareth, a tabe Jérusalem, a bulane menda map, éyoñ éte ése ja nyoñe be sondô ébaé. Ve mbu wu, mbôle ba tôban ébubua a Yésus, dulu éte ja nyoñ be abui éyoñ. Éyoñe ba bulane Jérusalem, ba zu teme jam éziñ.

Nté ba bulan, Joseph ba Marie ba buni na, Yésus a ne nsamba bivuvuman a bemvôé bap. Ve, éyoñe ba tebe na ba lôt alu, be teke nye yen. Nde ba jeñe nye nsamba bôte ba be be ba te wulu, ve a nji bo valé. Be nji yene mone wop vôm éziñ! Nde Joseph ba Marie ba bulane Jérusalem na ba ke jeñe nye.

Ba jeñe nye ngumba môse, teke ndoñ. Ja’a môse baa, teke yene nye. Nde, môse lale, ba su’ulane ke yene mone wop aba da y’abui meba ya temple. Ba yene Yésus a too ézezañe Bejuif béziñ be ne beye’ele. A vô’ôlô be, a sili’i be minsili, a beye’ele be ne fe’e ne vema a abime fe’e a bili.

Ane Marie a sili nye na: “A mone wom amu jé wo te bo bia ana? Tame yen, bia ésoo bia jeñe wo a biyebe bise.”​—Luc 2:48, Mfefé Nkôñelan.

Yésus a kame na, be nji kui na be yeme vôm a né. Nde a sili be na: “Mi nga jeñe ma amu jé? Ye mi nji yeme na me ayiane bo me tabe’e nda ésa wom?”​—Luc 2:49.

Mbôle be tôbaneya, Yésus a bulane Nazareth a bebiaé bé, a ke ôsu a bo be mewôk. A ke ôsu a bi fek a yaé mfa’a ya minsôn. Akusa bo a nga’an ésoé, Zambe a yene nye mvaé, a bôte ba nye’e nye. E ne fo’o été na, ataté éyoñ a nga’ane mongô, Yésus a liti mbamba éve’ela sa ke ve mfa’a ya yeme mame ya nsisim, a liti fe ésemé mfa’a ya bebiaé bé.