Yésus a ve meleb a lat a akum

Nté Yésus a ngenan a ja’ak nda mone Pharisien, betoyini be bôte ba yange nye nseñ. A nga tôbane fe aval jam ete Galilée. (Marc 1:33; 2:2; 3:9) E Judée va, abui bôte da kômbô yene nye a vô’ôlô nye, ba liti fo’o na ba selan a Bepharisien ba di a Yésus.

Jôme Yésus a taté jô é bili atinan é ne ngum aval asu beyé’é bé: “Taba’ane mvusu Bepharisien ntyee, e nye a ne nsisime bebadu’u.” Yésus a tatéya ve abendé te éyoñe jia, ve jam a ndôme yen éyoñ a te di a Bepharisien da liti na melebe mete me ne mfi abui. (Luc 12:1, Mfefé Nkôñelan; Marc 8:15) Éko éziñ Bepharisien be ne jeñe na be solé mbia mboone wop éyoñe ba bo v’ane ba wô’ô bôt éngôngol, ve da sili na bôte be yeme na be ne mbia be bôt. Yésus a jô na: “Teke jam éziñ é ne nsolane da yiane bo te kulan, nge nsolan jam bôt ba yiane bo te yem.”​—Luc 12:2, Mfefé Nkôñelan.

Éko éziñ bôt be mbe be bôma’ane Yésus be mbe bôte ya Judée be nji kui na be wô’ô nye éyoñ a nga ye’ele Galilée. Ajô te a beta ba’alane mejô me ne mfi a mbe a tatéya kobô. A jô asu ba ba vô’ôlô nye na: “Te mia ko ba ba wôé nyôle woñ, a e mbe bete be se ngule ya bo jam afe mvus éte.” (Luc 12:4, Mfefé Nkôñelan) Aval a tatéya de bo, Yésus a liti beyé’é bé mfi ya tabe ndi na, Zambe a ye nyoñe ngap a be. Da sili fe na be meme Mona môt a buni na Zambe a ne ngule ya volô be.​—Matthieu 10:19, 20, 26-33; 12:31, 32.

Nde môt éziñe ya nsamba bôt ô ne valé a telé Yésus nkobô asu na a kate nye jam da ndeñele nye a jô’ô na: “A Ñye’ele jô’ô mojañe na bia nye bi kaban éli’i jangan.” (Luc 12:13, Mfefé Nkôñelan.) Atiñ da jô na, ntôle mona fam ñwô wo yiane nyoñe ngab ébaé ya élik, nde ñhe, zô’é é nji yiane bo valé. (Deutéronome 21:17) Éko éziñ môt ate a nji kômbô nyoñe ve abime da yiane nye. Nde Yésus a bene top ngam éziñ, a yalan a fe’ ése na: “A môt za a nga telé ma ntyi’i mejô nge môt a kape mia akum?”​—Luc 12:14.

Nde Yésus a ve be abendé di: “Taba’an ntye, te boan ôzañ akum: amu akum abui môt a bili, e ne te ve nye ényiñ.” (Luc 12:15) To’o môt a bili abui akum, nga môt ate a ye wu a li’i akume dé? Yésus a tu’a liti jam ete éyoñ a belan ngul éve’an ja liti mfi ya bi mbamba éyôlé mise me Zambe a jô’ô na:

“Nkukum éziñ ô nga bili si, bidi bi nga yô été abui: ane a nga simesan nlem été, a jô na, Me aye bo aya, amu me se vôme ya naane bidi biam? Ane a nga jô na, Ajô di nde me aye bo na: me aye tyam menda me anaane bidi, a lôñe ma me ne anen; me aye naane bidi biam a akume dam bise été. Wôna me aye jô nleme wome na, A nlem, ô maneya naan akum abui de aye yiane wo mimbu abui; bômbô’ô si, ô di, a nyu, a wô’ avak. Ve Zambe a nga jô nye na, Ô ne akute môt, alu di be aye nyoñ nsisime wôé; biôm ô maneya kôan, bi aye bo biôm bi za ? Môt a kôan akume dé, te bo akum be Zambe, a ne aval ete.”​—Luc 12:16-21.

Beyé’é be Yésus a ba ba vô’ôlô nye be ne ku ôlame ya jeñ abui akum. Nge na, e dañe tyelé nleme yôp a mame ya ényiñe ji a ne bo na, be bo teke beta bo Yéhôva ésaé avale da yian. Ajô te Yésus a beta ba’alane mbamba melep a nga ve den a nga ke ngumba mbu a étun e Nkañete wé ya Nkôle yôp a jô’ô na:

“Te mia tyelé minleme yôp ajô ényiñe jenan mfa’a jôme mia ye di, nge ajô nyôle jenan mfa’a jôme mia ye jaé. . . . Fomba’ane bingbwañ: bi ne teke bé nge kôan, teke akañ nge angun: ve Zambe a ve bie bidi. Abime avé mi ne beta tañ a dañ anon? . . . Yenan, ane same meyañ ja yaé, teke saé nge tiñ, ve da ma jô mia na to’o Salomon étôto’o jé ése été, a nji ke jaé ngômesan ane jia ya be be. . . . Ve mia, te jeñane jôme mia ye di, nge jôme mia ye nyu, a te tebane fe’e ne vema . . . Ésoo wônan a yeme na mia yi bie. . . . Ve tata’a jeñan éjôé jé; a mame mete ma ye vebane be mia.”​—Luc 12:22-31, Mfefé Nkôñelan; Matthieu 6:25-33.

Za a ye jeñ Éjôé Zambe? Yésus a liti na, a ne “mone nsamba mintômba,” e bôte be ne zôsôô, be too fe tyôtyoé mbe ba ye bo de. Mvuse ya valé ba ye yemelane na tañe bôt éte é ne fo’o ve bôte 144 000. Jé ja yange be? Yésus a ve be ndi nleme nyi a jô’ô na: “Ésoo wônan a nga yene mvaé ya ve mia éjôé.” Ba ye ke jeñe na be tôñesane njeñan akum ya si nyô, akum be ne mane wup. Ba ye viane beme mise map e mfa’a ya “ko’ane akum é ne te man e yôp,” vôme ba ye ke jôé a Krist.​—Luc 12:32-34, Mfefé Nkôñelan.